Skedel, beendere by bouperseel gevind

Augetto Graig - 'n Skedel en menslike beendere is Dinsdag deur werkers van die Roads Contractor Company (RRC) ontdek toe hulle 'n sloot langs die nuwe Kwoasstraat in Goreangab, Uitbreiding 4, met grond gevul het.
Dié ontwikkeling is deel van ’n massabehuisingprogram waarvoor erwe tans gediens word.
Die grond waarin die beendere gevind is, kom van 'n rivier in die area af.
Dié gruvonds is ná 09:00 deur me. Teresia Mutota (23) en haar medewerker, Lazarus Hindjou (42), gemaak.
“Ons het die sloot opgevul en ons het in die nat grond gegrou toe ons die bene net so gekry het. Ons het die veiligheidsbeampte daarvan vertel,” het Mutota gesê.
Hindjou het gesê Mutota het hom gewaarsku daar is menslike oorblyfsels.
“Ek was besig om grond binne te grou toe ek hoor ‘hier is ’n mens se kop’. Dit was nog so half in die grond en ons moes dit uithaal en al die bene soek en bymekaarmaak,” het Hindjou gesê.
Kelly Kamutati, die veiligheidsbeampte, het bevestig dat die sand waarin die bene gevind is van ’n ander plek af kom en sy het later die polisie gevra dat die res van die vrag ook ondersoek word.
Die Goreangab Uitbreiding 4-projek waarmee die werkers besig is het al in Februarie 2016 begin, maar die eerste fase is nog nie voltooi nie.
Die polisie is omstreeks 10:52 oor die vonds ingelig en reëlings is getref om mense van die area af weg te hou sodat niemand aan die beendere raak nie.
Mnr. Sean Naude van Namibia Marshall Rangers was een van die eerstes op die toneel en het gehelp om dit te beveilig. Die Namibiese polisie het omstreeks 12:00 by die toneel opgedaag.
Naude het die polisie vergesel toe hulle die stortingsterrein en ook die area waar die dam in die rivier uitmond, vanwaar die grond geskep is, ondersoek het.
Nog beendere is op beide tonele gevind, vertel hy.
Die polisie het die tonele afgekordon en die gebied word bewaak tot ’n forensiese span met hul ondersoek kan voortgaan.
Volgens Naude lyk dit of die oorblyfsels oor al drie tonele van net een mens af kom.
Slegs een skedel is tot dusver gevind.
Volgens hom is daar geen aanduiding van vuilspel nie, en die oorspronklike plek waar die grond geskep is, is te ver van die dam af om op ‘n verdrinking te dui.
Adj.komm. Edwin Kanguatjivi, polisiewoordvoerder, sê hulle is bewus van die voorval, maar het nog nie ’n volledige verslag daaroor ontvang nie.
“Ons weet van die skedel wat by die bouterrein gekry is,” het hy gesê.