Reho sug van verligting

Denver Kisting



Rehobothers het selfs die Here gedank en geloof vir einde verlede week se verwikkelinge op hul dorp.

Hulle het hulle in groot getalle tot sosialemediaplatforms gewend om uiting te gee aan die sug van verligting wat hulle slaak oor die skorsing van hul dorpsraad.

Een Facebook-gebruiker sê in 'n bondige inskrywing: “God sluimer of slaap nie. Ons is meer as oorwinnaars.”

'n Ander gebruiker sê: “Uiteindelik gebeur iets positiefs. Hopelik gaan dit ontwikkeling voortbring op Rehoboth. Well done, minister. I just love you for this.”

Iemand anders voeg by: “Prys die Here. Dis hoog tyd,” en uit die pen van 'n ander: “Uiteindelik gebeur iets goeds; hoop, bid en vertrou dit bly iets goeds. Dankie, Jesus, al die lof en eer kom U toe.”

Dít kom nadat die splinternuwe minister van stedelike en landelike ontwikkeling, dr. Peya Mushelenga, Donderdagmiddag die hele raad van dié beleërde dorp die trekpas gegee het.

In die teenwoordigheid van polisielede, werknemers en enkele lede van die media is me. Christina Blaauw, die

burgemeester, en haar raadslede ingelig dat hul skorsing onmiddellik van krag is en reeds in die Staatskoerant gepubliseer is.

Blaauw het geweier om enige kommentaar te lewer terwyl sy inkopiesakke en stoelkussings uit die spogampsmotor, wat sy dadelik moes ontruim, na 'n ander voertuig toe gedra het.

Hiermee het Mushelenga sommer alle ander plaaslike owerhede die dood voor oë gesweer dat wangedrag nie langer geduld sal word nie.



Strafregtelike gevolge

Op 'n vraag oor of die geskorste Rehoboth-dorpsraadslede ook strafregtelik vervolg sal word, het hy Vrydag aan Republikein gesê: “In dié stadium is daar geen misdadige verslae wat raadslede direk raak nie, maar as daar mense is wat oor sulke inligting beskik, moet hulle na vore kom.”

Volgens Mushelenga kan die Rehoboth-saak só opgesom word: 'n geval van 'n raad wat misluk het om hul magte uit te voer en hul verantwoordelikhede na te kom soos die wet op plaaslike owerhede vereis.



Wanbestuur van geld

Hy het voorts gesê die dorp se ellende word gekenmerk deur wanbestuur en 'n gebrek aan verantwoordbaarheid wat openbare hulpbronne betref. Dit sluit geld wat inwoners aan die dorpsraad betaal en fondse van die sentrale regering in, sê hy.

Volgens hom het dié dorpsraad hulle deurlopend nie aan opdragte van die ministerie gesteur nie. Gevolglik, sê hy, het daar van regstellende maatreëls dadels gekom selfs toe die ministerie 'n taakspan vir langer as 'n maand daar ontplooi het om op die toneel raad en leiding te bied.



Nuwe tussentydse besem

Mushelenga het die afgetrede hoofstreeksbeampte van die Erongo­streek, me. Nathalia /Goagoses, aangestel om intussen namens hom na die belange van die dorp om te sien.

Terselfdertyd het hy die uitvoerende hoof, mnr. Christoph /Uirab, se skorsing opgehef.

/Uirab het by navraag gesê hy verwelkom die skuif en sien uit daarna dat korrupsie wortel en tak op Rehoboth uitgeroei word.

Kort voor Mushelenga se adjunk, mnr. Derek Klazen, se aankoms op die Hardap-dorp het 'n handjievol werknemers met vakbondleiers vergader om hul misnoë oor hul salarisse te kenne te gee.

Hulle sal na verwagting vandag besluit of hulle 'n optog gaan hou.

Klazen is deur die minister afgevaardig om Donderdag die boodskap te gaan oordra.