Republikein Newspaper

Swapo het Vrydag bewerings ontken dat die party se sekre­taris-generaal, me. Sophia Shaningwa, haar bedanking ingedien het.

Die bewerings wat in die sosiale media versprei word, voer aan Shaningwa het uit die party bedank, omdat sy nie meer vir Swapo teen die Fishrot-skandaal kon verdedig nie, nie daarby betrokke was nie en ook nie by die korrupte aktiwiteite van die party betrokke wíl wees nie.

Me. Hilma Nicanor, Swapo se woordvoerder, het Vrydag in 'n verklaring gesê die party neem kennis van die gerugte. Sy sê verder daar steek geen waarheid daarin nie en dit word versprei deur diegene wat verdeeldheid en paniek onder Swapo se rangorde wil saai.

“Ons doen 'n beroep op Swapo se kaders, lede, ondersteuners en dié wat simpatiek is teenoor die party om kalm, waaksaam en standvastig te bly. Hulle moet bewustelik en krities die verspreiding van fopnuus vermy wat voortdurend die reputasie van sosialemediaplatforms ondermyn. Verder versoek ons julle om enige artikel of inhoud met die opskrif 'Pas In' wat met Swapo en sy leierskap verband hou as fopnuus te aanvaar en te verwerp,” het Nicanor gesê.

Sy het bygevoeg dat Shaningwa haar grondwetlike mandaat uitstekend uitvoer deur haar kantoor sonder enige teenstrydigheid met die grootste toewyding, harde werk, dissipline en lojaliteit te lei.

“Ons verwerp dus die inhoud van sulke beriggewing met die minagting wat dit verdien en herinner die skrywers dat die wetlike regte van Sophia Shaningwa en Swapo voorbehou bly,” het Nicanor gesê.

– Nampa