Regering kan nie Erindi beskostig

Onderhandelinge duur voort

23 April 2019 | Plaaslik
Francoise Steynberg - Die regering het nie die geld om die private wildreservaat Erindi te koop nie.

Só het die minister van inligting en kommunikasietegnologie, mnr. Stanley Simataa, Donderdag tydens 'n nuuskonferensie oor kabinetsbesluite in die hoofstad gesê.

"Die regering het nie die finansiële hulpbronne om Erindi en die plase waaruit die private wildreservaat bestaan - Erindi Nr. 60, Constantia Nr. 58 en Ojimukaru Nr. 62 - te koop nie," het Simataa gesê.

"Die plase is nie geskik vir hervestiging nie en kan volgens die wet op hervorming van landbougrond (kommersieël) nie as 'n hervestigingsplaas gekoop word nie."

Volgens Simataa het die kabinet gelas die minister van grondhervorming moet in konsultasie met die prokureur-generaal in die beste belang van die regering 'n skikking buite die hof met die eienaars van Erindi onderhandel.

“Die reservaat is tans teen sowat N$2 miljard te koop, maar die Namibiese regering meen dit is N$265 miljoen werd,” het Simataa gesê.

Die regering wil 'n situasie vermy "waar eienaarskap van een buitelander na 'n ander buitelander oorgedra word en wil hê dit moet van buitelandse eienaars na Namibiërs gaan".

Simataa se aankondiging volg nadat die ministerie se regsverteenwoordigers Donderdag in die Windhoekse hoërhof aangedui het die partye gaan buite die hof skik en aan regter Thomas Masuku gesê het hulle sal voorts ‘n gesamentlike statusverslag by die hof indien, berig Elvira Hattingh.

Mnr. Paul Joubert, mede-eienaar van die spogreservaat van 65 000 hektaar in die Omaruru-distrik, het gister aan Republikein gesê "ons wag hierdie week vir die regering op finale uitsluitsel".

Hy wou geen verdere kommentaar lewer nie.

AGTERGROND

Erindi het in Oktober 2016 reeds regstappe teen die ministerie van grondhervorming gedoen en die hof gevra om die minister van grondhervorming te beveel om alle waardasieverslae te oorhandig waarop die minister staatmaak om ’n aanbod te maak om Erindi teen N$265 miljoen te koop.

Die maatskappy het ook die hof gevra om te verklaar dat die minister sy grondwetlike plig versuim het om billik, redelik en in ooreenstemming met die wet te handel toe hy die aanbod gemaak het om Erindi teen N$265 miljoen te koop.

Erindi wou ook hê die hof moet die minister beveel om die maatskappy van 'n goedkeuringsbrief te voorsien om Erindi aan 'n nie-Namibiese koper te kan verkoop.

In 'n aangepaste aansoek wat in Junie 2017 by die hoërhof ingedien is, wou Erindi hê die hof moet die minister se aanbod ter syde stel om die maatskappy teen N$265 miljoen te koop.

Erindi het ook aansoek gedoen om 'n hofbevel wat verklaar 'n geskrewe ooreenkoms bestaan waarvolgens die regering die maatskappy teen N$1,92 miljard gekoop het.

Alternatiewelik het die maatskappy 'n hofbevel versoek wat verklaar die minister het die maatskappy se aanbod om hom aan die regering te verkoop, van die hand gewys en dat Erindi nou 'n vrystellingsertifikaat het om die landbougrond in sy besit aan 'n private koper te verkoop.

Erindi wou ook hê die hof moet verklaar die reservaat is geregtig daarop om homself as 'n lopende saak te bemark en te verkoop - ook aan moontlike nie-Namibiese kopers.

Mnr. Sisa Namandje, Erindi se regsverteenwoordiger, het voorheen gerugte ontken dat Erindi aan Chinese verkoop gaan word.

Soortgelyk

 

Etosha Sondagmiddag deur aardbewing geskud

3 ure gelede | Omgewing

Ronelle Rademeyer - ’n Aardbewing van 4,7 op die Richterskaal het Sondag om 16:42 in die Etosha nasionale park voorgekom.Me. Gloria Simubali, adjunk uitvoerende direkteur...

Is groot Beethoven-feesjaar van die baan?

3 ure gelede | Kuns en vermaak

Groot feesvierings is wêreldwyd en veral in Duitsland en Oostenryk beplan ter herdenking van die komponis Ludwig van Beethoven se 250ste geboortejaar. Elretha Britz van...

Naam bekend van Namibiër wat in Engeland aan Covid-19...

4 ure gelede | Gesondheid

Ronelle Rademeyer - Die Namibiër wat Saterdag in Nottingham, Engeland, aan die coronavirussiekte (Covid-19) dood is, se naam is bekend gemaak.Hy is die 56-jarige mnr....

Paspoorte: Lorriedrywers kry voorkeur

4 ure gelede | Regering

Denver Kisting – Die ministerie van binnelandse sake, immigrasie, veiligheid en sekuriteit het by monde van sy woordvoerder, mnr. Sakeus Kadhikwa, ontken hulle reik tans...

Meer as 3 000 vir Covid-19 getoets

5 ure gelede | Gesondheid

Die adjunkminister van gesondheid en maatskaplike dienste me. Esther Muinjangue sê 3 186 weefselmonsters is tot op hede vir Covid-19 getoets. Namibië het tans 21...

Moody's-klap voor begroting

16 ure gelede | Regering

Jo-Maré Duddy – Op die vooraand van finansminister Iipumbu Shiimi se debuutbegroting sit die regering nie net kniediep in die rommel nie, maar verskraal sy...

Kwarantyn-drama ry lorriedrywers

16 ure gelede | Gesondheid

Leandrea Louw op Walvisbaai – Die vragmotorbestuurder wat die afgelope naweek positief vir Covid-19 getoets het, sê sy voormalige werkgewer het hom en sy kollega...

Man voor hof ná 'hardhandigheid'

16 ure gelede | Misdaad

Denver Kisting – 'n Inwoner van Groot Aub, mnr. Richard Davids, wat aanvoer 'n beampte van die stadspolisie het hom verlede week aangerand, is Vrydag...

Weer, Dinsdag 26 Mei 2020

16 ure gelede | Weer

WEERWAAK: Koue tot baie koue toestande word in die Suide, die Weste en oor die Khomas- en Omahekestreek verwag. Tref voorsorg.BINNELAND: Gedeeltelik bewolk en koud...