Os byna so swaar soos Springbokspan

Rekordbedrag vir twee slagosse opgedok

05 October 2021 | Landbou
Ronelle Rademeyer – Besoekers aan die Windhoek Skou het verlede week oopmond na die twee reuse-osse gestaar wat by die vee-afdeling uitgestal is sodat mense die diere se gewigte kon raai om vir ’n prys in aanmerking te kom.

“As Gentle Giant met ’n vol pens geweeg was, sou hy die skaal digby 1 500 kg getrek het. Dit omtrent soveel as wat 15 Springbokspelers weeg.” So sê dr. Alfred Dippenaar van WagNou Boerdery naby Gobabis wat Donderdag dié twee reuseslagosse vir die rekordbedrag van N$96 000 aan mnr. John Pearson, eienaar van Brakwater Abattoir verkoop het. Die diere is Vrydag geslag.

Gentle Giant, die Chianina-kruising, het met ’n leë pens die skaal op 1 290 kg getrek. “’n Dier weeg maklik 8 persent meer as dit met ’n vol pens geweeg word, wat beteken hy kon die skaal amper op 1,5 ton trek. Dit is omtrent soveel soos wat 13 tot 15 Springbokspelers saam weeg.”

Die ander os, Big Blue, het droog (vir 24 uur sonder kos) 1 180 kg geweeg. Hy was ’n Belgian Blue-kruising.

Pearson het vir die Chianina-os N$50 000 betaal en vir die Belgian Blue-os N$46 000. Dit is ’n Namibiese rekord.

“Ek kon hulle net laat slag het, maar het besluit om die diere eers ten toon te stel en op te veil omdat hulle redelik uniek is,” sê Dippenaar. Hy het 7% van die opbrengs as kommissie aan die skoufonds betaal om in die landbou-afdeling terug te ploeg.

Gentle Giant het 816 kg uitgeslag en Big Blue 760 kg, vertel Dippenaar.

Pearson sê hy het die osse teen daardie bedrag gekoop om vir produsente te wys as jy ’n os laat loop (en nie vroeg bemark nie), beteken dit vir jou geld in die sak. “Slagos-produsente is aan die uitsterf en ek wil hiermee bewys daar is geld te maak uit slagosse,” sê hy.

Dippenaar sê die twee osse, wat enkele maande verskil het, was 6,5 jaar oud. “Ek kon hulle tot op 8 jaar laat loop het voor ek hulle bemark het, wat beteken hulle sou nog swaarder geweeg het.”

Hy vertel hy het met die Belgian Blues, die breedste beesras ter wêreld, kennis gemaak toe hy ‘n paar jaar gelede in Skotland gaan rugby kyk het.

Dippenaar sê hy was so geïnteresseerd in dié Belgiese beesras, dat hy besluit het om embrios in te voer.

“Die veearts wat met die inplanting gehelp het, het ook toegang gehad tot Chianina-embrios. Chianinas is die hoogste beeste in die wêreld en van die oudste rasse wat daar is. Dit is ’n Italiaanse ras wat aanvanklik as trekosse gebruik is,” vertel Dippenaar.

Hoewel Dippenaar ’n Beefmaster-stoet het, gebruik hy die Chianina- en Belgian Blue-bulle op Beefmaster-tipe koeie in sy kommersiële kudde.

“Omdat beide hierdie rasse grootraambeeste is, vaar hulle as suiwer rasse nie in ons Namibiese omstandighede so goed. Hulle is nie aangepas vir hierdie harde wêreld nie. Daarom gebruik ek hulle as kruisings in my kommersiële kudde.

“Die Chianinas toon ongelooflike groei en lewer uitstekende speenkalwers en slagosse,” sê Dippenaar.

Hy sê hy het die twee osse saam met sy Beefmaster-veilingbulle op die veld afgerond. “Ons meng ons eie WagNou-voer vir veldafronding. Die veilingsbulle het daarop gebly en die twee slagosse het ek die laaste maand op kraal gesit en met WagNou se volvoer verder afgerond.”

WagNou Boerdery het verlede week sy eerste Beefmaster-veiling saam met ander telers aangebied en die bulle het ’n gemiddelde prys van N$52 000 behaal.

Dippenaar sê die Chianinas en Belgian Blues is eintlik sy stokperdjie. “Hierdie rasse is interessant en bring bietjie opwinding op die plaas. ’n Mens kan so maklik moedeloos raak oor die veediefstalle, veldbrande en politiek,” sê Dippenaar. –[email protected]

Soortgelyk

 

Geen sterftes, 45 nuwe gevalle

57 minute gelede | Gesondheid

Die Covid-verwante sterftes bly op 3 573, terwyl 45 gevalle (die meeste in Khomas) gister aangeteken is. Dit is 'n positiewe koers van 2,9% en...

Uitreiking van graad 11- en 12-uitslae vertraag

1 uur gelede | Onderwys

Die uitlek van verskeie vraestelle vir graad 11- en 12 gewone vlak eksamen en die vervroeging van die vakansie gaan 'n invloed op die vrystelling...

MIV/vigs die epidemie van ongelykhede

4 ure gelede | Gesondheid

MIV/Vigs bly die epidemie van ongelykhede. Elias Magosi, uitvoerende sekretaris van die Suider-Afrikaanse Ontwikkelingsgemeenskap (SADC) het op Wêreld Vigsdag wat globaal op 1 Desember herdenk...

Namibiër met Omicron: Kontakopsporing begin

14 ure gelede | Gesondheid

Ronelle Rademeyer - Die ministerie van gesondheid en maatskaplike dienste het reeds begin om die mense op te spoor met wie die Namibiese diplomaat wat...

Beleggingswet op ys … vir nou

14 ure gelede | Regering

Brigitte WeidlichDie minister van nywerheidsontwikkeling en handel, me. Lucia Iipumbu, het gistermiddag die konsepwet op die bevordering en fasilitering van beleggings in die parlement teruggetrek...

Somer, swem en lafenis

14 ure gelede | In beeld

Die munisipale swembad in Katutura en die een in Olympia is vanaf verlede Saterdag vir die publiek oop. Ingangsfooie by die swembaddens is N$10,50 vir...

Verdediging trap vas oor ‘geheime’

14 ure gelede | Ministeries

Augetto GraigDie ministerie van verdediging en veteranesake se boeke klop nie en die parlementêre staande komitee oor openbare rekeninge moes gister worstel om antwoorde uit...

Weer vir 1 Desember 2021

14 ure gelede | Weer

BINNELAND: Sonnig en warm in die suidweste, maar elders gedeeltelik bewolk en warm tot baie warm met enkele tot verspreide donderbuie in Otjozondjupa en Omaheke....

Geen keer aan brande

14 ure gelede | Ongelukke

Tanja BauseDie brand wat ’n week gelede by die Osona- militêre basis naby Okahandja begin het, het gister laat namiddag nog steeds in die berge...