Republikein Newspaper

Mathias Haufiku –Wetgewers vrees hul veiligheid sal in gedrang kom as die leiers van die Landless People’s Movement (LPM), mnre. Bernadus Swartbooi en Henny Seibeb, weer in die Nasionale Vergadering (NV) toegelaat word sonder enige dissiplinêre maatreëls, het die hooggeregshof Woensdag gehoor.

Dit is vervat in hofstukke wat ingedien is deur die regspan van prof. Peter Katjavivi, die Speaker, waarin hy die vrese van parlementslede uitlig.

“Ek is deur verskeie parlementslede genader wat ernstig vrees vir hul veiligheid, sou die aansoekers toegelaat word om die parlement te betree voordat die tugproses afgehandel is. Hulle beskou die aansoekers se gedrag as onaanvaarbaar,” het Katjavivi in sy beëdigde verklaring van 22 April gesê.

Katjavivi het gesê die LPM-duo sal hul dreigemente uitvoer as hulle weer binnegelaat word, en vandaar sy “tydelike aksie, hangende die betrokke komitee wat die saak hanteer”.

Die Speaker, wat aanvoer die twee parlementslede se gedrag kom op kriminele optrede neer, het gesê hy het nog nooit vantevore “lelike uitbarstings” in die NV aanskou vóór Swartbooi en Seibeb hul verskyning gemaak het nie.

Hy het verder gesê sy besluit om die twee te verwyder word deur parlementêre reëls gesteun.

“My optrede was nie bestraffend nie. My aksies is voorkomend, gebaseer op die applikante se uitsprake tydens 'n mediakonferensie kort ná die voorval, waar hulle gesê het hulle sal nie dié uitdagende houding staak nie, en dat hulle nie spyt is nie,” het hy gesê.

ONSTABIELE SITUASIE

Intussen het die hoof van sekuriteit by die parlement, mnr. Gideon Shuuya, die sekuriteit-situasie in die parlement as “onstabiel” beskryf.

Shuuya is van mening die situasie sal oproerig bly as Swartbooi en Seibeb terugkom sonder dat enige dissiplinêre stappe teen hulle gedoen is.

Hy het verder beweer Seibeb “het iemand met geweld gedreig deur te sê hy ken dié persoon se adres. Dit was skynbaar 'n direkte dreigement teenoor die persoon se veiligheid”.

Die sekretariaat was alreeds vóór die chaos, wat tydens president Hage Geingob se staatsrede in April uitgebreek het, besig om die veiligheidsituasie te beoordeel.

BLY WAAKSAAM

In haar veiligheidsverslag van 12 Maart 2021 wat aan Katjavivi voorgelê is, het me. Lydia Kandetu, die VN se sekretaris, reeds aanbeveel die parlementêre beskermingsdiens moet waaksaam wees om te verseker dat wetgewers nie in fisieke gevegte betrokke raak nie.

Seibeb en Swartbooi wat in ’n woordewisseling betrokke geraak het met die Swapo-woordvoerder, me. Hilma Nicanor, het aanleiding gegee tot dié verslag. Destyds het Kandetu ook beweer die duo het amper in ’n bakleiery met 'n ander Swapo-parlementslid, mnr. Pohamba Shifeta, betrokke geraak.

Kandetu het gesê wat die staatsrede-debakel betref, het die twee Katjavivi se waarskuwings geïgnoreer, vandaar die besluit om hulle uit te skop.
– [email protected]

FOTO
Speaker Peter Katjavivi het in hofstukke gesê die chaos wat in April in die Nasionale Vergadering uitgebreek het, het vrees onder parlementslede geskep. Foto Argief