Reserwebank ‘sluk sy woorde oor inflasie’
Hanlie Stadler – Die Reserwebank het Donderdag uiteindelik toegegee dat sy inflasieverwagtinge te hoog was “en het nou ’n meer geloofwaardige voorspellings gekies”.
Só sê Nazmeera Moola, adjunk- besturende direkteur van Investec Asset Management, nadat die Reserwebank sy verwagting vir inflasie dramaties verlaag het vergeleke met November se pessimistiese voorspelling.
Vir 2019 voorspel die Reserwebank nou inflasie van gemiddeld slegs 4,8% – ’n hele 0,7 persentasiepunt minder as wat die sentrale bank twee maande gelede voorspel het.
Die bank verwag nie meer dat inflasie in 2019 tot hoër as 5% gaan styg nie en verwag ’n boonste draaipunt van 5,6% in die eerste kwartaal van 2020.
Hoewel dit steeds onder die maksimum van 6% is wat die Reserwebank teiken, het Lesetja Kganyago, president van die bank, Donderdag in Pretoria vir die soveelste keer beklemtoon hy wil hê inflasie moet naby die middelpunt van sy teikenband, dus nagenoeg 4,5%, anker.
Die Reserwebank het sy verwagting vir 2020-inflasie effens, met 0,01 persentasiepunt, tot 5,3%, verlaag. Die inflasiekoers vir 2021 word vir die eerste keer voorspel en is ’n betreklik matige 4,8%.
Die gevolg van die skerp aanpassing in sy inflasieverwagtinge is dat die Reserwebank nou slegs een rentekoersverhoging van 0,25 persentasiepunt teen 2021 voorsien indien niks die bootjie skommel nie. Dis teenoor die drie rentekoersverhogings van 0,25 persentasiepunt elk teen 2020, wat in November voorspel is.
Moola sê in November het Investec volgehou die verhoging in die rentekoers is ’n fout gegrond op die Reserwebank se te hoë inflasievoorspellings. “Vandag se verklaring deur die monetêrebeleidskomitee (MBK) bevestig dié siening. Die swak ekonomiese groei regverdig dat rentekoersverlagings oorweeg word.”
Gegewe die “valkagtige samestelling van die MBK” verwag Moola egter dat die Reserwebank die rentekoers onveranderd gaan hou vir die hele 2019. Die Reserwebank sal selfs ná die verkiesing lugtig bly om rentekoerse te verlaag, veral gegewe internasionale risiko’s soos swak wêreldgroei en die verswakking van die rand.
Verskeie ekonome het in November saam met Moola te velde getrek teen die rentekoersverhoging, wat gekom het ná die nuus dat Suid-Afrika uit ’n resessie gekom het.
Prof. Raymond Parsons, ekonoom van die Noordwes-Universiteit se sakeskool, het gesê dis nie “logies” nie. Gegewe die swak vraag van verbruikers, en met kerninflasie laag en stabiel, “moet die poging om vraag deur hoër rentekoerse te beperk, bevraagteken word”.
Dennis Dykes en Isaac Matshego van Nedbank se ekonomiese eenheid het toe gesê die besluit is “teleurstellend”.
Donderdag het Parsons gesê die Reserwebank se besluit om die rentekoers onveranderd te hou, “is die regte een onder die huidige ekonomiese omstandighede”.
Dykes en Matshego se kritiek het Donderdag voortgeduur: “Al die faktore wat die MBK vandag gerusgestel het, was – in meerdere of mindere mate – reeds in November sigbaar: beduidend laer oliepryse, aanduidings dat rentekoerse in die VSA stadiger gaan styg, en min tekens van vraagkantdruk of tweederonde-uitwerkings op inflasie.”
Hulle verwag egter wel vanjaar ’n rentekoersverhoging, maar eers in November, soos wat die Reserwebank inflasie in toom probeer hou as dit weens ’n basisuitwerking weer skerper begin styg. – Netwerk24
Só sê Nazmeera Moola, adjunk- besturende direkteur van Investec Asset Management, nadat die Reserwebank sy verwagting vir inflasie dramaties verlaag het vergeleke met November se pessimistiese voorspelling.
Vir 2019 voorspel die Reserwebank nou inflasie van gemiddeld slegs 4,8% – ’n hele 0,7 persentasiepunt minder as wat die sentrale bank twee maande gelede voorspel het.
Die bank verwag nie meer dat inflasie in 2019 tot hoër as 5% gaan styg nie en verwag ’n boonste draaipunt van 5,6% in die eerste kwartaal van 2020.
Hoewel dit steeds onder die maksimum van 6% is wat die Reserwebank teiken, het Lesetja Kganyago, president van die bank, Donderdag in Pretoria vir die soveelste keer beklemtoon hy wil hê inflasie moet naby die middelpunt van sy teikenband, dus nagenoeg 4,5%, anker.
Die Reserwebank het sy verwagting vir 2020-inflasie effens, met 0,01 persentasiepunt, tot 5,3%, verlaag. Die inflasiekoers vir 2021 word vir die eerste keer voorspel en is ’n betreklik matige 4,8%.
Die gevolg van die skerp aanpassing in sy inflasieverwagtinge is dat die Reserwebank nou slegs een rentekoersverhoging van 0,25 persentasiepunt teen 2021 voorsien indien niks die bootjie skommel nie. Dis teenoor die drie rentekoersverhogings van 0,25 persentasiepunt elk teen 2020, wat in November voorspel is.
Moola sê in November het Investec volgehou die verhoging in die rentekoers is ’n fout gegrond op die Reserwebank se te hoë inflasievoorspellings. “Vandag se verklaring deur die monetêrebeleidskomitee (MBK) bevestig dié siening. Die swak ekonomiese groei regverdig dat rentekoersverlagings oorweeg word.”
Gegewe die “valkagtige samestelling van die MBK” verwag Moola egter dat die Reserwebank die rentekoers onveranderd gaan hou vir die hele 2019. Die Reserwebank sal selfs ná die verkiesing lugtig bly om rentekoerse te verlaag, veral gegewe internasionale risiko’s soos swak wêreldgroei en die verswakking van die rand.
Verskeie ekonome het in November saam met Moola te velde getrek teen die rentekoersverhoging, wat gekom het ná die nuus dat Suid-Afrika uit ’n resessie gekom het.
Prof. Raymond Parsons, ekonoom van die Noordwes-Universiteit se sakeskool, het gesê dis nie “logies” nie. Gegewe die swak vraag van verbruikers, en met kerninflasie laag en stabiel, “moet die poging om vraag deur hoër rentekoerse te beperk, bevraagteken word”.
Dennis Dykes en Isaac Matshego van Nedbank se ekonomiese eenheid het toe gesê die besluit is “teleurstellend”.
Donderdag het Parsons gesê die Reserwebank se besluit om die rentekoers onveranderd te hou, “is die regte een onder die huidige ekonomiese omstandighede”.
Dykes en Matshego se kritiek het Donderdag voortgeduur: “Al die faktore wat die MBK vandag gerusgestel het, was – in meerdere of mindere mate – reeds in November sigbaar: beduidend laer oliepryse, aanduidings dat rentekoerse in die VSA stadiger gaan styg, en min tekens van vraagkantdruk of tweederonde-uitwerkings op inflasie.”
Hulle verwag egter wel vanjaar ’n rentekoersverhoging, maar eers in November, soos wat die Reserwebank inflasie in toom probeer hou as dit weens ’n basisuitwerking weer skerper begin styg. – Netwerk24
Kommentaar
Republikein
Geen kommentaar is op hierdie artikel gelaat nie