SSA: ’n Ramp van internasionale omvang
Sarel van der Walt
Die skandes van die staatsveiligheidsagentskap (SSA) onder oudpres. Jacob Zuma kan vergelyk word met die groot intelligensieskandes wêreldwyd.
Só is ’n verslag van die hersieningspaneel van die regering wat in die naweek bekend gemaak is, Sondag beskryf.
Die verslag sê onder meer dat SSA-lede wat lojaal was aan Zuma – ’n voormalige intelligensiehoof van die ANC – ’n onwettige en gekoördineerde intelligensie-veldtog in 2017 bedryf het in ’n poging om te keer dat pres. Cyril Ramaphosa die ANC-leier word.
Miljoene rande van die SSA is met dié smeerveldtog gemors.
Die paneel van tien lede wat gelei is deur oudminister Sydney Mufamadi, het onder meer ook onthul dat die SSA gespioeneer het op burgerlike organisasies wat teen Zuma gekant was.
’n Waninligtingsveldtog is ook geloods om die landswye plaaslike verkiesing in 2016 te beïnvloed.
Die paneel is in April verlede jaar deur Ramaphosa op die been gebring nadat hy Arthur Fraser, vorige direkteur-generaal van die SSA, na die departement van korrektiewe dienste verskuif het.
Twee voormalige ministers van staatsveiligheid, Siyabonga Cwele en David Mahlobo, sowel as Thulani Dlomo, ’n voormalige hoof van spesiale operasies van die SSA, word ook deur die hersieningspaneel verantwoordelik gehou vir die vermorsing van geld.
Cwele is tans minister van binnelandse sake. Mahbolo het later vir ’n kort tyd minister van energie geword, maar is deur Ramaphosa uit sy nuwe kabinet weggelaat.
Die Sunday Times het Sondag berig hy verneem R20 miljoen van die SSA is in die aanloop tot die ANC se leierskapsverkiesing in 2017 by Nasrec, Johannesburg, gebruik om vermoedelik die presidentskapswedloop te beïnvloed.
GUPTA-FAMILIE
Rapport het berig die intelligensiegemeenskap het Zuma reeds vroeg in die tydperk ná 2009 gewaarsku oor die bedreiging wat die Gupta-familie vir land se nasionale sekuriteit inhou.
Die voormalige president is ook gewaarsku dat hy sy verhouding met hulle moet hersien omdat dit sy reputasie kan skaad.
Die verslag is onderdruk en was deels verantwoordelik vir die verandering in leierskap by die SSA, het die hersieningspaneel oor die SSA bevind.
Ramaphosa het onlangs ’n beroep op die SSA gedoen om hom opnuut te verbind om die land se mense te dien en die oppergesag van die reg te eerbiedig. Dipuo Letsatsi-Duba, huidige minister van staatsveiligheid, het verlede jaar opdrag gegee dat die agtergrond van alle SSA-agente weer ondersoek moet word.
Zuma het Sondagaand getwiet hy voel niks as "apartheidspioene" hom korrup noem nie. Hy het na twee lede van die hersieningspaneel verwys.
"Ek voel niks as apartheidspioene my korrup noem nie. Ek hoop nie mense maak nou ’n blik wurms oop waaroor hulle later spyt sal wees nie,” het Zuma gesê. – Netwerk24
Die skandes van die staatsveiligheidsagentskap (SSA) onder oudpres. Jacob Zuma kan vergelyk word met die groot intelligensieskandes wêreldwyd.
Só is ’n verslag van die hersieningspaneel van die regering wat in die naweek bekend gemaak is, Sondag beskryf.
Die verslag sê onder meer dat SSA-lede wat lojaal was aan Zuma – ’n voormalige intelligensiehoof van die ANC – ’n onwettige en gekoördineerde intelligensie-veldtog in 2017 bedryf het in ’n poging om te keer dat pres. Cyril Ramaphosa die ANC-leier word.
Miljoene rande van die SSA is met dié smeerveldtog gemors.
Die paneel van tien lede wat gelei is deur oudminister Sydney Mufamadi, het onder meer ook onthul dat die SSA gespioeneer het op burgerlike organisasies wat teen Zuma gekant was.
’n Waninligtingsveldtog is ook geloods om die landswye plaaslike verkiesing in 2016 te beïnvloed.
Die paneel is in April verlede jaar deur Ramaphosa op die been gebring nadat hy Arthur Fraser, vorige direkteur-generaal van die SSA, na die departement van korrektiewe dienste verskuif het.
Twee voormalige ministers van staatsveiligheid, Siyabonga Cwele en David Mahlobo, sowel as Thulani Dlomo, ’n voormalige hoof van spesiale operasies van die SSA, word ook deur die hersieningspaneel verantwoordelik gehou vir die vermorsing van geld.
Cwele is tans minister van binnelandse sake. Mahbolo het later vir ’n kort tyd minister van energie geword, maar is deur Ramaphosa uit sy nuwe kabinet weggelaat.
Die Sunday Times het Sondag berig hy verneem R20 miljoen van die SSA is in die aanloop tot die ANC se leierskapsverkiesing in 2017 by Nasrec, Johannesburg, gebruik om vermoedelik die presidentskapswedloop te beïnvloed.
GUPTA-FAMILIE
Rapport het berig die intelligensiegemeenskap het Zuma reeds vroeg in die tydperk ná 2009 gewaarsku oor die bedreiging wat die Gupta-familie vir land se nasionale sekuriteit inhou.
Die voormalige president is ook gewaarsku dat hy sy verhouding met hulle moet hersien omdat dit sy reputasie kan skaad.
Die verslag is onderdruk en was deels verantwoordelik vir die verandering in leierskap by die SSA, het die hersieningspaneel oor die SSA bevind.
Ramaphosa het onlangs ’n beroep op die SSA gedoen om hom opnuut te verbind om die land se mense te dien en die oppergesag van die reg te eerbiedig. Dipuo Letsatsi-Duba, huidige minister van staatsveiligheid, het verlede jaar opdrag gegee dat die agtergrond van alle SSA-agente weer ondersoek moet word.
Zuma het Sondagaand getwiet hy voel niks as "apartheidspioene" hom korrup noem nie. Hy het na twee lede van die hersieningspaneel verwys.
"Ek voel niks as apartheidspioene my korrup noem nie. Ek hoop nie mense maak nou ’n blik wurms oop waaroor hulle later spyt sal wees nie,” het Zuma gesê. – Netwerk24
Kommentaar
Republikein
Geen kommentaar is op hierdie artikel gelaat nie