Serena sweet bloed om Halep te klop
Tennis
Marizanne Kok - Dit het elke ons van haar veggees, al haar vernuf en ’n sielkundige gehardheid geverg, maar Serena Williams is vir die 12de keer in haar loopbaan deur na die kwarteindronde van die Australiese Ope.
Williams het gister die enorme aanslag van die wêreld se voorste speler en topgekeurde in Melbourne, Simona Halep, in die vierde ronde met bloedsweet en vasbyt oorkom om ná ’n uur en 47 minute met 6-1, 4-6, 6-4 te seëvier.
Die wedstryd was vooraf ’n bemarker se droom: Halep, die beste speler op die wêreldranglys, teen Williams, die beste speler van haar (en moontlik enige) generasie.
Maar van die verwagte groot armdruk het aanvanklik niks gekom nie, met Williams in die eerste stel in elke aspek baas. Sy het Halep soos ’n marionet gespeel en soos ’n boek gelees. In die skrale 20 minute wat die eerste stel geduur het, het sy haar eerste afslaanpot verloor, maar toe al drie Halep s’n gewen.
’n Antiklimaks het skynbaar gewag. Maar gelukkig was dit nie die draaiboek wat Halep gelees het nie.
Die Roemeen was ’n ander speler in die tweede stel. Waar sy die lengte van haar houe in die eerste stel knaend verkeerd gekry het, was dit in die tweede stel byna onhanteerbaar. Sy het balle uit die hoeke gaan haal, Williams se ruimte ingeperk en in ’n oogwink die moeiliker vrae begin vra.
Dit het haar nie net die tweede stel besorg nie, maar ook vir die grootste deel van die derde in beheer van sake geplaas.
Williams se frustrasie was duidelik terwyl sy of die een hou ná die ander teen die net vasgeslaan het of die bal oor die agterlyn gemoker het. Die grootste drama van die stel het aanvanklik op haar afslaan plaasgevind, terwyl Halep vol selfvertroue en met al die momentum gespeel het.
Dit het 38 minute en sewe potte geneem voor die gety uiteindelik terug in die Amerikaner se guns gedraai het, toe Halep van nêrens die knie voor Williams se kragtige terughoue gebuig het.
Met ’n voorsprong van 4-3 het die 23-malige Slam-kampioen nie weer haar greep op die wedstryd verloor nie.
Vir Halep is dit ’n hartverskeurende uitslag. Nadat sy haar voete in die tweede stel gevind het, was sy uitmuntend en het sy veel meer verdien.
Sy kan steeds heelwat positiewe aspekte uit dié wedstryd neem – en Williams ook. Die veteraan het die toernooi afgeskop met drie maklike wedstryde waarin sy net nege potte verloor het, voordat sy gister gewys het sy het nog nie haar vermoë verloor om diep te delf nie.
Daardie vermoë gaan sy nou broodnodig hê in haar kwarteindstryd, teen die Tsjeg Karolina Pliskova.
Pliskova, sewende gekeur, het vroeër gister gewys sy is gereed om haar eerste Grand Slam-titel te wen, toe sy maalvleis van die Spanjaard Garbine Muguruza gemaak het.
Haar wentelling van 6-3, 6-1 is ’n raak samevatting van die wedstryd. Pliskova se afslaan was onspeelbaar en die verbeelding agter haar houe uit die boonste rakke. – Netwerk24
Williams het gister die enorme aanslag van die wêreld se voorste speler en topgekeurde in Melbourne, Simona Halep, in die vierde ronde met bloedsweet en vasbyt oorkom om ná ’n uur en 47 minute met 6-1, 4-6, 6-4 te seëvier.
Die wedstryd was vooraf ’n bemarker se droom: Halep, die beste speler op die wêreldranglys, teen Williams, die beste speler van haar (en moontlik enige) generasie.
Maar van die verwagte groot armdruk het aanvanklik niks gekom nie, met Williams in die eerste stel in elke aspek baas. Sy het Halep soos ’n marionet gespeel en soos ’n boek gelees. In die skrale 20 minute wat die eerste stel geduur het, het sy haar eerste afslaanpot verloor, maar toe al drie Halep s’n gewen.
’n Antiklimaks het skynbaar gewag. Maar gelukkig was dit nie die draaiboek wat Halep gelees het nie.
Die Roemeen was ’n ander speler in die tweede stel. Waar sy die lengte van haar houe in die eerste stel knaend verkeerd gekry het, was dit in die tweede stel byna onhanteerbaar. Sy het balle uit die hoeke gaan haal, Williams se ruimte ingeperk en in ’n oogwink die moeiliker vrae begin vra.
Dit het haar nie net die tweede stel besorg nie, maar ook vir die grootste deel van die derde in beheer van sake geplaas.
Williams se frustrasie was duidelik terwyl sy of die een hou ná die ander teen die net vasgeslaan het of die bal oor die agterlyn gemoker het. Die grootste drama van die stel het aanvanklik op haar afslaan plaasgevind, terwyl Halep vol selfvertroue en met al die momentum gespeel het.
Dit het 38 minute en sewe potte geneem voor die gety uiteindelik terug in die Amerikaner se guns gedraai het, toe Halep van nêrens die knie voor Williams se kragtige terughoue gebuig het.
Met ’n voorsprong van 4-3 het die 23-malige Slam-kampioen nie weer haar greep op die wedstryd verloor nie.
Vir Halep is dit ’n hartverskeurende uitslag. Nadat sy haar voete in die tweede stel gevind het, was sy uitmuntend en het sy veel meer verdien.
Sy kan steeds heelwat positiewe aspekte uit dié wedstryd neem – en Williams ook. Die veteraan het die toernooi afgeskop met drie maklike wedstryde waarin sy net nege potte verloor het, voordat sy gister gewys het sy het nog nie haar vermoë verloor om diep te delf nie.
Daardie vermoë gaan sy nou broodnodig hê in haar kwarteindstryd, teen die Tsjeg Karolina Pliskova.
Pliskova, sewende gekeur, het vroeër gister gewys sy is gereed om haar eerste Grand Slam-titel te wen, toe sy maalvleis van die Spanjaard Garbine Muguruza gemaak het.
Haar wentelling van 6-3, 6-1 is ’n raak samevatting van die wedstryd. Pliskova se afslaan was onspeelbaar en die verbeelding agter haar houe uit die boonste rakke. – Netwerk24
Kommentaar
Republikein
Geen kommentaar is op hierdie artikel gelaat nie