Passiemoordenaar kry lewenslank
'n Man wat vier jaar gelede sy minnares met 'n byl en panga doodgekap het – vóór hul driejarige dogtertjie – is lewenslange tronkstraf opgelê.
Denver Kisting
Die 32-jarige Lukas Kasimeya, wat vier jaar gelede sy lewensmaat se kop, gesig en kopbeen op “die mees gewelddadige, brutale en barbaarse manier verwoes het”, is Vrydag lewenslange tronkstraf opgelê.
Toe Regter Herman January die vonnis einde verlede week voorlees, het hy gesê Kasimeya het op 'n ongrondwetlike manier die ma van sy kind se lewe weggeneem – “die persoon wat jy veronderstel was om te beskerm en lief te hê”.
Regter January het voorts gesê: “Ek bevind dit is 'n passiemoord weens jaloesie.”
Die moord, wat tydens Februarie 2014 gepleeg is, het by die Etilyasa-nedersetting in die Outapi-distrik plaasgevind.
In 'n bekentenis wat Kasimeya in Januarie by die hoërhof op Oshakati ingedien het, erken hy hy het die oorledene, me. Helena Shivute, 'n onbekende aantal kere met 'n byl toegetakel.
“Ek weet nie hoeveel kere nie omdat ek vroeër alkohol gedrink het.
”Ek het haar ook met 'n panga gekap, maar ek kan nie onthou watter deel van die liggaam nie. Ek voel aaklig oor my dade. Ek voel sleg omdat die oorledene nie meer daar is nie.”
Dié grumoord het ten aanskoue van die paartjie se driejarige dogtertjie plaasgevind. Nadat haar ma deur pa doodgekap is en haar pa op die vlug geslaan het, moes die dogtertjie om hulp gaan roep.
Volgens sy eie bekentenis het Kasimeya en sy meisie voor die voorval ses bottels bier van 750 ml elk én tradisionele drankies gedrink.
Hulle het in daardie stadium 'n langafstandverhouding gehad en Kasimeya het by Shivute en hul dogtertjie gaan kuier.
Hy het haar glo tydens die kuier daarvan beskuldig dat sy veelvoudige seksuele verhoudings met ander mans aangeknoop het.
Hy het haar reeds tydens die drinksessie by die kroeg met aanranding gedreig.
Hierná het hulle saam met die peuter huiswaarts gekeer.
“Ek het die kind gedra terwyl ons huis toe geloop het.”
Met hul aankoms tuis het Kasimeya verkies om buite hul wooneenheid te sit.
Volgens hom het die oorledene die dogtertjie saam in die huisie geneem en die deur gesluit.
“Ek het hulle gesmeek om die deur oop te maak, aangesien ek wou slaap.”
Toe Shivute uiteindelik die deur vir hom oopmaak, het sy glo op hom gevloek.
Hy het toe, volgens sy eie vertelling, die slaapkamer verlaat, na die tradisionele kombuis gestap en daar die panga en byl gaan haal.
“Ek wou die oorledene met die byl sny. Toe ek terugkeer na die kamer, het ek haar met die byl begin kap.”
Tydens die psigiatriese evaluering is vasgestel Kasimeya het ten tye van die voorval besef wat hy doen, is verkeerd en dat hy aan geen geestesongesteldheid gely het nie en geskik was om verhoor te word.
Ter strafversagting is getuig Kasimeya is aan geen vorige oortredings skuldig bevind nie, het verskoning gevra vir die misdaad, toon berou en was vier jaar verhoorafwagtend.
Hy het ná die moord op die vlug geslaan en is eers sowat vier weke later aangekeer.
Regter January het Dinsdag gesê: “Die erns van die misdaad, die omstandighede waaronder dit gepleeg is en die belange van die samelewing is myns insiens van só 'n aard dat daar aan die persoonlike omstandighede van die beskuldigde minder gewig geheg behoort te word.”
Volgens regter January het Kasimeya waarskynlik geen ander keuse gehad as om skuldig te pleit nie.
“Sy gedrag ná die misdaad dui nie op iemand wat berou getoon het nie.
“Hy het vir sowat 'n maand die geleentheid gehad om die naasbestaandes van die oorledene om verskoning te vra of homself aan die polisie oor te gee om duidelik berou te toon. Dít het hy nie gedoen nie.”
Regter January het voorts gesê hy is terdeë bewus van die doelwitte van 'n vonnis – naamlik voorkoming, vergelding, hervorming en om as afskrikmiddel te dien.
