Republikein Newspaper

Leandrea Louw op Walvisbaai



'n Rekenmeester wat na bewe­ring deur middel van gedokterde fakture van 'n plaaslike maatskappy in 'n N$11 miljoen-­bedrogsaak betrokke is, se eggenoot is ook in die strafsaak betrek.

Me. Beauty Haimbili het op 4 Febru­arie vir die eerste keer in Walvisbaai se landdroshof op 18 klagte van bedrog en alternatiewelik diefstal, asook 18 klagte van geldwassery en vervalsing verskyn.

Die misdaad is na bewering tussen 2016 en 2020 gepleeg terwyl ­Haimbili as rekenmeester by Lewcor in diens was. Sy word daarvan beskuldig dat sy geld van haar werkgewer ­verduister het deur haar eie bankrekening vir betalings aan te bied.

Die alternatiewe klag wat Haimbili in die gesig staar, is diefstal deur valse voorwendsels.

Die beskuldigde se man, mnr. Jalmari Haimbili, het Woensdag voor landdros Vicky Nicolaidis verskyn en borgtog van N$60 000 is toegestaan.

Die staatsaanklaer, me. Maggy ­Shiyagaya, het gesê hy word ­ingevolge artikel 157(1) van die Strafproseswet by sy vrou ingesluit.

Shiyagaya het aan die hof gesê die ondersoek na die saak is nog nie ­afgehandel nie.

“Die staat versoek daarom dat die saak tot 8 April vir verdere ondersoek uitgestel word.”

Beauty is op 1 Maart vanjaar op borgtog van N$60 000 vrygelaat. Albei die beskuldigdes het borgtog betaal.

Volgens die koördineerder van misdaadondersoeke in die Erongostreek, adj.komm. Erastus Ikuyu, het Haimbili na bewering geld, wat vir Lewcor bedoel was, gesteel deur te versoek dat betalings van diensverskaffers ­inbetaal word in haar persoonlike rekeninge en dié van 'n skoonmaakdiens wat sy besit het, en nie in die maatskappy se rekening nie.

“Die verdagte het voorts fakture en kwotasies met haar persoonlike en besigheidsrekeningnommers by kliënte, veral in die Erongostreek, ingedien waarin hulle die geld moes betaal. As gevolg hiervan is N$11 miljoen in haar rekeninge inbetaal.”

Die Haimbili-egpaar word deur mnr. Ray Rukoro van ENS Africa Namibia verteenwoordig.

– [email protected]