Program vir grondgesprek bekend gemaak
Talle kwessies en knelpunte gaan by die tweede nasionale grondkonferensie aandag geniet.
Augetto Graig
Die tweede nasionale grondkonferensie is om die draai.
As alles volgens plan verloop, sal dit van 1 tot 5 Oktober by die Safari Hotel en Konferensiesentrum in Windhoek plaasvind.
Die minister van grondhervorming, mnr. Utoni Nujoma, sê ná 27 jaar se toepassing van die 27 resolusies waarop ooreengekom is tydens 1991 se nasionale grondkonferensie, het sy ministerie besluit “dit is belangrik om te herbeplan, te beraadslaag, en die Namibiese nasie 'n platform vir bespreking te bied” om by te dra tot die rigting wat die grondhervormingsproses moet inslaan.
'n Beroep word op alle belanghebbendes gedoen om die vordering wat gemaak word en die uitdagings wat ervaar word in ag te neem, en om by voorstelle te hou sodat die grondhervormingsprogram bespoedig kan word.
Republikein het die voorgestelde program vir dié geskiedkundige byeenkoms onder oë gehad.
Hiervolgens sal verrigtinge op Maandag 1 Oktober om 08:00 afskop met die aankoms van verskeie nasionale leiers, wat president Hage Geingob insluit.
Om 09:00 sal die goewerneur van die Khomasstreek, me. Laura Mcleod-Katjirua, deelnemers aan die konferensie in die hoofstad en die Khomasstreek verwelkom.
Daarna sal verteenwoordigers van plaaslike nieregeringsorganisasies, oorlogveterane, tradisionele hoofde, opposisiepartye en die heersende Swapo-party se sekretaris-generaal, me. Sophia Shaningwa, spreekbeurte geniet.
Die visepresident, mnr. Nangolo Mbumba, en die president sal die teenwoordiges hierná toespreek. Ná middagete sal die eerste minister, me. Saara Kuugongelwa-Amadhila, die voorsitterskap behartig en Nujoma die geleentheid bied om terugvoer oor die vordering met die toepassing van 1991 se besluite te gee.
lang lys kwessies
Kort voor 16:00 sal elke streek vyf minute gegun word om insette te lewer.
Dít volg op beraadslaging wat in Julie in 14 streke van die land plaasgevind het.
Die ministerie van grondhervorming se webwerf bevat verslae oor vorige besprekings en ook 'n omvattende verslag oor die bevindinge.
Hierin is 'n lys kwessies met betrekking tot 1991 se besluite en voornemens geïdentifiseer. Die lys sluit in voorvaderlike grondeise, die gewillige koper en verkoper-beginsel van toepassing op landbougrond, die nasionale hervestigingsprogram, en hervestigingskriteria en onteiening van landbougrond met regverdige vergoeding.
Die lys sluit ook die kwessie van plase in buitelandse besit in, asook ongebruikte plase, afwesige eienaars, grondbelasting en die grootte en hoeveelheid plase in die land.
Nog kwessies onder die loep is die stedelike grondhervormingsprogram, die verwydering van die veterinêre kordonheining (Rooilyn), grondwaardering en prysbepaling, ondersteuning vóór en ná hervestiging, die regstellende aksie-leningskema, toegang tot grond vir vroue en die jeug, en kommersiële banke se benadering tot kommunale grond.
Nuwe kwessies wat sedert 1991 aan die lig gekom het, sluit in die tegniese komitee op kommersiële landbougrond, die posisie van plaaswerkers, die rol van kommunale grond in die toekoms, toegang tot kommunale grond, benadeelde gemeenskappe, natuurbewaring teenoor boere se regte, betaling vir grond, grondtoekenning en -administrasie, asook gesamentlike weidingsregte.
Die grootskaalse verskuiwing van boere uit kommunale grondgebied, kleinboere se toegang tot kommunale grond, nieregeringsorganisasies en koöperasies sal ook bespreek word.
Nóg kwessies sluit in grensgeskille tussen tradisionele owerhede, 'n nasionale referendum oor die Grondwet, grondlewering en voorkeur aan plaaslike streekinwoners in die hervestigingsproses.
Inheemse groepe eis toelating tot nasionale parke as woongebiede, dat natuurlike hulpbronne soos grond genasionaliseer word, en dat die Etosha Nasionale Park verklein moet word.
Die tweede dag van die konferensie sal voorleggings van verskeie ministeries behels, asook insette van Agribank, nasionale vakbonde en akademici van Namibië en Suid-Afrika.
Die Verenigde Nasies (VN) se ekonomiese kommissie vir Afrika, en sy kos- en landbouorganisasie sal ook bydraes lewer.
Zimbabwiese regeringsbeamptes is ook genooi om gedagtes oor ondersteuning aan hervestigde boere te deel.
Van dag drie af sal wegbreeksessies gehou word waartydens vyf verskillende groepe spesifieke kwessies sal pak.
Dit sluit in landbouhervorming, grondbestuur, verblyfregsekerheid, stedelike grondhervorming, grondbelasting en die waardasiestelsel, asook grondgebruik, produktiwiteit en omgewingsvolhoubaarheid.
President Geingob sal op Vrydag 5 Oktober ná die aanneem van dié konferensie se resolusies die geleentheid amptelik afsluit.
