Spoegwolf breek die internet

Yandi du Plessis

Spoegwolf is ongetwyfeld een van die gewildste Afrikaanse musiekgroepe van ons tyd, met die grope se musiekvideo van die trefferliedjie “Storm” wat verlede maand een miljoen trefslae op YouTube gehaal het.
Hoewel die alternatiewe rockgroep se optredes uitgestel of gekanselleer moes word weens die Covid-19 pandemie, bly hulle aanhangers honger vir vermaak en Spoegwolf stel geensins teleuer nie!
Hulle amptelike webblad en stroomplatform Die Rivier het vanjaar die lig gesien. Volgens dié groep is die platform soveel groter as dié generiese beskrywing. “Dis 'n huis vir 'n gemeenskap met ’n venster waar die kuns deurskyn; ’n ‘supercharged’ familie-WhatsApp-groep waar almal in ons gesin saam kan deelneem aan die vreugde van musiek en samesyn. Kry eksklusiewe toegang tot splinternuwe Spoegwolf songs, videos, podcasts en verhale. Blaai deur ons blou boekies waar resepte en gedigte lê. Deel met ons jou leed en liefde. Sit jou boot op die rivier,” lui ’n inskrywing van 8 April op die groep se Facebook-blad.
Op Die Rivier kan aanhangers na liedjies of podsendings luister of na musiekvideos of kortfilms kyk. Spoegwolf, wat uit Moskou du Toit, Chris von Wielligh, Albert van der Merwe en Danie du Toit bestaan, deel ook daagliks gedigte, resepte, gedagtes en verhale. “Jy is in Spoegwolf,” lui die verwelkoming op die blad.
Aanhangers was rasend opgewonde toe die groep verlede week aankondig hulle gaan op Vrydag 15 Mei ’n “digitale mini-konsert” op Die Rivier hou. “Vier liedjies, duisende van ons. Jy kan hom kyk vir R60 en die hele Rivier sien vir ’n dag, of aansluit vir R39. Ons sal een keer ’n maand so ’n show doen,” het hulle op Facebook en Instagram geskryf.
Opgewonde aanhangers het na die blad “gestroom”, maar Spoegwolf het duidelik die grootte van hulle volgelinggetalle onderskat. “Ons site overload. Daar is tien keer meer mense as wat ons verwag het,” lui ’n Instagram-inskrywing van Vrydagaand.
Kort daarna kon die blad nie meer die hoeveelheid mense wat ingeteken het, dra nie. “Ons is jammer. En wow! Julle het die internet gebreek! Ons het nooit gedroom ons sou so baie ‘traffic’ na ons show kry nie. Ons ‘website’ kan nie so baie mense hanteer nie. Ons het nie geweet so baie mense weet eens van Spoegwolf nie. Ons sal ons ‘website’ herbou om die ‘traffic’ te hanteer! Weer eens, ‘well done’, jammer, dankie. Ons en julle breek venues, nou breek ons websites.”
Só lui die groep se sosiale media-inskrywings kort ná Die Rivier Vrydagaand onder die druk gevou het.
Aanhangers het egter nie ontevrede weggestap nie. Diegene wat vir die dag toegang gekoop het, kan die opvoering enige tyd kyk en die volgende opvoering gratis “bywoon”. Dié wat hul geld terug wil hê as gevolg van die vertraging kan ‘n e-pos stuur na [email protected].
Daar is ook baie om na uit te sien, aangesien dié mini-konserte een keer ‘n maand gaan plaasvind. En Spoegwolf sal beslis volgende keer van beter weet as om hulle aanhangers te onderskat.