Rehoboth steeds op afdraande pad

Augetto Graig - Die Rehoboth-munisipaliteit kort heelwat werk om die juk van korrupsie en wanbestuur af te skud.

Daar word oorweeg om me. Natalia /Goagoses, wie se taak dit is om die dorpsraad reg te ruk, se aanstelling te verleng.

Die minister van stedelike en landelike ontwikkeling, mnr. Peya Mushelenga, moes mnr. Jan van Wyk, raadslid vir die United People’s Movement (UPM), se vrae voor die Nasionale Raad beantwoord.

Mushelenga het gesê die dorpsraad is in die geheel geskors omdat hulle gesamentlik vir Rehoboth se bestuur verantwoordelik was en nie daarin geslaag het nie.

Hy het gesê die wet op plaaslike owerhede gee hom die reg om die hele raad te skors, en individue kan slegs op die raad se aanbeveling uitgesonder word.

So ’n aanbeveling is nooit ontvang nie, het hy gesê.

Dít in antwoord op Van Wyk se vraag oor die heraanstelling van UPM raadslede wat nie van bedrog en korrupsie beskuldig is nie.

“Die hele raad word verantwoordelik gehou ongeag lede se partyverband,” het Mushelenga gesê.

Die minister het daarop aangedring dorpsinwoners het sy ministerie se aandag op die dorp se probleme gevestig, eerder as die skrywes van opposisieraadslede.

Belangriker is dat die ministerie die klagtes ernstig opgeneem het, het hy gesê.

Van Maart tot April 2017 is ’n ministeriële span op Rehoboth ontplooi om die dorpsraad onmiddellike ondersteuning te bied.

Terselfdertyd is ’n ondersoek van stapel gestuur om die wanbestuur en korrupsie te bevestig, het hy gesê.

Mushelenga het gesê daar is verskeie kere ingegryp deur opleiding te verskaf en kapasiteit te bou voor strafmaatreëls ingestel is.

“Uit die ondersoek en voortdurende mislukking van die raad om te verander ondanks die ministerie se ingryping, was dit duidelik die dorpsraad kon gesamentlik nie daarin slaag om die magte en funksies wat in die wet op plaaslike owerhede uiteengesit word, toe te pas nie,” sê hy.

Die ondersoekverslag is aan die dorpsraad beskikbaar gestel en ’n spertyd is aangedui vir die toepassing van korrektiewe stappe.

“Toe die raad nie sy vermoë en toewyding aan dié stappe kon toon nie, het die minister sy regte uitgeoefen om die raad gesamentlik verantwoordelik te hou. Die raad is ‘n laaste opsie gebied om die minister self te oortuig hoekom hulle nie geskors moes word nie. Onder meer was verdeling onder raadslede duidelik hoekom hulle nie kon saamwerk en hul verantwoordelikhede nakom nie,” het hy gesê.

Nog onreëlmatighede wat ontbloot is, behels die betrokkenheid van raadslede by administratiewe kwessies.

Die minister het spesifiek verwys na ’n geleentheid toe die raad geweier het om die ministerie se voorstel uit te voer.

“Dít was waarom die minister besluit het om die raad te skors en ’n verteenwoordiger aan te stel,” het hy gesê.

Hy het gesê /Goagoses swoeg om Rehoboth se probleme op te los en haar maandelikse verslae toon vordering op die gebied.

“Daar is baie om reg te stel en die proses duur voort, maar benodig meer tyd,” het die minister gesê.

/Goagoses se kontrak verstryk einde Maart, maar Mushelenge oorweeg om dit te verleng.

“Haar aanstelling maak vir ’n verlenging voorsiening indien nodig.

“Finale beraadslaging tussen die minister en sy verteenwoordiger is vir vandeesmaand geskeduleer, waartydens ’n besluit vir die toekoms geneem sal word, maar volgens vorige verslae is daar nog baie opruimwerk om te doen,” het Mushelenga gesê.