Swakop-stadsraad aan ministerie: Betaal eers
Die ministerie van gesondheid wil nog munisipale rushuise op Swakopmund vir kwarantyndoeleindes gebruik. Die stadsraad het die versoek goedgekeur, op een enkele voorwaarde.
Erwin Leuschner op Swakopmund – In die lig van die tweede golf van Covid-19 wat Namibië getref het, het die ministerie van gesondheid en maatskaplike dienste bykomende akkommodasie op Swakopmund vir kwarantyndoeleindes versoek.
“In die streek, veral in die Swakopmund-distrik, was daar 'n eksponensiële toename in nuwe gevalle gedurende die vakansietydperk,” lui 'n brief wat die Erongostreek se gesondheidsdirekteur, me. Anna Jonas, in Januarie aan die stadsraad oorhandig het.
Om dié rede het sy gevra vir die gebruik van 25 bykomende munisipale rushuise.
Hierdie onderwerp het tydens verlede week se raadsvergadering 'n debat ontketen nadat die uitvoerende gesag aan die begin van Februarie besluit het die ministerie kan die rushuise teen 'n laer tarief gebruik – mits die ministerie eers 'n uitstaande rekening betaal.
Volgens 'n konsepresolusie is die ministerie toegelaat om 112 munisipale rushuise teen 'n laer tarief te gebruik tydens die eerste golf van die virus in Junie 2020. Hierbenewens het die raad 78 ekstra kamers gratis aan die ministerie vir kwarantyndoeleindes beskikbaar gestel.
Die ministerie het die 112 rushuise vir ongeveer twee-en-'n-half maande gebruik, wat ondanks die aansienlik verlaagde tarief meer as N$3,6 miljoen gekos het. Van hierdie bedrag is N$1,5 miljoen nog uitstaande.
DEBAT OOR OPLOSSING
“Konsentreer ons nie te veel op hulpbronne, eerder as op die gesondheid van ons inwoners as ons hierdie vereiste stel nie?” wou raadslid Erikki Shitana (Swapo) by verlede week se munisipale vergadering weet.
“Wat moet ons doen as iemand in kwarantyn geplaas moet word, maar die rekening is nog nie betaal nie? Waar moet die persoon gehuisves word?”
Shitana het 'n dringende beroep op raadslede gedoen om 'n ooreenkoms met die ministerie te onderteken. Raadslid Heinrich Hafeni (Swapo) het saamgestem. “Die vereiste om eers te betaal, is te moeilik,” het hy gesê.
Die voorsitter van die uitvoerende gesag, mnr. Wilfried Groenewald (SRA), het geantwoord dat die aantal nuwe infeksies op Swakopmund aansienlik gedaal het en tans baie laag is.
“Die ministerie het ook genoeg tyd om te betaal,” het hy gesê.
Weens die pandemie ervaar vele maatskappye finansiële probleme, terwyl talle reeds hul deure gesluit het.
“Die skuld bly ophoop. Dit moet as 'n herinnering aan die regering dien dat hulle ook die verantwoordelikheid het om te betaal,” het Groenewald gesê.
“Dit is nou die ministerie van gesondheid se beurt.”
Die meeste raadslede het met Groenewald saamgestem.
– [email protected]
“In die streek, veral in die Swakopmund-distrik, was daar 'n eksponensiële toename in nuwe gevalle gedurende die vakansietydperk,” lui 'n brief wat die Erongostreek se gesondheidsdirekteur, me. Anna Jonas, in Januarie aan die stadsraad oorhandig het.
Om dié rede het sy gevra vir die gebruik van 25 bykomende munisipale rushuise.
Hierdie onderwerp het tydens verlede week se raadsvergadering 'n debat ontketen nadat die uitvoerende gesag aan die begin van Februarie besluit het die ministerie kan die rushuise teen 'n laer tarief gebruik – mits die ministerie eers 'n uitstaande rekening betaal.
Volgens 'n konsepresolusie is die ministerie toegelaat om 112 munisipale rushuise teen 'n laer tarief te gebruik tydens die eerste golf van die virus in Junie 2020. Hierbenewens het die raad 78 ekstra kamers gratis aan die ministerie vir kwarantyndoeleindes beskikbaar gestel.
Die ministerie het die 112 rushuise vir ongeveer twee-en-'n-half maande gebruik, wat ondanks die aansienlik verlaagde tarief meer as N$3,6 miljoen gekos het. Van hierdie bedrag is N$1,5 miljoen nog uitstaande.
DEBAT OOR OPLOSSING
“Konsentreer ons nie te veel op hulpbronne, eerder as op die gesondheid van ons inwoners as ons hierdie vereiste stel nie?” wou raadslid Erikki Shitana (Swapo) by verlede week se munisipale vergadering weet.
“Wat moet ons doen as iemand in kwarantyn geplaas moet word, maar die rekening is nog nie betaal nie? Waar moet die persoon gehuisves word?”
Shitana het 'n dringende beroep op raadslede gedoen om 'n ooreenkoms met die ministerie te onderteken. Raadslid Heinrich Hafeni (Swapo) het saamgestem. “Die vereiste om eers te betaal, is te moeilik,” het hy gesê.
Die voorsitter van die uitvoerende gesag, mnr. Wilfried Groenewald (SRA), het geantwoord dat die aantal nuwe infeksies op Swakopmund aansienlik gedaal het en tans baie laag is.
“Die ministerie het ook genoeg tyd om te betaal,” het hy gesê.
Weens die pandemie ervaar vele maatskappye finansiële probleme, terwyl talle reeds hul deure gesluit het.
“Die skuld bly ophoop. Dit moet as 'n herinnering aan die regering dien dat hulle ook die verantwoordelikheid het om te betaal,” het Groenewald gesê.
“Dit is nou die ministerie van gesondheid se beurt.”
Die meeste raadslede het met Groenewald saamgestem.
– [email protected]
Kommentaar
Republikein
Geen kommentaar is op hierdie artikel gelaat nie