Die tweede nasionale grondkonferensie is om die draai.
As alles volgens plan verloop, sal dit van 1 tot 5 Oktober by die Safari Hotel en Konferensiesentrum in Windhoek plaasvind.
Die minister van grondhervorming, mnr. Utoni Nujoma, sê ná 27 jaar se toepassing van die 27 resolusies waarop ooreengekom is tydens 1991 se nasionale grondkonferensie, het sy ministerie besluit “dit is belangrik om te herbeplan, te beraadslaag, en die Namibiese nasie 'n platform vir bespreking te bied” om by te dra tot die rigting wat die grondhervormingsproses moet inslaan.
'n Beroep word op alle belanghebbendes gedoen om die vordering wat gemaak word en die uitdagings wat ervaar word in ag te neem, en om by voorstelle te hou sodat die grondhervormingsprogram bespoedig kan word.
Republikein het die voorgestelde program vir dié geskiedkundige byeenkoms onder oë gehad.
Hiervolgens sal verrigtinge op Maandag 1 Oktober om 08:00 afskop met die aankoms van verskeie nasionale leiers, wat president Hage Geingob insluit.
Om 09:00 sal die goewerneur van die Khomasstreek, me. Laura Mcleod-Katjirua, deelnemers aan die konferensie in die hoofstad en die Khomasstreek verwelkom.
Daarna sal verteenwoordigers van plaaslike nieregeringsorganisasies, oorlogveterane, tradisionele hoofde, opposisiepartye en die heersende Swapo-party se sekretaris-generaal, me. Sophia Shaningwa, spreekbeurte geniet.
Die visepresident, mnr. Nangolo Mbumba, en die president sal die teenwoordiges hierná toespreek. Ná middagete sal die eerste minister, me. Saara Kuugongelwa-Amadhila, die voorsitterskap behartig en Nujoma die geleentheid bied om terugvoer oor die vordering met die toepassing van 1991 se besluite te gee.
lang lys kwessies
Kort voor 16:00 sal elke streek vyf minute gegun word om insette te lewer.
Dít volg op beraadslaging wat in Julie in 14 streke van die land plaasgevind het.
Die ministerie van grondhervorming se webwerf bevat verslae oor vorige besprekings en ook 'n omvattende verslag oor die bevindinge.
Hierin is 'n lys kwessies met betrekking tot 1991 se besluite en voornemens geïdentifiseer. Die lys sluit in voorvaderlike grondeise, die gewillige koper en verkoper-beginsel van toepassing op landbougrond, die nasionale hervestigingsprogram, en hervestigingskriteria en onteiening van landbougrond met regverdige vergoeding.
Die lys sluit ook die kwessie van plase in buitelandse besit in, asook ongebruikte plase, afwesige eienaars, grondbelasting en die grootte en hoeveelheid plase in die land.
Nog kwessies onder die loep is die stedelike grondhervormingsprogram, die verwydering van die veterinêre kordonheining (Rooilyn), grondwaardering en prysbepaling, ondersteuning vóór en ná hervestiging, die regstellende aksie-leningskema, toegang tot grond vir vroue en die jeug, en kommersiële banke se benadering tot kommunale grond.
Nuwe kwessies wat sedert 1991 aan die lig gekom het, sluit in die tegniese komitee op kommersiële landbougrond, die posisie van plaaswerkers, die rol van kommunale grond in die toekoms, toegang tot kommunale grond, benadeelde gemeenskappe, natuurbewaring teenoor boere se regte, betaling vir grond, grondtoekenning en -administrasie, asook gesamentlike weidingsregte.
Die grootskaalse verskuiwing van boere uit kommunale grondgebied, kleinboere se toegang tot kommunale grond, nieregeringsorganisasies en koöperasies sal ook bespreek word.
Nóg kwessies sluit in grensgeskille tussen tradisionele owerhede, 'n nasionale referendum oor die Grondwet, grondlewering en voorkeur aan plaaslike streekinwoners in die hervestigingsproses.
Inheemse groepe eis toelating tot nasionale parke as woongebiede, dat natuurlike hulpbronne soos grond genasionaliseer word, en dat die Etosha Nasionale Park verklein moet word.
Die tweede dag van die konferensie sal voorleggings van verskeie ministeries behels, asook insette van Agribank, nasionale vakbonde en akademici van Namibië en Suid-Afrika.
Die Verenigde Nasies (VN) se ekonomiese kommissie vir Afrika, en sy kos- en landbouorganisasie sal ook bydraes lewer.
Zimbabwiese regeringsbeamptes is ook genooi om gedagtes oor ondersteuning aan hervestigde boere te deel.
Van dag drie af sal wegbreeksessies gehou word waartydens vyf verskillende groepe spesifieke kwessies sal pak.
Dit sluit in landbouhervorming, grondbestuur, verblyfregsekerheid, stedelike grondhervorming, grondbelasting en die waardasiestelsel, asook grondgebruik, produktiwiteit en omgewingsvolhoubaarheid.
President Geingob sal op Vrydag 5 Oktober ná die aanneem van dié konferensie se resolusies die geleentheid amptelik afsluit.
Kommentaar
Republikein
Geen kommentaar is op hierdie artikel gelaat nie