Polisie stop Namvet-optogte

Catherine Sasman - Die Namibië Oorlogveterane-trust (Namvet) het sy beplande optog Maandag na die parlement en Staatshuis afgelas, maar het belowe om dit binne die volgende sewe dae te doen, met of sonder polisieklaring.

Die voorsitter van Namvet, mnr. Jabulani Ndeunyema, sê die groep wil na Staatshuis opmarsjeer om pres. Hage Geingob persoonlik te ontmoet.

Ndeunyema sê Namvet het die besluit geneem nadat die voormalige visepresident, dr. Nickey Iyambo, na bewering die oudsoldate “moordmasjiene” genoem het.

“Was dit pres. Geingob se boodskap aan ons deur dr. Iyambo?” wou Ndeunyema weet.

“As ons in die Namibiese huis is, moet daar iets vir ons op die tafel wees of pres. Geingob moet vir ons sê ons is nie welkom nie.”

Die hoof van die polisie, inspekteur-generaal Sebastian Ndeitunga, het in die loop van die afgelope paar weke aan Namvet geskryf en verduidelik hoekom die groep nie ‘n optog kan hou nie.

Op 13 Februarie is hulle nie toegelaat nie omdat die parlementsopening plaasgevind het.

Hulle is ook meegedeel dat hul beplande optog na Staatshuis op 14 Februarie “onder geen omstandighede” toegelaat sou word nie vanweë die “veiligheidsbedreiging vir so ‘n hoë kantoor”.

Ndeitunga het voorts gesê ‘n optog na die Evangeliese Lutherse Kerk sou onderhewig aan die kerk se toestemming wees om ‘n petisie in ontvangs te neem.

Die polisiehoof het geskryf dat hierdie optogte ernstige bedreigings vir openbare vrede inhou.

Op 17 Februarie het Ndeitunga geskryf die optog van 19 Februarie word nie toegelaat nie, omdat Geingob nie ingestem het om die oudsoldate te ontmoet nie.

Ndeitunga sê egter die oudsoldate sal toegelaat word om in die oop ruimte tussen Maerua Mall en die Windhoek-skouterrein op te marsjeer, indien Staatshuis sou instem om hulle te ontmoet. Die voorwaardes is dat hulle geen van die volgende dra nie: Wapens, waaronder knopkieries; plakkate of pamflette wat haatspraak aanhits; en enige materiaal wat “redelikerwys geweld teen enigiemand aanstig”.

Ndeitunga sê voorts geen organiseerder mag openbare uitsprake maak wat die gesag van die Namibiese regering ondermyn nie.

Ndeunyema sê nadat die laaste brief Vrydag van Ndeitunga ontvang is, het hy ‘n video op WhatsApp van ‘n “hooggeplaaste regeringsbeampte” gekry van PLAN-vegters wat op 1 April 1989 binne die land se grense doodgemaak is.

“Wou hierdie persoon (die regeringsbeampte) my herinner dat ek vir voordele vra terwyl ons mense doodgemaak het? Wat daarvan as ek foto’s van Geoffrey Mwilima of Lubango-oorlewendes uitstuur? Hulle vergeet dat voormalige SWAGM-/Koevoetlede eerstens Namibiërs is,” het Ndeunyema gesê.

Hy sê die Namibiese polisie en weermag, asook die staatsveiligheidsdepartement het byna elke week sedert Desember met Namvet vergader.

“Ons kwessie het niks met die polisie of die weermag te doen nie. Ons kwessie het met politici te doen. Ons wil die politici ontmoet.”

Ndeunyema sê Namvet sal volgende week voortgaan met hul optog na Staatshuis, met of sonder toestemming van die polisie.

“Ons het reeds met inspekteur-generaal Ndeitunga beraadslaag, maar ons wil nie pres. Geingob in die bos ontmoet nie.” Volgens hom versoek hulle bloot ‘n ontmoeting met Geingob.

“Ndeitunga sal ons probeer keer om na Staatshuis te gaan. As hy dit doen, en as enige een van ons doodgemaak of geslaan word of tronk toe gaan, sal ons bloed die aangesig van Namibië verander. Dit sal aanleiding gee tot die Namibiese Lente, want as jy my doodmaak, sal my kinders kom,” het Ndeunyema gesê.

Hy sê wel die oudsoldate sal in vrede opmarsjeer en geen wapens by hulle hê nie.