‘Ons wonderbaba’

Een uit tien babas wêreldwyd vroeggebore

20 November 2020 | Gesondheid
Leandrea Louw – Met haar geboorte op 23 weke het Gabrielle Mirabelle Carolissen ’n skrale 540 gram geweeg. Sy is sover bekend die vroegste baba wat nóg in Namibië gebore is.
Dit was op 8 Junie vanjaar. Vyf maande later tel sy elke dag gewig op, hoewel sy steeds in die neonatale intensiewesorgeenheid (ICU) van Mediclinic op Swakopmund versorg word.
Haar ma, me. Latoya Carolissen, beskryf Gabrielle as haar “wonderbaba”.
“Ons oudste is 12 jaar oud en ons wou nog altyd nog ’n baba hê. Ons het agt jaar gewag voordat ons in Januarie die nuus gekry het dat ek swanger is. Voor Gabrielle se geboorte op 23 weke was ek vir ’n maand in die hospitaal en is later op streng bedrus geplaas,” vertel Latoya.
Volgens haar het ’n dokter aan haar gesê haar swangerskap gaan in ’n miskraam eindig.
Sy het bygesê: “God het die laaste sê. Ek het hieraan vasgeklou en my moederhart het vir my gesê waar daar lewe is, is daar hoop.
“Toe sy op 8 Junie gebore is, het ons vier maande in Mediclinic in Windhoek deurgebring. Haar longe was nie ten volle ontwikkel nie en sy was baie geneig tot infeksies. Die dokters het elke liewe antibiotika gebruik wat hulle kon vind om haar infeksievlakke onder beheer te kry. Danksy verskeie toetse het ons later besef sy het nie ’n tiroïed en die tiroïedhormoon nie,” vertel Latoya.
Volgens haar is elke dag ’n opdraande stryd met ’n ander uitdaging elke dag. Daar is egter ook elke dag klein verbeterings. Sommige dae is ’n goeie dag in die hospitaal, ander kere is dit die teenoorgestelde. “Maar dis ongelooflik om te sien hoe sy floreer, sy is baie aktief!”
Latoya sê Gabrielle was ’n brugbaba en was sedert haar geboorte aktief en skop gedurig.
“Terwyl ek swanger was, het sy geskop en rondbeweeg. Haar wilskrag en vasberadenheid is ongelooflik om te sien. Sy is so ’n vreugde!”
’n Baie emosionele Latoya se wens is om Gabrielle vir Kersfees tuis te hê.
“Sy is steeds aan die suurstofmasjien gekoppel en mag vir ’n rukkie so bly nadat sy ontslaan is. Ons sukkel nog met die voeding, maar elke dag is daar ’n bietjie vooruitgang. Sy is werklik ons wonderbaba.
As jy na haar voorletters (GMC) kyk, sien ek ‘God’s Miracle Child’, wat so gepas vir Gabrielle is.
“My man, Leswin, herinner my altyd daaraan ons moet op God vertrou en aanhou bid soos wat ons sedert die begin doen. Hy sê ook dit is God se plan en tyd en nie ons s’n nie.”
Latoya voel iets moet aan die Wêreldgesondheidsorganisasie (WHO) se riglyne vir aborsie gedoen word.
“My baba is op 23 weke lewend gebore. Ek glo sterk waar lewe is, waar daar ’n hartklop is, is daar hoop. My baba is ’n lewende bewys dat op 23 weke was sy nie net ’n fetus nie, maar ’n baba, ’n mens. Ek is baie sterk gekant teen aborsies, want my Gabrielle is die lewende bewys dat sy op 23 weke nie net ’n fetus was nie, sy is meer.
Sy moedig ma’s van vroeggebore babas aan om nooit op te gee nie en hul geloof te behou.
“Hou aan glo in God se plan; wag net vir Sy tyd. Dit is nie maklik nie, daarvan kan ek getuig. Dit is baie trane, slapelose nagte en gebede. Ek wil hê vroeggebore babas moet ’n kans kry en dat dokters hul uiterste bes moet probeer om hulle die beste kans op oorlewing te gee.”
Dinsdag is internasionale dag vir vroeggebore babas by die Mediclinic op Swakopmund gevier met ’n spesiale geleentheid vir al dié babas wat hier gebore is.
Die tema was ’n aanhaling deur Dr. Seuss dat “’n mens is ’n mens, hoe klein ook al”. Volgens die pediater by die hospitaal, dr. Sebastian Gericke, was die viering op bewusmaking gerig: “’n Baba wat vroeggebore is, is steeds ’n mens, het regte en moet met waardigheid hanteer word. Daar is baie inligting om te deel, veral met ouers oor wat om te verwag wanneer hul baba in die neonatale ICU is,” sê Gericke.
Hy het versoek dat ma’s wat borsvoed van hul borsmelk óf aan dié hospitaal óf aan die borsmelkkliniek in Windhoek skenk.
“Daar is altyd ’n behoefte.
“Mediese fondse verwag van ma’s om uit hul eie sak vir borsmelk te betaal en dit is ’n skande. Borsmelk is noodsaaklik vir die groei van vroeggebore babas. Die mediese fondse en hul vereniging moet erken borsmelk is noodsaaklik vir die oorlewing van vroeggebore babas.
“Die situasie plaas baie spanning op families wat reeds finansieel swaar trek om vir borsmelk uit hul eie sakke te betaal. Hopelik kan ons dit spoedig regstel en meer bekostigbaar en toeganklik maak wanneer ons ons eie borsmelkbank gevestig het,” het Gericke gesê.
Volgens hom word een uit elke tien babas wêreldwyd voortydig gebore. “Op Swakopmund is 50 babas vanaf November 2019 tot November dié jaar vroeg gebore. Ons het 331 bevallings gehad, rofweg sowat 16% tot 17% van die babas was vroeg gebore.
“Ons het een baba op 23 weke gehad, een op 24 weke, twee op 28 weke, drie op 29 weke, twee op 32 weke, drie op 34 weke, twee op 35 weke en die res op 36 en 37 weke.
“’n Vroeggebore baba is een wat voor 37 volledige weke gebore word,” het hy verduidelik.
[email protected]

