‘Veilige besluit’ om skole gesluit te hou

Heropening 2 weke uitgestel

06 January 2021 | Onderwys
Kristien Kruger en Tuyeimo Haidula – Onderwysers in die land sou vandag terugkeer skool toe ter voorbereiding op die heropening van skole op 11 Januarie, maar die ministerie van onderwys, kuns en kultuur het laat Maandag aangekondig daar is besluit om in die lig van die skerp toename in Covid-19-gevalle later met die skooljaar te begin.
Onderwysers sal nou op 14 Januarie hul pligte hervat en leerlinge van beide staat- en private skole sal eers op 26 Januarie terugkeer skool toe vir klaskameronderrig.
Die ministerie sê hy het met die kantoor van die president, die kantoor van die eerste minister, die ministerie van gesondheid en maatskaplike dienste, die Namibiese Nasionale Onderwysersunie (Nantu) en die nasionale advieskomitee van onderwys, asook ander belanghebbendes beraadslaag voordat die besluit geneem is.
Windhoek Hoërskool (WHS) se skoolhoof, mnr. Hawie Engels, is van mening dit was nodig om die opening van skole uit te stel.
“Daar is tans van ons personeel wat siek is of onlangs nog in isolasie was,” het hy gesê.
Me. Colette Rieckert, besturende direkteur van Windhoek Gimnasium, het aan Republikein gesê dié skool steun die besluit. “Ons was betrokke by die samespreking ten opsigte van die heropening van skole en ons dink dit is ’n veilige roep.

EKSTRA TYD
“Ons is nie so bekommerd oor die kinders se aansteeklikheid nie omdat die wetenskap bewys dat dit minimaal is en ons weet ons skool het goeie sanitasie, maar ons is bekommerd oor waar leerlinge ná skool beweeg,” het sy gesê.
Me. Loide Shipanga, die skoolhoof van die Usko Nghaamwa Spesiale Skool in die Ohangwenastreek, meen dat die uitstel sal die ministerie ekstra tyd gee om aan die finansiële kwessie aandag te gee sodat skole voorbereidings kan tref en die nodige hulpmiddels bekom of aankoop voordat leerlinge terugkeer vir klaskameronderrig.

EKSAMENUITSLAE
Ná afloop van verlede jaar se eksamens was daar volgens Engels soos verwag ’n afname in WHS-leerlinge se prestasies.
Windhoek Afrikaanse Privaatskool (WAP) het ook ’n verskil in leerlinge se punte opgemerk.
“Nie alle leerlinge het die nodige selfdissipline om onafhanklik van ’n onderwyser te werk en take betyds in te handig nie.
“Die verskil in punte was egter nie van so ’n aard dat ons bekommerd hoef te wees oor ons leerders se akademiese vermoë om die volgende jaar aan te pak nie,” het me. Ariska van Vuuren, WAP se woordvoerder, gesê.
Volgens die skoolhoof van Ongenga Hoërskool in die Ohangwenastreek, mnr. Usko Muahafa, het dié skool hoofsaaklik van klaskameronderrig gebruik gemaak, omdat net die helfte van leerlinge toegang tot die internet het.
“Streng maatreëls is ingestel om die leerlinge se veiligheid te verseker. Kinders was te alle tye onder toesig, selfs gedurende pouses,” het hy gesê.
“Daar was beslis ’n verandering in ons leerlinge se resultate. Ons leerlinge het buitengewoon goed presteer omdat die leerplan voltooi is en omdat ons genoeg tyd met leerlinge deurgebring het in vergelyking met ander skole wat groeperings, tydgebaseerde groepe en ander onderrigstelsels gebruik het,” het Mauhafa gesê.
Rieckert sê Windhoek Gimnasium se leerlinge het ook ’n beter akademiese jaar gehad as wat verwag was.
“Hier en daar was enkelinge wat nie saamgewerk het nie en daardie leerlinge sal nou moet hard werk om die kennis en vaardighede aan te leer wat hulle volgende graad vereis,” het sy
gesê.