Desondanks verdien dié misdaad wat hom betref “die ergste vonnis in hierdie hof se diskresie”.
Die 32-jarige Lukas Kasimeya, wat vier jaar gelede sy lewensmaat se kop, gesig en kopbeen op “die mees gewelddadige, brutale en barbaarse manier verwoes het”, is Vrydag lewenslange tronkstraf opgelê.
Toe Regter Herman January die vonnis einde verlede week voorlees, het hy gesê Kasimeya het op 'n ongrondwetlike manier die ma van sy kind se lewe weggeneem – “die persoon wat jy veronderstel was om te beskerm en lief te hê”.
Regter January het voorts gesê: “Ek bevind dit is 'n passiemoord weens jaloesie.”
Die moord, wat tydens Februarie 2014 gepleeg is, het by die Etilyasa-nedersetting in die Outapi-distrik plaasgevind.
In 'n bekentenis wat Kasimeya in Januarie by die hoërhof op Oshakati ingedien het, erken hy hy het die oorledene, me. Helena Shivute, 'n onbekende aantal kere met 'n byl toegetakel.
“Ek weet nie hoeveel kere nie omdat ek vroeër alkohol gedrink het.
”Ek het haar ook met 'n panga gekap, maar ek kan nie onthou watter deel van die liggaam nie. Ek voel aaklig oor my dade. Ek voel sleg omdat die oorledene nie meer daar is nie.”
Dié grumoord het ten aanskoue van die paartjie se driejarige dogtertjie plaasgevind. Nadat haar ma deur pa doodgekap is en haar pa op die vlug geslaan het, moes die dogtertjie om hulp gaan roep.
Volgens sy eie bekentenis het Kasimeya en sy meisie voor die voorval ses bottels bier van 750 ml elk én tradisionele drankies gedrink.
Hulle het in daardie stadium 'n langafstandverhouding gehad en Kasimeya het by Shivute en hul dogtertjie gaan kuier.
Hy het haar glo tydens die kuier daarvan beskuldig dat sy veelvoudige seksuele verhoudings met ander mans aangeknoop het.
Hy het haar reeds tydens die drinksessie by die kroeg met aanranding gedreig.
Hierná het hulle saam met die peuter huiswaarts gekeer.
“Ek het die kind gedra terwyl ons huis toe geloop het.”
Met hul aankoms tuis het Kasimeya verkies om buite hul wooneenheid te sit.
Volgens hom het die oorledene die dogtertjie saam in die huisie geneem en die deur gesluit.
“Ek het hulle gesmeek om die deur oop te maak, aangesien ek wou slaap.”
Toe Shivute uiteindelik die deur vir hom oopmaak, het sy glo op hom gevloek.
Hy het toe, volgens sy eie vertelling, die slaapkamer verlaat, na die tradisionele kombuis gestap en daar die panga en byl gaan haal.
“Ek wou die oorledene met die byl sny. Toe ek terugkeer na die kamer, het ek haar met die byl begin kap.”
Tydens die psigiatriese evaluering is vasgestel Kasimeya het ten tye van die voorval besef wat hy doen, is verkeerd en dat hy aan geen geestesongesteldheid gely het nie en geskik was om verhoor te word.
Ter strafversagting is getuig Kasimeya is aan geen vorige oortredings skuldig bevind nie, het verskoning gevra vir die misdaad, toon berou en was vier jaar verhoorafwagtend.
Hy het ná die moord op die vlug geslaan en is eers sowat vier weke later aangekeer.
Regter January het Dinsdag gesê: “Die erns van die misdaad, die omstandighede waaronder dit gepleeg is en die belange van die samelewing is myns insiens van só 'n aard dat daar aan die persoonlike omstandighede van die beskuldigde minder gewig geheg behoort te word.”
Volgens regter January het Kasimeya waarskynlik geen ander keuse gehad as om skuldig te pleit nie.
“Sy gedrag ná die misdaad dui nie op iemand wat berou getoon het nie.
“Hy het vir sowat 'n maand die geleentheid gehad om die naasbestaandes van die oorledene om verskoning te vra of homself aan die polisie oor te gee om duidelik berou te toon. Dít het hy nie gedoen nie.”
Regter January het voorts gesê hy is terdeë bewus van die doelwitte van 'n vonnis – naamlik voorkoming, vergelding, hervorming en om as afskrikmiddel te dien.
Desondanks verdien dié misdaad wat hom betref “die ergste vonnis in hierdie hof se diskresie”.
Kommentaar
Republikein
Geen kommentaar is op hierdie artikel gelaat nie