Soortgelyk

 

Twee vas vir moord op Daniele Ferrari

3 ure gelede | Misdaad

Ronelle Rademeyer - Twee mans van die Havana- informele nedersetting verskyn vandag in die Windhoek-landdroshof in verband met die wrede moord op mnr. Daniele Ferrari...

Vermoorde vrou naak by Vierkantklip gevind

3 ure gelede | Misdaad

Ronelle Rademeyer - Teen laat gister was die vrae oor die lot van die 26-jarige vrou van Mondesa op Swakopmund wie se naakte lyk knap...

Polisiebeamptes ‘verdwyn’ met kiesmateriaal

3 ure gelede | Politiek

Hoofredaksie en Ester Kamati op Otjiwarongo - Twee polisiebeamptes wat Dinsdagaand met verkiesingsmateriaal op Otjiwarongo “verdwyn” en eers 40 minute voordat stempunte gisteroggend geopen het...

Weer vir 26 November

3 ure gelede | Weer

BINNELAND: Sonnig en baie tot bloedig warm in die Suide, andersins gedeeltelik bewolk en baie tot bloedig warm met 'n paar tot geïsoleerde donderbuie oor...

26 leerlinge toets positief vir Covid-19

10 ure gelede | Gesondheid

Uit die 68 nuwe Covid-19-gevalle wat vandag aangemeld is, is 26 leerlinge. Dit sluit 23 van die hoërskool St. Joseph in Windhoek en drie leerlinge...

Vrou se lyk by Vierkantklip op strand gevind

15 ure gelede | Misdaad

Die polisie het pas bevestig hulle is besig met 'n ondersoek op die plek waar die lyk van 'n vrou vanoggend deur "'n private persoon"...

Drie lorries bots naby Okahandja

1 dag gelede | Ongelukke

Ronelle Rademeyer - ‘n Vragmotorbestuurder moes met Kake van die Lewe uit die verfrommelde kajuit van sy lorrie verwyder word toe drie vragmotors kort ná...

Boer vooruit met min grond, min reën

1 dag gelede | Byvoegsels

Elvira Hattingh – ‘n Jaar en ‘n half nadat mnr. Johan Bean met sy intensiewe, maar baie suksesvolle skaapboerdery op sowat 5 ha grond in...

Veilings ly onder dalende veegetalle

1 dag gelede | Byvoegsels

Ellanie Smit – Hoewel Agra se omset in die 2019-’20 finansiële jaar gestyg het, het sy afdeling vir veilings deurgeloop omdat minder vee bemark is....