Rassie sê peil gee deurslag in sy spankeuse

Tinus van Staden - 'n Nuwe geslag Springbokke sal Saterdag die Bok-era van Rassie Erasmus, Springbok-afrigter, in Washington DC, Amerika, in die toets teen Wallis inlui.

Erasmus se eerste 23-tal sluit 13 spelers sonder toetservaring in en die gesamentlike ondervinding in dié span is slegs 159 toetse.

Tog is Erasmus opgewonde om te sien wat sy jong Turke kan vermag en hy is daarvan oortuig dat dié groep Bokke die taak met onderskeiding kan verrig.

“Ek het elke week 'n span gekies ná aanleiding van die spelers se vertonings in die Superrugby-reeks. Dit het aanvanklik baie verander, maar die laaste paar weke het dit grotendeels dieselfde gebly.

“Daar was uiteraard 'n paar beserings, so ons moes 'n paar veranderinge maak. Ek is steeds oortuig dat dié span 'n baie goeie een is. As afrigters is ons baie opgewonde dat van ons beste jong spelers 'n geleentheid op toetsvlak gaan kry,” het Erasmus gister tydens sy spanaankondiging in Johannesburg gesê.

Sewe spelers in die beginspan sal hul eerste treë in toetsrugby gee. Voorlangs sal die loskopstut, Ox Nche, die slot Jason Jenkins en die oopkantflank, Kwagga Smith, elk hul toetsbuiging maak.

Agterlangs is daar vier debutante – die skrumskakel, Ivan van Zyl, die vleuels Travis Ismaiel en Makazole Mapimpi en die binnesenter, André Esterhuizen.

Skrumskakel is een posisie waar Suid-Afrika nie baie ervaring het nie, maar Erasmus glo die potensiaal is wel daar.

“Wat ervaring betref, kan ons 'n probleem op skrumskakel hê, maar nie wat potensiaal en talent betref nie. Ons kan die ouens ook ervaring laat opdoen deur bestendig te wees wat spankeuses betref van nou af.

“Dit help dat Faf de Klerk terug is om daardie ervaring te bied. Embrose Papier (wat Saterdag op die bank sit) is iemand wat ons van nou af kan gebruik tot by die Wêreldbeker-toernooi in 2023 en selfs daarna. Ivan het goed vertoon vandat hy sy Superrugby-buiging gemaak het. Cameron Wright is ook nog daar,” sê Erasmus.

Die breier glo hy het sy visie na wense met die spelers gedeel en dat hulle mekaar op die veld sal vind.

“Ons het deur die jaar baie inligting aan die ouens verskaf, om hulle op dieselfde golflengte te kry en dat hulle duidelikheid kry oor ons planne. Dié week was almal op die veld. Ons moet seker maak die ouens dink dieselfde,” sê Erasmus.

Die Bok-bestuur het juis besluit om eers gister, en nie vroeër in die week nie, na Washington te reis sodat die hele groep van 43 spelers saam kon oefen.

Erasmus het ook benadruk dat plekke in die 23-tal vir volgende week se eerste toets teen Engeland, steeds op die spel is.

“Daar gaan beslis tussen sewe en tien spelers uit dié groep gekies word vir die span wat volgende week teen Engeland speel.”

Hy meen Wallis gaan 'n gedugte teenstander wees.

“Wallis se taktiese skopwerk is baie goed, daar is goeie samespel deur hul voorspelers en hulle is ook goed in die vaste fasette. Ek dink egter ons het 'n groep gekies wat sterk sal kan meeding,” sê Erasmus.

Die Springbok-span: Curwin Bosch, Travis Ismaiel, Jesse Kriel, André Esterhuizen, Makazole Mapimpi, Elton Jantjies, Ivan van Zyl, Dan du Preez, Oupa Mohoje, Kwagga Smith, Pieter-Steph du Toit (kapt), Jason Jenkins, Wilco Louw, Chiliboy Ralepelle, Ox Nche.

Reserwes: Akker van der Merwe, Steven Kitshoff, Thomas du Toit, Marvin Orie, Sikhumbuzo Notshe, Embrose Papier, Robert du Preez, Warrick Gelant. – Netwerk24