'Regering moenie met beesbemarking inmeng'

Kommunale boere sal ergste ly

10 August 2018 | Landbou
Ronelle Rademeyer



Beperkings van regeringskant in die lewende uitvoere van beeste kan rampspoedige gevolge vir die kommunale ­boerderygebiede in die ooste van die land hê, waarvandaan sowat 60% van dié speenkalwers kom.

Onsekerheid heers tans onder beesboere vanweë vrese dat die regering beperkings kan plaas op die getal speenkalwers wat na voerkrale in Suid-Afrika uitgevoer mag word.

Altesaam 230 797 beeste is van Januarie af tot die einde van Junie vanjaar bemark, waarvan 66%, of 152 326, lewend uitgevoer is. Verder is 18% (41 543) deur Meatco bemark en 16% (36 928) is by die B- en C-klas abattoirs in die land geslag.

Verlede jaar is 224 127 beeste in die ooreenstemmende tyd bemark. Dit is 3% minder as vanjaar. Dít blyk uit die jongste bemarkingstatistieke wat deur die Vleisraad van Namibië bekend gemaak is.

Mnr. Ramana Mutjavikua, voorsitter van die Otjozondjupa ­Kommunale Boere-unie (OCFU), het onlangs tydens 'n nuuskonferensie in Windhoek namens kommunale boere in dié streek, asook in die Omaheke­streek, gesê hulle is bekommerd oor die regering en die Namibië Nasionale Boere-unie (NNFU) se geluide oor uitvoerbeperkings.

“Hulle is aggressief besig om hulle vir groter waardetoevoeging in die speenkalfsektor te beywer en dit gaan ten koste van die produsente wees,” het hy later in 'n onderhoud aan ­Republikein gesê.

“Die kommunale boere in die ooste van Namibië is almal speenkalfprodusente. Verlede jaar is 310 000 beeste lewend uitgevoer en omtrent 200 000 daarvan was van ons afkomstig.”

Mutjavikua sê die boere wat hy ­verteenwoordig, verkoop hul speenkalwers by sogenaamde permitdae of by kommersiële veilings.

“Ons het nie die weiding om daardie beeste groot te maak en dan eers te bemark nie.” Hy sê as die regering hierdie kommunale boere kan help om hul plase te ontbos sodat die ­weidingstoestande verbeter, sal hulle nie nodig hê om soveel diere op 'n jong ouderdom reeds te bemark nie.

“Meatco is ook welkom om ons speenkalwers vir hul voerkrale te koop. Al die boere suid van die rooilyn is onderhewig aan die streng ­Europese verwagtinge. Meatco laat ons hieronder kniel; dan moet hulle mos vir ons baie beter pryse ook betaal,” sê Mutjavikua.

Mnr. Harald Marggraff, hoof van bedrywe by die Namibië Landbou-unie (NLU), sê kommersiële boere is ewe bekommerd oor moontlike inmenging deur die regering.

“Die Ooste is nie geskik om speenkalwers uit te groei tot slagosse nie. Weens die sanderige grond is daar nie krag in die weiding nie.

“Die ander probleem is dat dit nie ekonomies sin maak om slagosse te produseer nie. As die speenkalfprys 67% van die slagprys is, kan 'n boer daardie kalf nog uitgroei. Maar as dit styg na 80% van die slagprys, soos nou gebeur omdat Meatco se pryse nie byhou nie, kan boere dit nie bekostig nie,” verduidelik Marggraff.

Mnr. Hannes Visagie, 'n kleinveeprodusent van die Suide, sê die kleinveebemarkingskema wat die regering 14 jaar gelede vir die skaapbedryf ingestel het om binnelandse waardetoevoeging te verbeter en uitvoergetalle te beperk, was rampspoedig.

“Dit was alles behalwe in die beste belang van hierdie land. Die gemeenskap in die Suide bloei, want dit het ons laat verarm,” sê hy.

Intussen meen die Vleisraad die huidige afwaartse beweging in die pryse van speenkalwers gaan voortduur. Dit is aangesien meer speenkalwers in die Suid-Afrikaanse mark beskikbaar is.

Die laer pryse kan daartoe lei dat minder speenkalwers in die tweede helfte van die jaar uitgevoer word.

Soortgelyk

 

Windhoek se baas in die pad gesteek

17 ure gelede | Plaaslik

Denver Kisting – Windhoek se uitvoerende hoof, mnr. Robert Kahimise, is geskors.Republikein verneem dié skorsing sal vir minstens drie maande geld.Die wending kom te midde...

Swaar reën, oosweer kom dalk môre

18 ure gelede | Omgewing

Swaar reën word vir môre op plekke oor die sentrale noorde, die Kunene-, Erongo-, westelike Otjozondjupa- en Khomasstreek voorspel, terwyl oosweer na verwagting vanaf môre...

'Barbaarse' olifantjag skaad Namibië se beeld

1 dag gelede | Plaaslik

Denver Kisting Namibië is opnuut internasio­naal in die sop nadat 'n video oor 'n wrede olifantjag die ­afgelope week aan die lig gekom het.'n Storm...

Elite hervestig, sê ontevrede aansoekers

1 dag gelede | Plaaslik

Catherine Sasman - Redes vir die ministerie van grondhervorming se besluit om die plase Felseneck (nr. 26) en Okanatjikuma (nr. 26) aan die beslote korporasie...

Utoni hou voet by stuk oor Rus

1 dag gelede | Plaaslik

Ronelle Rademeyer Die minister van grondhervor­ming, mnr. Utoni Nujoma, het Vrydagmiddag aan joernaliste herhaal wat hy die vorige middag aan parlementariërs gesê het, naamlik dat...

Huurbeheer binne drie weke ingestel

1 dag gelede | Plaaslik

Augetto Graig - Die Regstellende Herposisioneringsbeweging (AR) sê hy het daarin geslaag om die regering tot die instel van huurbeheerrade te dwing.In huurordonnansie nommer 13...

Skole, koshuise is ‘kraamsale’

1 dag gelede | Onderwys

Henriette Lamprecht – Die enigste oplossing vir die terugbrenging van morele waardes en om tienerswangerskappe hok te slaan, is die herinstel van Bybelstudie by skole...

Streeksowerhede nou verantwoordelik vir waterverskaffing, sanitasie

1 dag gelede | Ministeries

Die ministerie van landbou, water en bosbou se waterverskaffing- en sanitasiekoördinasie-funksie sal voorts op streeksvlak hanteer word. Die funksies onder meer die identifisering van plekke...

Simataa bekommerd oor kubermisdaad

1 dag gelede | Ministeries

Denver Kisting – Die minister van inligting en kommunikasietegnologie, mnr. Stanley Simataa, sê die prys van tegnologie is aanlyn misdaad.Hy het verlede week in die...