ReconAfrica kap terug

Maatskappy doen 'noodsaaklike werk in Namibië'

27 May 2021 | Omgewing
Die Kanadese olie- en gasmaat­skappy Reconnaissance Energy Africa (ReconAfrica) het in 'n mediaverklaring gereageer op 'n “valse en lasterlike” artikel wat op 21 Mei in National Geographic gepubliseer is.

Dié wetenskap- en omgewingstydskrif het Vrydag berig dat ­ReconAfrica, “wat op soek is na olie en gas stroomop van een van Afrika se weligste en mees wildryke habitats, het beleggers volgens verskeie kenners asook die verslag van 'n fluitjieblaser deur 'n wanvoorstelling van sy werk op dié projek, op 'n bedrieglike wyse mislei”.

In die artikel word berig die fluitjieblaser het op 5 Mei 'n verslag van 44 bladsye hieroor aan die Amerikaanse Securities and Exchange ­Commission (SEC) voorgelê.

In die mediaverklaring kap ReconAfrica terug en verskaf ­besonderhede oor die maatskappy se “noodsaaklike werk in Namibië”.

“Ons is trots dat die Namibiese rege­ring ReconAfrica gekies het as een van die energiemaatskappye wat hy vertrou om die land se natuurlike hulpbronpotensiaal op volhoubare maniere te ondersoek. In die soektog na die beste pad vorentoe om die land se energie-tekort te ondersoek, oorweeg die regering verskeie oplossings, waar onder olie- en gaseksplorasie, geotermiese en biomassa-waarnemings, sowel as alternatiewe vir wind- en sonkrag. Alhoewel ons besef dat bekommernisse bestaan oor die impak van ReconAfrica se projek in Namibië, wil ons graag 'n paar feite uitwys voor die projek veroordeel word,” lui die verklaring.

Die eerste is dat ReconAfrica die wettige verpligtinge binne alle werksgebiede gehoorsaam.

Tweedens sê die maatskappy hulle maak in elke aspek van die projek gebruik van Kanadese praktyke en tegnologieë, veral wat die ondersoek en ontwikkeling van ­hulpbronne en omgewings-, maatskaplike en korpo­ratiewe bestuur (ESG)-praktyke betref, en word algemeen as een van die beste ter wêreld beskou.

Hulle voer aan dat ReconAfrica se werk in Namibië plaasvind onder die deurlopende toesig van verteenwoordigers van verskeie ministeries en regu­lerende agentskappe in Namibië.



'VALSE AANTYGINGS'

“Die artikel beskryf 'n klag wat na ­bewering op 5 Mei 2021 by die SEC ingedien is. ReconAfrica dra geen kennis van so 'n klag nie en 'n versoek wat aan National Geographic gerig is vir 'n afskrif, het onbeantwoord gebly,” luidens die verklaring.

Volgens ReconAfrica is dit belangrik om te weet dat enigiemand 'n klag by die SEC kan indien, aangesien daar “geen standaarde of vereistes vir ­akkuraatheid of waarheid vir hierdie aantygings is nie”.

Die maatskappy het ook gereageer op spesifieke aantygings wat in die artikel geopper is.

Die maatskappy hou voet by stuk dat hy elke aspek van sy finansiering deursigtig en wettig onderneem het, in ooreenstemming met toepaslike finansiële wetgewing.

Alle aandele-transaksies deur beamp­tes en direkteure van ReconAfrica word openbaar gemaak en voldoen aan die indiening- en openbaarmakingsbeleid van finansiële ­reguleerders, lui die verklaring .

Op 15 April 2021 het ReconAfrica aangekondig dat geologiese ontleding en olie-eksplorasie duidelike bewyse lewer van 'n aktiewe ­konvensionele petroleumstelsel met veelvuldige brongesteente en reservoir-intervalle in die Kavango-Oosstreek.

Dit is bevestig deur partye wat as leiers op hierdie gebied erken word. ReconAfrica gaan voort met sy ­beplande seismiese en multi-boorprogramme om kommersiële hoeveelhede olie en gas te bevestig.

Die maatskappy se lisensie is glo vir konvensionele vroeë eksplorasiewerk in Kavango-Oos.

“Daar is geen lisensie vir hidrobreking nie, en geen aansoek is ook ingedien nie. Die huidige ­bedrywighede is ook meer as 50 km suid van die ­Kavangorivier en 260 km wes van die Okavangodelta.”

