Shaningwa gryp in op Rehoboth

Augetto Graig - Die Rehoboth-dorpsraad is deur die lynministerie opdrag gegee om sy huis in orde te kry en maandelikse verslae oor aanbevole ingrypaksies voor te lê. Sou nie hieraan gehoor gegee word nie, sal daar ernstige gevolge wees. Die verslag wat ook verskeie opdragte aan die dorpsraad insluit, is reeds op 23 November deur die minister van stedelike en landelike ontwikkeling, me. Sophia Shaningwa, aan die dorpsraad gestuur.

In die verslag wat aan Rehoboth se burgemeester, me. Christina Blaauw gerig is, verwys Shaningwa na die gebrek aan spanwerk tussen die raad en die bestuur van die dorp. Volgens Shaningwa het dit ''n negatiewe uitwerking op dienslewering aan die inwoners van Rehoboth.

Sy spreek ook kommer uit oor die gebrek aan toepassing en die veront­agsaming van ministeriële opdragte en voorskrifte deur die raad. Shaningwa het in haar skrywe gemaan dit is haar reg as minister om “die raad aanspreeklik te hou vir die versuiming van die uitvoer van hul pligte”.

Van Shaningwa se opdragte aan die raad is gebaseer op ''n ondersoek deur die ministerie se ouditafdeling wat reeds in Januarie vanjaar uitgevoer, maar vroeg verlede maand hersien is. Ondersoek is onder meer ingestel na belonings wat Rehoboth se hoof van menslike hulpbronne, mnr. Willie Swartz, ontvang het ná sy bedanking in Junie 2015 en sy heraanstelling in Februarie vanjaar. Swartz het volgens die ondersoek ná sy bedanking N$122 971, sy pensioen uitgesluit, ontvang. Die aanbeveling was dat sy oorspronk­like bedanking aanvaar en sy pensioen aan hom uitbetaal word.

Volgens die verslag is die besluit om hom weer aan te stel tydens ''n raadsvergadering op 14 Desember 2015 tydens die raad se jaarlikse vakansie geneem. Dit terwyl ''n saak teen hom in die arbeidshof onderweg was. Die verslag beveel aan dat alle besluite wat toe geneem is, nietig verklaar word.

Die verslag het voorts bevind Swartz het ''n verdere uitbetaling van N$110 664,80 as salaris ontvang vir die vyf maande wat hy nie gewerk het nie. Hy moet dit nou terugbetaal. ''n Ooreenkoms vir die herinstel van sy bydrae tot ''n pensioenfonds, N$15 000 vir die herstel van sy kar en N$1,1 miljoen vir ''n huisverband is ook nietig verklaar.

Ander opdragte van die minister wat nie uitgevoer is nie, betrek mnr. Ernst De Waal wat Shaningwa wou hê moes voort gaan as waarnemende hoof uitvoerende beampte. Hy is egter deur die dorpsraad geskors en met die finansiële bestuurder me. Jennifer Kays vervang. Kays is sedertdien geskors weens vrae oor haar kwalifikasies. Die minister het nou haar goedkeuring gegee vir die aanstelling van mnr. Christoph /Uirab, die huidige hoof uitvoerende beampte.

Volgens Shaningwa se verslag is sekere junior beamptes onregmatig bevorder en het hulle duisende dollar gekry vir waarnemende posisies wat hulle gevul het. Sy het verwys na mnr. Salmon Geiseb wat tot administrateur bevorder is en twee keer sy normale salaris ontvang het. Mnr. Abba Beukes is van brandweerman tot administrateur van die behuisingskema bevorder, terwyl mnr. Willie Steyn van lisensiebeampte tot opsigter bevorder is. Me. Josephine Ndeipanda, ''n gewone werker is tot adjunk-elektrisiën bevorder.

Volgens die verslag het mnr. Albertus Jod ''n toelaag ontvang om Swartz se werk te doen terwyl Swartz weer op kantoor was. Ook het beide Jod en mnr. Jonathan Ockhuizen ten spyte van hul junior posisies op die dorpsraad, tekenregte gekry.