Toerisme steier onder vlugverbod
Die toerismebedryf as een van die pilare van die ekonomie vrees Covid-19 se finansiële impak.
Ronelle Rademeyer en Francoise Steynberg - Met April wat vanweë Paasnaweek tradisioneel piektyd in die toerismebedryf is, sidder toeroperateurs en ander diensverskaffers oor die finansiële impak wat Covid-19 en die opskorting van vlugte na en van Duitsland, Ethiopië en Katar op die bedryf gaan hê.
Baie toeriste het Saterdag nadat pres. Hage Geingob die aankondiging oor die verbod op sekere vlugte gemaak het, na die Internasionale Lughawe Hosea Kutako gegaan om alternatiewe reisreëlings te tref.
Mnr. Eduard Westreicher en sy vrou, Renate, sou gister ná sowat ’n maand in Namibië na Duitsland teruggekeer het.
Republikein het met hom gepraat terwyl hulle Saterdag by die lughawe alternatiewe reëlings probeer tref het.
“Ons kon nie die redery waardeur ons bespreek het in die hande kry nie. Nou probeer ons plek bespreek op ’n vlug na Johannesburg en van daar af terug na Duitsland,” het Westreicher gesê.
Ondanks die verbod het Ethiopian Airways wel gister by dié lughawe buite Windhoek neergestryk en weer van daar af vertrek.
Mnr. Jitendra Mandani, die redery se verkoopsbestuurder in Namibië, het by navraag gesê die redery “is ’n laaste vlug na en van” hierdie lughawe toegelaat.
“Ons het vandag (gister) hier geland omdat die meeste van ons passasiers in Addis Abeba Namibiërs was,” het hy verduidelik.
“Ons sal vlugte hervat wanneer alles weer normaal is.”
Die vlugverbod geld ingevolge die presidensiële opdrag vir 30 dae, wat Paasmaandag 13 April verstryk.
Dit raak Air Namibia wat sy vlugte na en van Duitsland opgeskort het, Ethiopian Airways, Qatar Airways en laekosterederye soos Eurowings wat die Duitsland-roete bedien.
Qatar Airways gee op sy webblad instruksies oor hoe geraakte passasiers te werk moet gaan om vlugdatums te wysig of hul geld terug te eis.
TOERISME
’n Toeroperateur het op voorwaarde van anonimiteit gesê die bedryf kan nie verstaan waarom vlugte uit Namibië na hierdie bestemming geraak word nie.
“Ons kan mos nie toeriste hier in die land hou nie.”
Sy het bevestig die aankondiging het “chaos” veroorsaak.
“Al ons inkomende toere vanuit Duitsland is gekanselleer. Ons moes e-posse aan al die diensverskaffers stuur by wie ons akkommodasie, busse en voertuie bespreek het, of avontuuruitstappies in die woestyn en ander aktiwiteite aan die kus bespreek het.”
Sy sê kansellasiebeleide is deur baie diensverskaffers gewysig en toeriste word die volle bedrag terugbetaal omdat die Covid-19-pandemie “as ’n daad van God” beskou word waaroor niemand beheer het nie.
“Ons was aanvanklik baie gestres tot ons besef het ons kan nie die situasie verander nie.”
Dié toeroperateur is egter baie besorg oor vryskutgidse wat sonder betaling by die huis gaan sit.
Me. Gitta Paetzold, uitvoerende hoof van die Gasvryheidsvereniging van Namibië (Han), sê dit “is die ergste ding wat met Namibië gebeur het, maar ons toerismebedryf het dit verwag”.
“Dit is katastrofies vir Namibië se toerismebedryf. Vir die volgende 30 dae kom toerisme tot stilstand.”
Sy sê mense kan besluit om vir die res van 2020 nie te reis nie.
“Moenie paniekerig raak nie. Ons kommunikeer met die regering en banke vir belastingverligting en rentevrye lenings aan die bedryf,” sê sy.
Me. Tanja Dahl, uitvoerende hoof van die Namibië Professionele Jagtersvereniging (Napha), sê die jagseisoen het in Februarie afgeskop, maar in die laaste weke het kliënte jagtogte begin kanselleer.
“Geen jagters gaan in die nabye toekoms in Namibië kom jag nie.”
Gondwana Collection Namibia het gesê sy lodges bly oop met ’n verhoogde fokus op higiëne, voorkomende maatreëls en Namibiese gasvryheid soos gewoonlik.
Sekere hotelle en lodges bied reisigers nou spesiale pakkette aan.
Hotelle, onder meer die Avani Hotel in Windhoek, het hul gesondheidsmaatreëls drasties verbeter en gesondheidstasies met ontsmetlappies, handreiniger en temperatuurskandeerders aangebring.