Volgens die verklaring is die artikel 'n “persoonlike en onregverdige aanval” op mnr. Craig Steinke, die stigter van ReconAfrica (Namibia). Die transaksie tussen Renaissance Oil en ReconAfrica met betrekking tot die Botswana-lisensie is deur die TSX Venture-beurs aanvaar en onder­steun deur 'n onafhanklik voorbereide bewys van waarde.

“Pleks daarvan om te berig oor die werklike feite oor die belangrike werk wat ReconAfrica in Namibië doen, het National Geographic gehaas om 'n vals en lasterlike artikel te publiseer en doelgerig inligting uitgelaat wat ­ReconAfrica bereid was om te verskaf. Hulle het ook geswyg oor 'n ­anonieme bron wat glo 'n SEC-klag ingedien het. Dit het alles plaasgevind ­onmiddellik nadat die waarde van ReconAfrica se aandele aansienlik gestyg het. Die tydskrif het hierdie kortverkopers in staat gestel om moontlik ten koste van die Namibiese bevolking en beleggers hierby te baat.

“Hierdie taktieke en smeerveldtogte wat kortverkopers in staat stel om wins te maak sonder regverdiging of nagevolge, is vernietigend vir die waarde van aandeelhouers en doen skade aan die beeld van ­gereguleerde kapitaalmarkte.”



'BOU AAN NAMIBIë SE TOEKOMS'

ReconAfrica glo die natuurlike hulpbronbedryf in Namibië kan op 'n omgewings- en maatskaplik verantwoordelike wyse ontwikkel word, en die ontwikkeling en lewering van broodnodige ekonomiese en maatskaplike voordele ondersteun en terselfdertyd beleggings in plaaslike ekologiese bewaring finansier.

“Uiteindelik sal die Namibiese bevolking, deur middel van hul tradisio­nele owerhede, verkose regerings en regulerende agentskappe, bepaal hoe die land sy natuurlike hulpbronne sal bestuur.

“Die maatskappy volg al die bepalings wat vereis word onder die Namibiese regering se omgewingsklaringsertifikaat, wat self volledig voldoen aan die bepalings van die wet op omgewingsbestuur.

“Dit is ook die praktyk van ReconAfrica om bykomende omgewings- en maatskaplike monitering en ontledings van elke terrein en ­uitgebreide omliggende gebiede uit te voer.”

[email protected]

Soortgelyk

 

Profeet TB Joshua sterf

4 ure gelede | Mense

Die bekende evangelis en filantroop, past. Temitope Balogun (TB) Joshua, is dood.Is het Saterdagaand, 'n week voor sy 58ste verjaardag, in Lagos, Nigerië gesterf, berig...

Polisieman in Kuisebmond doodgesteek

13 ure gelede | Misdaad

'n Konstabel wat by die polisiekantoor in Kuisebmond diens doen, is in die vroeë oggendure Saterdag dood nadat hy naby sy meisie se huis deur...

Ses sterftes stoot syfer oor 900, 480 nuwe gevalle

20 ure gelede | Gesondheid

Ses nuwe sterftes stoot die totale syfer vir Namibië oor die 900-kerf tot 905. Die sterftes is vier in Windhoek en een elk in Outjo...

Covid-19: Gevalle styg in 24 uit 35 distrikte

1 dag gelede | Gesondheid

Namibië bly in die kloue van ‘n nuwe brander Covid-19-infeksies.Gedurende die sewe dae tot Donderdag het nuwe gevalle in 24 van die land se 35...

22 sterftes, 596 nuwe gevalle

1 dag gelede | Gesondheid

Die Covid-19-verwante sterftesyfer vir Namibië skiet met nog 22 - 12 in Windhoek, twee in onderskeidelik Rehoboth en Walvisbaai, drie in Mariental en een elk...

Rehoboth soek strenger aandklok-monitering teen Covid

2 dae gelede | Gesondheid

Die United People's Movement (UPM) het die streeksbevelvoerder van die polisie in die Hardapstreek, komm. Andries van der Byl, gevra vir polisieversterkings op Rehoboth sodat...

Beesvleisforum vorder met abattoirplan

2 dae gelede | Landbou

Ronelle Rademeyer – ’n Groep bekommerde beesprodusente wat ten alle koste Namibië se nismarkte in die buiteland vir die voortbestaan van dié bedryf wil beskerm,...

Avonturier verdrink byna tydens riviervaart

2 dae gelede | Mense

Ronelle Rademeyer – ’n Suid-Afrikaanse avonturier wat verlede week ná 55 dae en 2 200 km in sy geel roeiboot die Oranjerivier se monding by...

Harmse on unlimiting the future

2 dae gelede | Mense

Barney Harmse was born in Mafikeng in South Africa in 1970 and his family moved to Namibia when he was just four years old. From...