Republikein Newspaper

Dit is wonderlik om Namibiese sokkerspelers in buitelandse ligas te sien skitter, veral in ons naburige Suid-Afrika.

Hoewel daar weens oneindige tweespalt en onaktiwiteit ’n slegte nasmaak in die “Land of the Brave” se liga is, het bekende plaaslike produkte soos Peter Shalulile en Deon Hotto die maatstaf as twee van die Absa Premiersokkerliga (PSL) se mees uitstaande spelers gestel.

Shalulile het 16 doele vir sy klubspan Highlands Park aangeteken en het sodoende die seisoen as die gesamentlike voorste doelskopper afgesluit, gelyk met Hellings Mhango wat ook 16 keer vir Orlando Pirates die agterkant van die net gevind het.

Sy doele het nie net sy span gehelp om negende in ’n mededingende PSL-seisoen te eindig nie, maar het Shalulile ook in staat gestel om die aandag van die topspanne in die liga, insluitend Mamelodi Sundowns, te trek.

Mamelodi Sundowns – wat pas ’n historiese seisoen voltooi het deur die binnelandse “driekuns” te behaal met titelseges in die premierliga op dramatiese wyse op die laaste dag van die seisoen, die Nedbank-beker uitklopreeks asook die Top Agt – is baie geïnteresseerd in dié Brave Warriors-speler se handtekening.

Verskeie aanloklike aanbiedinge het die talentvolle doelskopper laat huiswaarts keer om sy gesin te raadpleeg om te besluit by watter klub hy moet aansluit.

Nog ’n speler wat sy talent vir Bidvest Wits aangewend het, Deon Hotto, het blykbaar by een van Suid-Afrika se mees suksesvolle spanne, Orlando Pirates, aangesluit. Dit volg nadat hy ook die aandag van bulspanne soos Kaizer Chiefs en Mamelodi Sundowns getrek het.

Hotto, wat op Swakopmund grootgeword het, het ’n merkwaardige seisoen beleef met ’n bydraende rol in sewe doele wat sy span gehelp het om die seisoen in die vierde posisie af te sluit, agter Sundowns, Kaizer Chiefs en Orlando Pirates.

Dit maak my baie trots omdat ek jare gelede die bekwame vleuel by die Swakopmund Football Club (SFC) hier op die kusdorp sien ontwikkel het.

Hotto het so ’n merkwaardige seisoen gehad dat die vervaardigingsreus, Adidas, ’n lonende borgskapooreenkoms vir die speler opgestel het.

Baroka FC is nie een van Suid-Afrika se mees aansienryke klubs nie, maar die linkeragterspeler Ananias Gebhardt het sy afrigter en bestuurder baie trots gemaak toe hy die wendoel in ’n oorwinning van 1-0 oor Mamelodi Sundowns aangeteken het, wat noodsaaklik was om te verseker dat sy span relegasie afweer.

Sy kragtige kopskoot het verseker dat Baroka sy aanspraak lewendig kon hou om.

Op die onvergeetlike laaste dag van die seisoen het sy span vir Kaizer Chiefs tot ’n 1-1 gelykopuitslag beperk om te verseker dat hulle volgende seisoen weer in die PSL mag aantree. In dié wedstryd was Gebhardt se verdediging van kardinale belang was om die noodsaaklike gelykoptelling te verseker.

Nadat Kaizer Chiefs tevore die Namibiese doelwagter Virgil Vries vir verskeie blapse afgeskryf het, is sy kontrak met die Soweto-reus beëindig en Chiefs het begin rondkyk om ’n ander doelwagter aan te skaf.

Vries het die res van die seisoen vir die eersteligaklub Moroka Swallows gespeel en het die verwerping in ’n silwer randjie verander. Toe die spreekwoordelike een deur toeklap, het Vries seker gemaak hy stoot die volgende een oop.

Deurdat hy in 14 wedstryde geen doele afgestaan het nie, het hy gesorg dat Swallows vir die eerste keer in vyf jaar weer tot die Absa Premierliga bevorder word.

Dit gee dié doelwagter kans om sy voormalige werkgewer Kaizer Chiefs verkeerd te bewys, want die twee spanne sal mekaar volgende seisoen op die veld ontmoet.

Hoewel daar al vir soveel maande geen ligasokker in Namibië gespeel is nie, het Namibiese spelers se prestasies vir hul onderskeie klubs in Suid-Afrika my trots gemaak.