Skoolkoshuise kort nog 15 000 beddens
Die minister van onderwys, kuns en kultuur het om hulp gepleit om koshuise veiliger teen Covid-19 te maak.
Augetto Graig – Die ministerie van onderwys, kuns en kultuur is dankbaar vir die onlangse skenkings wat hulle ontvang het. Die skenkings help om moeilike omstandighede te verlig, veral met die uitbreking van Covid-19, wat kwesbare koshuisleerlinge landswyd te bowe moet kom.
Die adjunkdirekteur in die departement van bestuursbeplanning, beoordeling en opleiding, mnr. Filemon Nangolo, sê veral koshuisleerlinge in die Kunenestreek, waar dit vier jaar laas gereën het, kry swaar.
Nangolo het Donderdag aangekondig NamPower gaan 'n skenking ter waarde van N$1,4 miljoen gee om wyd verspreide koshuisprobleme die hoof te bied.
Altesaam 560 stapelbeddens en 665 matrasse sal help om te verseker dat die betrokke leerlinge beter sosiale afstand kan toepas.
Nangolo sê die beddens en matrasse sal voor die einde van die maand na 25 skoolkoshuise gestuur word.
Mnr. Pecka Semba, die onderwysdirekteur in die Omahekestreek, het namens die streekdirekteure van die 14 streke sy dankbaarheid uitgespreek.
“Koshuise is een van die gebiede waar ons sukkel om die veiligheid van ons leerlinge te verseker. Hierdie skenking raak die armste van die armstes, en bring die waardigheid en die menswees van hierdie leerlinge terug. Van hulle sal nie meer op die vloer hoef te slaap nie. Julle laat voel ons goed en ons leerlinge sal ook goed voel,” het hy gesê.
By die geleentheid het die minister van onderwys, kuns en kultuur, me. Anna Nghipondoka, gesê daar is 'n nasionale tekort van 15 000 beddens by koshuise in al 14 streke van die land. Daar is meer as 58 800 koshuisleerlinge landswyd, sê sy.
Nghipondoka sê om veilige koshuise te hê, is noodsaaklik vir inklusiwiteit van onderwys, veral vir kinders van minderbevoorregte huishoudings.
“Sonder veilige en gelieflike omstandighede by koshuise is hierdie kinders kwesbaar en kan hulle skool verlaat. Koshuise oorbrug die gaping in ons gemeenskap,” sê sy.
“Hierdie skenking kom op 'n geskikte tyd. Ons moet 'n balans vind tussen die beveiliging van kinders, en om kinders in die skool te hou. Weens beperkte hulpbronne is dit nie moontlik dat koshuisleerlinge enkelkamers kan kry nie. Dit is ook nou die tyd, weens Covid-19, dat die regering meer as 'n miljard voorsien om koshuise uit te brei, om sosiale afstand te vergemaklik. Ons benodig nog baie hulp, veral met stapelbeddens. Volg NamPower se voorbeeld en kom ons vat hande,” vra die minister.
NamPower het ook 6 000 gesigmaskers geskenk wat dit self aan gemarginaliseerde skoolkinders sal uitdeel.
Mnr. Simeon Amunkete, voorsitter van die NamPower-stigting en senior menslikehulpbronbestuurder van die nasionale kragverskaffer, het die skenking amptelik oorhandig.
Hy sê NamPower het oor die laaste tien jaar N$48 miljoen aan hul program vir maatskaplike verantwoordelikheid bestee; die meerderheid op onderwys.
Hy moedig begunstigdes aan om na die beddens en matrasse om te sien, sodat toekomstige leerlinge dit ook kan gebruik.
“Ek glo ons nederige skenking sal bydra tot die groot nood en sal 'n verskil maak,” sê hy.
Die ministerie sou Vrydag ook 'n skenking van die Verenigde Nasies se Voedsel- en Landbou-organisasie (FAO) ter waarde van N$1,7 miljoen ontvang, waarmee die skoolvoedingsprogram in die Kunenestreek ondersteun sal word, het Nangolo gesê.
