Verkiesings 2019: Tevredenheid met demokrasie

Christie Keulder – Namibiërs se voorkeur vir demokrasie as regeringsvorm is op ‘n laagtepunt.

Hierdie is ‘n sentrale bevinding van die agste rondte van Afrobarometer se tweejaarlikse navorsing wat hierdie week in Windhoek bekendgestel is. Voorkeur vir demokrasie is die laagste sedert die eerste opname 20 jaar gelede in 1999.

Ook tevredenheid met demokrasie het ‘n laagtepunt bereik.

Is dit moontlik dat die voortgesette ekonomiese verknorsing in die land gewone Namibiërs se verbintenis tot, en tevredenheid met ‘n demokratiese bestel erodeer? Is dit ‘n teken dat persepsies dat die regering nie materiële welvaart vir inwoners skep nie mense se toewyding aan demokrasie beïnvloed?

Grafiek 1 toon voorkeur vir demokrasie het ‘n positiewe verband met Namibiërs se persepsie van hul huidige, persoonlike lewensomstandighede. Voorkeur vir demokrasie neem af wanneer lewensomstandighede verswak. Hierdie verhouding is statisties noemenswaardig.

Volgens grafiek 2 bestaan ‘n soortgelyke verband tussen tevredenheid met demokrasie en persoonlike lewensomstandighede. Hoe meer mense se lewensomstandighede verswak, hoe minder tevrede is hulle met die demokrasie.

Hierdie tendense dui daarop dat die negatiewe ekonomiese toestande in die land negatiewe gevolge vir Namibië se demokrasie het. Moontlik is Namibiërs se voorkeur vir demokrasie nie ‘n intrinsieke of inherente waarde nie, maar ‘n houding gekoppel aan die voordele wat demokrasie bied; met ander woorde ‘n instrumentele voorkeur vir demokrasie.

Demokrasie moet by implikasie ‘n verskil in mense se lewens maak. Sulke persepsies kan die toekoms van ons demokrasie ondermyn.

* Data is ontleen aan die Afrobarometer, 'n Pan-Afrikaanse reeks opnames oor houdings oor demokrasie, bestuur en die gemeenskap. Besoek afrobarometer.org vir meer besonderhede.