Paladin baklei vir Langer Heinrich
CNNC dra nie die belange van onder meer klein aandeelhouers en sowat 'n duisend werknemers op die hart nie, sê Paladin.
Jo-Maré Duddy - Paladin Energy Ltd gaan nie sonder 'n geveg toelaat dat die staatsbeheerde China National Nuclear Corporation (CNNC) 100% van die Langer Heinrich-uraanmyn besit nie.
Dié Australiese groep het gister gesê hy koers internasionale arbitrasiesentrum in Singapoer toe om 'n stokkie voor CNNC se planne te steek om sy belang van 75% in die Namibiese myn te bekom.
'n Kontantknyp het veroorsaak dat CNNC Paladin vroeër vandeesmaand opdrag gegee het om 'n redelik markwaarde vir sy meerderheidsaandeel in Langer Heinrich te bepaal. Paladin het reeds in Februarie gewaarsku dat sekere “solvensie-scenarios” CNNC dié mag kan gee.
Teen die einde van verlede jaar was Paladin se netto lopende batetekort US$173,5 miljoen, 24% méér as die einde van Junie 2016.
Die groep se skuldverpligtinge tot die einde van 2017 – waarvan die eerste op 30 April betaalbaar is – beloop meer as US$240 miljoen. Om te verseker dat Paladin sy skuld kan vereffen en as 'n lopende bedryf voortbestaan, is 'n herstrukturering van sy balansstaat in Januarie voorgestel. CNNC kan dié plan egter in die wiele ry.
Alexander Molyneux, uitvoerende hoof van Paladin, het gister in 'n verklaring gesê CNNC kan net aandring op die vasstelling van 'n redelik markwaarde indien dié Chinese SOE kan bewys Paladin het hom aan wanbetaling skuldig gemaak. Dit is nie die geval nie en dus betwis Paladin die geldigheid van CNNC se stap.
Molyneux sê Paladin gaan sy krediteure probeer oortuig om sy skuldverpligtinge vir eers te bevries. Dit sal die maatskappy tyd gee om CNNC in die arbitrasiesentrum aan te vat en te verseker Paladin beskik oor genoeg geld.
Sowat 75% van obligasiehouers wat vanjaar op hul geld kan aanspraak maak, het reeds ingestem, terwyl 87% van diegene wie se belegging in 2020 terugbetaal is, ook reeds hul goedkeuring verleen het.
Herhaalde weiering
CNNC besit reeds 25% van Langer Heinrich.
Toe Paladin in 2014 'n kontantinspuiting nodig gehad het, het CNNC US$190 miljoen hiervoor opgedok. Verlede jaar het Paladin CNNC die kans gegee om sy belang te vergroot: Nóg 24% vir US$175 miljoen. Die Chinese was egter nie hiervoor te vinde nie.
Molyneux het gister gesê CNNC se optrede is “teleurstellend” gegewe die goeie terugvoer wat reeds oor Paladin se herstruktureringsplan ontvang is. CNNC se ignorering van die 24%-aanbod, asook die feit dat hy “herhaalde” kere verseg het om die lopende kapitaalvereistes van Langer Heinrich te finansier, is eweneens 'n teleurstelling.
CNNC het gevolglik die belange van Paladin se belangehebbers, insluitende onder meer sowat 26 000 klein aandeelhouers, 'n duisend werknemers en internasionale finansiële instellings in die weegskaal geplaas, sê Molyneux.
Tensy 'n “aanvaarbare middeweg” gevind kan word, sal Paladin CNNC se beplande oorname van Langer Heinrich beveg, sê hy.
Paladin is op die algehele indeks van die Namibiese aandelebeurs (NSX) genoteer, asook op die beurse in Australië (ASX) en Toronto, Kanada (TSX). Die groep het Woensdag op N$1,04 op die NSX geëindig.
Gister is verhandeling in Paladin opnuut opgeskort.
Dié Australiese groep het gister gesê hy koers internasionale arbitrasiesentrum in Singapoer toe om 'n stokkie voor CNNC se planne te steek om sy belang van 75% in die Namibiese myn te bekom.
'n Kontantknyp het veroorsaak dat CNNC Paladin vroeër vandeesmaand opdrag gegee het om 'n redelik markwaarde vir sy meerderheidsaandeel in Langer Heinrich te bepaal. Paladin het reeds in Februarie gewaarsku dat sekere “solvensie-scenarios” CNNC dié mag kan gee.
Teen die einde van verlede jaar was Paladin se netto lopende batetekort US$173,5 miljoen, 24% méér as die einde van Junie 2016.
Die groep se skuldverpligtinge tot die einde van 2017 – waarvan die eerste op 30 April betaalbaar is – beloop meer as US$240 miljoen. Om te verseker dat Paladin sy skuld kan vereffen en as 'n lopende bedryf voortbestaan, is 'n herstrukturering van sy balansstaat in Januarie voorgestel. CNNC kan dié plan egter in die wiele ry.
Alexander Molyneux, uitvoerende hoof van Paladin, het gister in 'n verklaring gesê CNNC kan net aandring op die vasstelling van 'n redelik markwaarde indien dié Chinese SOE kan bewys Paladin het hom aan wanbetaling skuldig gemaak. Dit is nie die geval nie en dus betwis Paladin die geldigheid van CNNC se stap.
Molyneux sê Paladin gaan sy krediteure probeer oortuig om sy skuldverpligtinge vir eers te bevries. Dit sal die maatskappy tyd gee om CNNC in die arbitrasiesentrum aan te vat en te verseker Paladin beskik oor genoeg geld.
Sowat 75% van obligasiehouers wat vanjaar op hul geld kan aanspraak maak, het reeds ingestem, terwyl 87% van diegene wie se belegging in 2020 terugbetaal is, ook reeds hul goedkeuring verleen het.
Herhaalde weiering
CNNC besit reeds 25% van Langer Heinrich.
Toe Paladin in 2014 'n kontantinspuiting nodig gehad het, het CNNC US$190 miljoen hiervoor opgedok. Verlede jaar het Paladin CNNC die kans gegee om sy belang te vergroot: Nóg 24% vir US$175 miljoen. Die Chinese was egter nie hiervoor te vinde nie.
Molyneux het gister gesê CNNC se optrede is “teleurstellend” gegewe die goeie terugvoer wat reeds oor Paladin se herstruktureringsplan ontvang is. CNNC se ignorering van die 24%-aanbod, asook die feit dat hy “herhaalde” kere verseg het om die lopende kapitaalvereistes van Langer Heinrich te finansier, is eweneens 'n teleurstelling.
CNNC het gevolglik die belange van Paladin se belangehebbers, insluitende onder meer sowat 26 000 klein aandeelhouers, 'n duisend werknemers en internasionale finansiële instellings in die weegskaal geplaas, sê Molyneux.
Tensy 'n “aanvaarbare middeweg” gevind kan word, sal Paladin CNNC se beplande oorname van Langer Heinrich beveg, sê hy.
Paladin is op die algehele indeks van die Namibiese aandelebeurs (NSX) genoteer, asook op die beurse in Australië (ASX) en Toronto, Kanada (TSX). Die groep het Woensdag op N$1,04 op die NSX geëindig.
Gister is verhandeling in Paladin opnuut opgeskort.
Kommentaar
Republikein
Geen kommentaar is op hierdie artikel gelaat nie