Shanghala sê oor geld vir regsgeleerdes
Die prokureur-generaal het gister vrae beantwoord oor die koste van buitelandse regslui vir advies oor die volksmoordonderhandelinge met Duitsland.
Estelle de Bruyn - Altesaam N$32 274 572,80 is deur die kantoor van die prokureur-generaal, mnr. Sacky Shanghala, aan vier regsgeleerdes uitbetaal om Namibië van regsadvies te bedien in sy onderhandelinge met Duitsland oor vergoeding vir die volksmoord.
"Die betaling is gedoen, maar teen die tyd dat dit gedoen is, het die regslui reeds met 'n hofproses begin om hul eise af te dwing. Die bedrag is nou die onderwerp van bespreking tussen die staatsprokureur en die ministerie van finansies, dus het ek myself hiervan verskoon," het Shanghala op vrae van mnr. Usutuaije Maamberua, Swanu-lid van die NV, geantwoord.
Shanghala sê hy het die menings van die regsgeleerdes gekry. Hy is tevrede met die gehalte van die werk wat hulle gedoen het. Hy is egter nie bereid om regstrategieë te bespreek nie omdat onderhandelinge met Duitsland voortduur. "Die Duitsers win regsadvies in en ons doen dieselfde," het Shanghala gesê.
Hy sê voorts vryskelding van die tenderprosedure is vir hierdie uitgawes verkry. Hy sê hofsaak-strategie sal belemmer word indien voorleggings aan die sentrale tenderraad gedoen moet word en gewag moet word vir hulle om te vergader oor kwessies waarvan hulle nie weet nie.
Shanghala sê daar is geen vereiste in die Grondwet wat magte aan die prokureur-generaal toeken vir die toestemming van die kabinet vir so 'n uitgawe nie.
Hy wou nie besonderhede verskaf oor die presiese bedrag wat Namibië van Duitsland eis in die vorm van vergoeding nie. Hy wou nie sê of die N$400 miljard wat Maamberua in die verband genoem het, korrek is al dan nie.
Shanghala is ook nie seker of die diens van regsgeleerdes ná die eerste ronde regsadvies verder nodig sal wees nie.
Op 'n vraag van Maamberua of sy kantoor oorweeg het om eerder sodanige hulp van die Verenigde Nasies in te win, wat aansienlik goedkoper as die private regsgeleerdes sou wees, het Shanghala gesê hy is nie bewus van so ’n kantoor of agentskap van die VN wat regsadvies verskaf nie.
"Die betaling is gedoen, maar teen die tyd dat dit gedoen is, het die regslui reeds met 'n hofproses begin om hul eise af te dwing. Die bedrag is nou die onderwerp van bespreking tussen die staatsprokureur en die ministerie van finansies, dus het ek myself hiervan verskoon," het Shanghala op vrae van mnr. Usutuaije Maamberua, Swanu-lid van die NV, geantwoord.
Shanghala sê hy het die menings van die regsgeleerdes gekry. Hy is tevrede met die gehalte van die werk wat hulle gedoen het. Hy is egter nie bereid om regstrategieë te bespreek nie omdat onderhandelinge met Duitsland voortduur. "Die Duitsers win regsadvies in en ons doen dieselfde," het Shanghala gesê.
Hy sê voorts vryskelding van die tenderprosedure is vir hierdie uitgawes verkry. Hy sê hofsaak-strategie sal belemmer word indien voorleggings aan die sentrale tenderraad gedoen moet word en gewag moet word vir hulle om te vergader oor kwessies waarvan hulle nie weet nie.
Shanghala sê daar is geen vereiste in die Grondwet wat magte aan die prokureur-generaal toeken vir die toestemming van die kabinet vir so 'n uitgawe nie.
Hy wou nie besonderhede verskaf oor die presiese bedrag wat Namibië van Duitsland eis in die vorm van vergoeding nie. Hy wou nie sê of die N$400 miljard wat Maamberua in die verband genoem het, korrek is al dan nie.
Shanghala is ook nie seker of die diens van regsgeleerdes ná die eerste ronde regsadvies verder nodig sal wees nie.
Op 'n vraag van Maamberua of sy kantoor oorweeg het om eerder sodanige hulp van die Verenigde Nasies in te win, wat aansienlik goedkoper as die private regsgeleerdes sou wees, het Shanghala gesê hy is nie bewus van so ’n kantoor of agentskap van die VN wat regsadvies verskaf nie.
Kommentaar
Republikein
Geen kommentaar is op hierdie artikel gelaat nie