– [email protected]
FOTO’s
Die adjunkdirekteur, mnr. Filemon Nangolo, met een van die stapelbeddens en matrasse wat NamPower aan skoolkoshuise geskenk het. Foto Augetto Graig
Die minister van onderwys, kuns en kultuur, me. Anna Nghipondoka. Foto Augetto Graig
Die adjunkdirekteur in die departement van bestuursbeplanning, beoordeling en opleiding, mnr. Filemon Nangolo, sê veral koshuisleerlinge in die Kunenestreek, waar dit vier jaar laas gereën het, kry swaar.
Nangolo het Donderdag aangekondig NamPower gaan 'n skenking ter waarde van N$1,4 miljoen gee om wyd verspreide koshuisprobleme die hoof te bied.
Altesaam 560 stapelbeddens en 665 matrasse sal help om te verseker dat die betrokke leerlinge beter sosiale afstand kan toepas.
Nangolo sê die beddens en matrasse sal voor die einde van die maand na 25 skoolkoshuise gestuur word.
Mnr. Pecka Semba, die onderwysdirekteur in die Omahekestreek, het namens die streekdirekteure van die 14 streke sy dankbaarheid uitgespreek.
“Koshuise is een van die gebiede waar ons sukkel om die veiligheid van ons leerlinge te verseker. Hierdie skenking raak die armste van die armstes, en bring die waardigheid en die menswees van hierdie leerlinge terug. Van hulle sal nie meer op die vloer hoef te slaap nie. Julle laat voel ons goed en ons leerlinge sal ook goed voel,” het hy gesê.
By die geleentheid het die minister van onderwys, kuns en kultuur, me. Anna Nghipondoka, gesê daar is 'n nasionale tekort van 15 000 beddens by koshuise in al 14 streke van die land. Daar is meer as 58 800 koshuisleerlinge landswyd, sê sy.
Nghipondoka sê om veilige koshuise te hê, is noodsaaklik vir inklusiwiteit van onderwys, veral vir kinders van minderbevoorregte huishoudings.
“Sonder veilige en gelieflike omstandighede by koshuise is hierdie kinders kwesbaar en kan hulle skool verlaat. Koshuise oorbrug die gaping in ons gemeenskap,” sê sy.
“Hierdie skenking kom op 'n geskikte tyd. Ons moet 'n balans vind tussen die beveiliging van kinders, en om kinders in die skool te hou. Weens beperkte hulpbronne is dit nie moontlik dat koshuisleerlinge enkelkamers kan kry nie. Dit is ook nou die tyd, weens Covid-19, dat die regering meer as 'n miljard voorsien om koshuise uit te brei, om sosiale afstand te vergemaklik. Ons benodig nog baie hulp, veral met stapelbeddens. Volg NamPower se voorbeeld en kom ons vat hande,” vra die minister.
NamPower het ook 6 000 gesigmaskers geskenk wat dit self aan gemarginaliseerde skoolkinders sal uitdeel.
Mnr. Simeon Amunkete, voorsitter van die NamPower-stigting en senior menslikehulpbronbestuurder van die nasionale kragverskaffer, het die skenking amptelik oorhandig.
Hy sê NamPower het oor die laaste tien jaar N$48 miljoen aan hul program vir maatskaplike verantwoordelikheid bestee; die meerderheid op onderwys.
Hy moedig begunstigdes aan om na die beddens en matrasse om te sien, sodat toekomstige leerlinge dit ook kan gebruik.
“Ek glo ons nederige skenking sal bydra tot die groot nood en sal 'n verskil maak,” sê hy.
Die ministerie sou Vrydag ook 'n skenking van die Verenigde Nasies se Voedsel- en Landbou-organisasie (FAO) ter waarde van N$1,7 miljoen ontvang, waarmee die skoolvoedingsprogram in die Kunenestreek ondersteun sal word, het Nangolo gesê.
– [email protected]
FOTO’s
Die adjunkdirekteur, mnr. Filemon Nangolo, met een van die stapelbeddens en matrasse wat NamPower aan skoolkoshuise geskenk het. Foto Augetto Graig
Die minister van onderwys, kuns en kultuur, me. Anna Nghipondoka. Foto Augetto Graig
Kommentaar
Republikein
Geen kommentaar is op hierdie artikel gelaat nie