Shifeta staan vas oor ivoorhandel
’n Slypskool oor die nasionale olifantbewaring- en bestuursplan is verlede week in die hoofstad aangebied.
Francoise Steynberg – “Olifante is deel van die natuurlike hulpbronne van Namibië waaroor ons volle soewereiniteit het en daar is ’n beperking op hoeveel eksterne inmenging ons sal aanvaar in die gebruik van hierdie hulpbron.”
Die minister van die omgewing, bosbou en toerisme, mnr. Pohamba Shifeta, het verlede week sy ergenis uitgespreek oor diereregtegroepe wat die besluite oor die wettige handel in ivoor by die Konvensie vir die Handel in Bedreigde Spesies (Cites) beïnvloed.
Shifeta was verlede week die gasspreker tydens ’n tweedaagse slypskool oor die nasionale olifantbewaring- en bestuursplan in die hoofstad.
“Die handel in ivoor word tans erg deur die optrede van diereregtegroepe gekniehalter wat die besluite van Cites beïnvloed. Dit ondermyn Namibië se bewaringsprogramme,” het Shifeta beklemtoon.
‘VERDRAAGSAAMHEID GETOETS’
“Vir hoe lank dit nog die geval gaan wees, is onduidelik, maar ons verdraagsaamheid word ernstig getoets.”
Volgens die minister is die belangrikste beloning (buiten onder meer bewaringsjag) die waarde van olifante wat uit die handel in ivoor gegenereer kan word.
Shifeta sê Namibië het groot opgehoopte waardevolle wildprodukte soos ivoor wat volhoubaar geproduseer en deeglik gereguleer kan word as daarmee internasionaal handel gedryf word.
“Die wettige handel in ivoor kan olifantbewaring en –bestuur vir dekades lank ondersteun,” sê hy.
Die voormalige permanente sekretaris en tans konsultant vir die ministerie, dr. Malan Lindeque, het dit beaam en gesê met die inkomste uit die ivoor van slegs natuurlike olifantsterftes, kan vir boere ordentlike heinings opgerig word om olifante uit hul plase te hou.
“Daar is kommunale boere wat reuseskade aan heinings en waterinfrastruktuur in sommige gevalle van meer as N$200 000 gely het,” het Lindeque gesê.
“Ons is voorstanders van 'n kollektiewe benadering tot die regulering van internasionale handel, maar uiteindelik moet ons optree in die belang van bewaring en die landelike mense wat so belangrik is om die lot van olifante op die lang termyn te bepaal,” het Shifeta benadruk.
Hy sê olifantbewaring en –bestuur kan nie gebeur sonder die betrokkenheid van die mense wat die nouste saam met olifante leef nie. Die slypskool het ten doel gehad om die ontwerp van die olifantbewaring- en bestuursplan te bespreek.
“In Namibië is olifante nie slegs tot beskermde gebiede beperk nie en deel grond met landelike gemeenskappe. Olifantbewaring moet ’n wen-wen-situasie vir mense wees om olifante op die lang termyn te verduur,” sê Shifeta.
Volgens Lindeque is die vier grootste probleemgebiede vir olifantkonflik Kamanjab/Otjikondo en Ugab/Omatjete in die Noordweste en in die Noordooste by Kavango/Mangetti en die bewaringsgebiede van Nyae-Nyae en N‡a Jaqna.
Tog heers daar kommer oor die kwynende olifantbevolkings in sekere dele van Noordwes weens die droogte en olifantkonflik, sê Lindeque, asook oor die veterinêre heining van Botswana wat 99% van olifantbewegings in die Noordooste blokkeer.
Namibië se groeiende olifantbevolking staan volgens Lindeque tans op sowat 24 000.
- [email protected]
Die minister van die omgewing, bosbou en toerisme, mnr. Pohamba Shifeta, het verlede week sy ergenis uitgespreek oor diereregtegroepe wat die besluite oor die wettige handel in ivoor by die Konvensie vir die Handel in Bedreigde Spesies (Cites) beïnvloed.
Shifeta was verlede week die gasspreker tydens ’n tweedaagse slypskool oor die nasionale olifantbewaring- en bestuursplan in die hoofstad.
“Die handel in ivoor word tans erg deur die optrede van diereregtegroepe gekniehalter wat die besluite van Cites beïnvloed. Dit ondermyn Namibië se bewaringsprogramme,” het Shifeta beklemtoon.
‘VERDRAAGSAAMHEID GETOETS’
“Vir hoe lank dit nog die geval gaan wees, is onduidelik, maar ons verdraagsaamheid word ernstig getoets.”
Volgens die minister is die belangrikste beloning (buiten onder meer bewaringsjag) die waarde van olifante wat uit die handel in ivoor gegenereer kan word.
Shifeta sê Namibië het groot opgehoopte waardevolle wildprodukte soos ivoor wat volhoubaar geproduseer en deeglik gereguleer kan word as daarmee internasionaal handel gedryf word.
“Die wettige handel in ivoor kan olifantbewaring en –bestuur vir dekades lank ondersteun,” sê hy.
Die voormalige permanente sekretaris en tans konsultant vir die ministerie, dr. Malan Lindeque, het dit beaam en gesê met die inkomste uit die ivoor van slegs natuurlike olifantsterftes, kan vir boere ordentlike heinings opgerig word om olifante uit hul plase te hou.
“Daar is kommunale boere wat reuseskade aan heinings en waterinfrastruktuur in sommige gevalle van meer as N$200 000 gely het,” het Lindeque gesê.
“Ons is voorstanders van 'n kollektiewe benadering tot die regulering van internasionale handel, maar uiteindelik moet ons optree in die belang van bewaring en die landelike mense wat so belangrik is om die lot van olifante op die lang termyn te bepaal,” het Shifeta benadruk.
Hy sê olifantbewaring en –bestuur kan nie gebeur sonder die betrokkenheid van die mense wat die nouste saam met olifante leef nie. Die slypskool het ten doel gehad om die ontwerp van die olifantbewaring- en bestuursplan te bespreek.
“In Namibië is olifante nie slegs tot beskermde gebiede beperk nie en deel grond met landelike gemeenskappe. Olifantbewaring moet ’n wen-wen-situasie vir mense wees om olifante op die lang termyn te verduur,” sê Shifeta.
Volgens Lindeque is die vier grootste probleemgebiede vir olifantkonflik Kamanjab/Otjikondo en Ugab/Omatjete in die Noordweste en in die Noordooste by Kavango/Mangetti en die bewaringsgebiede van Nyae-Nyae en N‡a Jaqna.
Tog heers daar kommer oor die kwynende olifantbevolkings in sekere dele van Noordwes weens die droogte en olifantkonflik, sê Lindeque, asook oor die veterinêre heining van Botswana wat 99% van olifantbewegings in die Noordooste blokkeer.
Namibië se groeiende olifantbevolking staan volgens Lindeque tans op sowat 24 000.
- [email protected]
Kommentaar
Republikein
Geen kommentaar is op hierdie artikel gelaat nie