Valse lasbrief boemerang
Vinnige polisieoptrede en inligting verskaf deur die gemeenskap het 'n moontlike huisbraak verhoed.
Augetto Graig
Vyf mans, onder wie 'n oudpolisieman wat ontslaan is uit die mag asook 'n geskorste polisieman, is tans in die aanhoudingselle op Rehoboth nadat hul poging om 'n bekende politieke figuur in die streek se huis te plunder, skeef geloop het.
Die boewe is betrap met 'n valse lasbrief vir toegang tot die huis van mnr. Edward Wambo, die raadslid vir Rehoboth-Oos en die voorsitter van die Hardap-streekraad.
Nampol se hoofwoordvoerder, adj.komm. Edwin Kanguatjivi, het bevestig dat mnr. Stephanus Kabono (28), mnr. Josef Nauta (25), mnr. Nepando Willem (29), mnr. Michael Xamseb (25) en mnr. Erick Noariseb (39) Maandag op Rehoboth in die hof verskyn het.
Kabono is 'n geskorste polisiebeampte van die eenheid vir misdaadondersoeke van die Klein Windhoek-polisie, en Nauta was voorheen 'n polisiebeampte van die Katutura-polisiekantoor se eenheid vir misdaadondersoeke.
Landdros Desire Kamboua het die saak tot 16 Augustus uitgestel en ook alle aansoeke om borgtog geweier.
Volgens kommissaris Eric Clay, koördineerder van misdaadondersoeke in die Hardapstreek, het die polisie op Rehoboth vinnig gereageer op inligting wat hulle van “ons oë en ore op die grond” (gemeenskapslede wat saam met die polisie werk) gekry het. Die polisie was toevallig reeds besig met 'n ondersoek na Wambo se huis in Blok E waar voorheen ingebreek is, sê hy.
Op dieselfde dag as die datum op die valse lasbrief het die polisie die oortreders in hegtenis geneem.
Dit blyk dat hulle ook valslik voorgegee het die lasbrief hou met 'n ondersoek van die Teenkorrupsiekommissie (ACC) verband. Op die vervalste lasbrief is geskryf “ACC” en “CR/08/201” terwyl “money laundering – corruption” as rede ingevul is. Dit dui aan die doel van deursoeking is om dokumente te vind wat inligting oor tendertransaksies bevat. “Ons probeer nog die doel van die misdaad bepaal,” sê Clay aangesien die boewe nooit so ver gekom het om toegang tot Wambo se perseel te kry nie. Nogtans meen Clay toegang tot die huis was beslis deel van die plan en waarvoor die valse lasbrief gebruik sou word. Hy noem dat die vervalste handtekening van oudlanddros Ruth Herunga aandui dat die skurke met die regstelsel vertroud is.
Die polisieondersoek duur voort om ook onder meer vas te stel “hoeveel ander hulle al so ingeloop het”, sê
hy.
Clay verseker die gemeenskap dat sulke misdaad nie algemeen is nie, maar moedig Namibiese burgers aan om wel altyd oplettend te wees. “Die gemeenskap moet kennis hê van dié soort voorvalle. Maak seker en vra polisiebeamptes om hul persoonlike en amptelike identifikasie te toon. Kyk dan na die naam en die foto, en as daar onraad vermoed word, bel die betrokke stasiebevelvoerder,” sê hy.
Vyf mans, onder wie 'n oudpolisieman wat ontslaan is uit die mag asook 'n geskorste polisieman, is tans in die aanhoudingselle op Rehoboth nadat hul poging om 'n bekende politieke figuur in die streek se huis te plunder, skeef geloop het.
Die boewe is betrap met 'n valse lasbrief vir toegang tot die huis van mnr. Edward Wambo, die raadslid vir Rehoboth-Oos en die voorsitter van die Hardap-streekraad.
Nampol se hoofwoordvoerder, adj.komm. Edwin Kanguatjivi, het bevestig dat mnr. Stephanus Kabono (28), mnr. Josef Nauta (25), mnr. Nepando Willem (29), mnr. Michael Xamseb (25) en mnr. Erick Noariseb (39) Maandag op Rehoboth in die hof verskyn het.
Kabono is 'n geskorste polisiebeampte van die eenheid vir misdaadondersoeke van die Klein Windhoek-polisie, en Nauta was voorheen 'n polisiebeampte van die Katutura-polisiekantoor se eenheid vir misdaadondersoeke.
Landdros Desire Kamboua het die saak tot 16 Augustus uitgestel en ook alle aansoeke om borgtog geweier.
Volgens kommissaris Eric Clay, koördineerder van misdaadondersoeke in die Hardapstreek, het die polisie op Rehoboth vinnig gereageer op inligting wat hulle van “ons oë en ore op die grond” (gemeenskapslede wat saam met die polisie werk) gekry het. Die polisie was toevallig reeds besig met 'n ondersoek na Wambo se huis in Blok E waar voorheen ingebreek is, sê hy.
Op dieselfde dag as die datum op die valse lasbrief het die polisie die oortreders in hegtenis geneem.
Dit blyk dat hulle ook valslik voorgegee het die lasbrief hou met 'n ondersoek van die Teenkorrupsiekommissie (ACC) verband. Op die vervalste lasbrief is geskryf “ACC” en “CR/08/201” terwyl “money laundering – corruption” as rede ingevul is. Dit dui aan die doel van deursoeking is om dokumente te vind wat inligting oor tendertransaksies bevat. “Ons probeer nog die doel van die misdaad bepaal,” sê Clay aangesien die boewe nooit so ver gekom het om toegang tot Wambo se perseel te kry nie. Nogtans meen Clay toegang tot die huis was beslis deel van die plan en waarvoor die valse lasbrief gebruik sou word. Hy noem dat die vervalste handtekening van oudlanddros Ruth Herunga aandui dat die skurke met die regstelsel vertroud is.
Die polisieondersoek duur voort om ook onder meer vas te stel “hoeveel ander hulle al so ingeloop het”, sê
hy.
Clay verseker die gemeenskap dat sulke misdaad nie algemeen is nie, maar moedig Namibiese burgers aan om wel altyd oplettend te wees. “Die gemeenskap moet kennis hê van dié soort voorvalle. Maak seker en vra polisiebeamptes om hul persoonlike en amptelike identifikasie te toon. Kyk dan na die naam en die foto, en as daar onraad vermoed word, bel die betrokke stasiebevelvoerder,” sê hy.
Kommentaar
Republikein
Geen kommentaar is op hierdie artikel gelaat nie