PAD VORENTOE
“By Windhoek Gimnasium sal ons klaskameronderrig parallel met afstandonderrig aanbied. Ons het wel ’n groep leerlinge wat slegs ingeskryf is vir die afstandonderrig en daarom nie fisiek skool toe hoef te kom nie.
“Ons het genoeg ruimte in die klaskamers vir elke leerling om elke dag skool toe te kom, maar leerlinge kan tuisbly en afstandonderrig doen indien hulle siek voel,” het Rieckert gesê.
Volgens Engels het WHS nie die kapasiteit om alle leerlinge op die perseel te akkommodeer nie en sal heel moontlik, nes verlede jaar, gebruik maak van die metode waar sekere grade se leerlinge net op spesifieke dae skool toe kom.
Shipanga het gesê hulle maak hoofsaaklik by Usko Nghaamwa Spesiale Skool van klaskameronderrig gebruik om gehoorgestremde leerlinge te akkommodeer en sal vanjaar daarmee volhou.
“Die ouers is nie altyd in staat om met die kinders te kommunikeer nie, wat beteken dat ouers nie die kinders met hul skoolwerk kan help nie. Ja, ons het ook die gedrukte materiaal aan die leerders tuis gestuur, maar dit het nie gewerk nie. Ek sal nie afstandonderrig vir dowe leerlinge aanbeveel nie,” het sy gesê.
Mnr. Tony Tripodi, skoolhoof van Gobabis Gimnasium sê hy sal nie verbaas wees as die ministerie ná die twee weke weer die opening van skole uitstel nie.
“Ek wil ’n beroep op die publiek doen om by die regulasies te hou. Dis die enigste manier hoe ons saam sal sorg dat skole oop bly,” het Tripodi gesê.
[email protected]
[email protected]

Soortgelyk

 

Gesondheidswerkers, leerlinge en onderwysers deel van 343 nuwe gevalle

1 uur gelede | Gesondheid

Sewe Covid-19-verwante sterftes is vandag aangekondig en wel vier in Windhoek, twee in Swakopmund en een in Grootfontein. Die sterftes in Windhoek sluit 'n 63-jarige...

Moller, Hatuikulipi se belange onder vergrootglas

16 ure gelede | Misdaad

Hoofredaksie – Een van die transaksies wat deur die Teenkorrupsie-kommissie (ACC) as deel van die Fishrot-ondersoek gefynkam word, is 'n bedrag van N$8 miljoen wat...

Rekening van N$151 000 bly toe 'jakkals' gly

16 ure gelede | Misdaad

Francoise Steynberg – 'n Vermeende glyjakkals wat vir 'n maand saam met sy gesin in 'n gastehuis op Swakopmund gebly en glo nie betaal het...

Mans vas oor vervalsing van Covid-19-toetsuitslae

16 ure gelede | Misdaad

Kristien KrugerTwee Zimbabwiese mans is Saterdag omstreeks 12:00 op Katima Mulilo in hegtenis geneem vir die besit was vervalste Covid-19 laboratoriumtoetsverslae van PathCare Namibië.Die mans...

Reënweer bring groot skade

16 ure gelede | Weer

Kristien Kruger – Terwyl Namibië die derde week van swaar neerslae binnegaan, is groot skade reeds aan paaie, landerye en ander infrastruktuur aangerig. Windhoekers is...

Weer vir 11 Januarie 2021

16 ure gelede | Weer

BINNELAND: Gedeeltelik bewolk en baie warm in die Noordweste, verre Weste en dele van die //Kharasstreek. Elders sal dit bewolk en warm tot baie...

Regering slaan toe op klaringsagente

16 ure gelede | Regering

Phillepus Uusiku – Die regering is in die finale fase van die instelling van strenger maatreëls vir die lisensiëring van klaringsagente.Die instellings beoog om die...

Nafau wen in hof teen Shoprite

16 ure gelede | Arbeid

Kristien Kruger en Adolf Kaure – Stakende Shoprite-werknemers was Vrydagmiddag verjuig toe die hoërhof in Windhoek beslis het dat ’n interdik teen die Shoprite-winkelgroep uitgereik...

Op die spoor van Hardapdam se opvangsgebiede

16 ure gelede | Infrastruktuur

Kallie Pauw (gasskrywer)Die onlangse wonderlike reën in groot dele van Namibië en verslae daaroor en foto's van vol riviere en dansende boere het mense (soos...