Republikein Newspaper

Augetto Graig – Die gewilde Namibiese sjef Talamondjila ‘Talla’ Moongo is op Maandag 11 Januarie in Addis Abeba, Ethiopië oorlede. Hy sou vandag (14 Januarie) sy 44ste verjaarsdag gevier het.

Volgens die ministerie van internasionale betrekking en samewerking word ’n nadoodse ondersoek gedoen om die oorsaak van sy heengaan vas te stel.

“Sodra al die betrokke inligting ingesamel is, sal die (Namibiese) missie na Ethiopië help met die insameling van nodige dokumentasie, soos ’n doodsertifikaat, asook met die repatriasie van sy oorskot na Namibië, afhangend van die uitslag van die lykskouing.

“Die Namibiese sending betuig innige meegevoel met die bedroefde familie,” het die ministerie in ’n vrystelling gesê.

Moongo was ’n bekende gesig wat diep spore in die Namibiese kos- en vermaakkringe getrap het. Hy was ’n reeks-entrepreneur wat selfs ’n luukse partytjiebusdiens in die Namibiese hoofstad gebied het. Sy flambojante natuur het van kleins na vore gekom en hy was ’n man sonder grense, sonder beperking op sy prestasies of op sy sosiale aanpassingsvermoë.

Gebore in ballingskap in Zambië in 1977, vanweë sy pa mnr. Fillemon Moongo se politieke aktivisme, het Talla en die huisgesin later vir meer as 15 jaar in Swede grootgeword.

In sy jeug was hy passievol oor kosmaak, graffiti en dans.

Hy het vir ’n bekende hip-hopgroep Kriss Kross gedurende hul toer van Stockholm gedans en saamgewerk met internasionale musikante soos Shabba Ranks en Arrested Development, volgens sy niggie, die jong filmster Neige Moongo.

Talla het in 1992 permanent na Namibië teruggekeer en sy hoërskoolloopbaan by Centaurus in Windhoek voltooi. Ná skool het hy ’n meestersjef geword wat instansies soos La Marmite, Ocean Basket, Nando’s, Pepata, Kalahari Jazz Café, The Kitchen en The Bistro suksesvol help maak het.

Sy avontuurlus en kookkuns het hom ook na buurlande Zambië en Angola geneem en hy het ook as sjef in Malawi, Suid-Afrika en Nigerië gtewerk.

“Hoewel Talla met hartkomplikasies geleef het, het hy altyd ’n glimlag gedra wanneer hy op sy antieke Vespa gery het. Nooit skaam om sy hulp of advies aan enige iemand te verleen nie,” vertel sy niggie.

Volgens mnr. Sean Naude was Talla ’n medestigter van die Namibia Marshall Rangers. “Ek kon hom enige uur bel en hy sou soos ’n ridder op ’n wit perd, op sy raserige skoeter aangejaag kom, reg om met enige situasie te help,” vertel Naude.

Die voormalige diamantkommissaris mnr. Kennedy Hamutenya beskryf hom as ’n professionele swerwer, “wat van werk tot werk beweeg het, op soek na uitnemendheid, of om tot die redding van een kroeg of restaurant ná die ander te kom.

“Dit is geen wonder hy het deur sy beroep selfs in Ethiopië beland nie,” sê hy.

Talle lofbetuigings op sosiale media is dié week deur uiteenlopende Namibiese persoonlikhede soos die toppolisiebeampte me. Victoria Matjila, historikus mnr. Casper Erichsen, mnr. Daniel Tjongarero (president van die Namibiese Motorsportfederasie, NMSF) en musikante Jackson Wahengo en Felix ‘Shikololo’ Johannes geplaas.

Moongo laat sy vrou Balbin en 14-jarige dogter Leticia agter en word oorleef deur sy ma, me. Veronica Shaende, en sewe ouer broers en susters.

– [email protected]