Personeel word ook deurentyd gemonitor en openbare gebiede word volgens die hoogste standaarde skoongemaak, met spesiale aandag aan oppervlakke waaraan baie geraak word, soos deurknoppe.
– [email protected]; [email protected]
Baie toeriste het Saterdag nadat pres. Hage Geingob die aankondiging oor die verbod op sekere vlugte gemaak het, na die Internasionale Lughawe Hosea Kutako gegaan om alternatiewe reisreëlings te tref.
Mnr. Eduard Westreicher en sy vrou, Renate, sou gister ná sowat ’n maand in Namibië na Duitsland teruggekeer het.
Republikein het met hom gepraat terwyl hulle Saterdag by die lughawe alternatiewe reëlings probeer tref het.
“Ons kon nie die redery waardeur ons bespreek het in die hande kry nie. Nou probeer ons plek bespreek op ’n vlug na Johannesburg en van daar af terug na Duitsland,” het Westreicher gesê.
Ondanks die verbod het Ethiopian Airways wel gister by dié lughawe buite Windhoek neergestryk en weer van daar af vertrek.
Mnr. Jitendra Mandani, die redery se verkoopsbestuurder in Namibië, het by navraag gesê die redery “is ’n laaste vlug na en van” hierdie lughawe toegelaat.
“Ons het vandag (gister) hier geland omdat die meeste van ons passasiers in Addis Abeba Namibiërs was,” het hy verduidelik.
“Ons sal vlugte hervat wanneer alles weer normaal is.”
Die vlugverbod geld ingevolge die presidensiële opdrag vir 30 dae, wat Paasmaandag 13 April verstryk.
Dit raak Air Namibia wat sy vlugte na en van Duitsland opgeskort het, Ethiopian Airways, Qatar Airways en laekosterederye soos Eurowings wat die Duitsland-roete bedien.
Qatar Airways gee op sy webblad instruksies oor hoe geraakte passasiers te werk moet gaan om vlugdatums te wysig of hul geld terug te eis.
TOERISME
’n Toeroperateur het op voorwaarde van anonimiteit gesê die bedryf kan nie verstaan waarom vlugte uit Namibië na hierdie bestemming geraak word nie.
“Ons kan mos nie toeriste hier in die land hou nie.”
Sy het bevestig die aankondiging het “chaos” veroorsaak.
“Al ons inkomende toere vanuit Duitsland is gekanselleer. Ons moes e-posse aan al die diensverskaffers stuur by wie ons akkommodasie, busse en voertuie bespreek het, of avontuuruitstappies in die woestyn en ander aktiwiteite aan die kus bespreek het.”
Sy sê kansellasiebeleide is deur baie diensverskaffers gewysig en toeriste word die volle bedrag terugbetaal omdat die Covid-19-pandemie “as ’n daad van God” beskou word waaroor niemand beheer het nie.
“Ons was aanvanklik baie gestres tot ons besef het ons kan nie die situasie verander nie.”
Dié toeroperateur is egter baie besorg oor vryskutgidse wat sonder betaling by die huis gaan sit.
Me. Gitta Paetzold, uitvoerende hoof van die Gasvryheidsvereniging van Namibië (Han), sê dit “is die ergste ding wat met Namibië gebeur het, maar ons toerismebedryf het dit verwag”.
“Dit is katastrofies vir Namibië se toerismebedryf. Vir die volgende 30 dae kom toerisme tot stilstand.”
Sy sê mense kan besluit om vir die res van 2020 nie te reis nie.
“Moenie paniekerig raak nie. Ons kommunikeer met die regering en banke vir belastingverligting en rentevrye lenings aan die bedryf,” sê sy.
Me. Tanja Dahl, uitvoerende hoof van die Namibië Professionele Jagtersvereniging (Napha), sê die jagseisoen het in Februarie afgeskop, maar in die laaste weke het kliënte jagtogte begin kanselleer.
“Geen jagters gaan in die nabye toekoms in Namibië kom jag nie.”
Gondwana Collection Namibia het gesê sy lodges bly oop met ’n verhoogde fokus op higiëne, voorkomende maatreëls en Namibiese gasvryheid soos gewoonlik.
Sekere hotelle en lodges bied reisigers nou spesiale pakkette aan.
Hotelle, onder meer die Avani Hotel in Windhoek, het hul gesondheidsmaatreëls drasties verbeter en gesondheidstasies met ontsmetlappies, handreiniger en temperatuurskandeerders aangebring.
Personeel word ook deurentyd gemonitor en openbare gebiede word volgens die hoogste standaarde skoongemaak, met spesiale aandag aan oppervlakke waaraan baie geraak word, soos deurknoppe.
– [email protected]; [email protected]
Kommentaar
Republikein
Geen kommentaar is op hierdie artikel gelaat nie