Republikein Newspaper

Hallo Ma,

Hoe werk die vervoer daar waar Ma bly? En is daar 'n lys van motorterme op die sitplek? Ene Deon Pienaar het op die webwerf Prolingua my wit kar verhef tot iets met aanpasbare sitplekkonfigurasie en insittendebewus-lugsakke.

En net sodat ek my musiek kan luister, het ek ook 'n binnemotorvermaakstelsel.

Maar moenie dat ek na die Afrikaanse radiodiens toe wil oorskakel nie, want dan moet ek eers die klant­tevredenheidsindeks uit my paneelkissie grawe, en dan los ek dit sommer, want netnou word ek 'n lewende plettertoetspop. Maar Ma, ek is 'n bietjie braaf, want ek ry sonder 'n aanboutprestasiestel, maar gelukkig het my motor pletter-en-gryp-beskerming. (Ek hoop maar dis 'n goeie ding, want dit klink vir my al te veel soos iets wat nie kan besluit of hy jou vriend of jou vyand is nie.)

Soos Ma sien, ry ek in Afrikaans. Maar soms klink dit eerder of ek op die oorlogspad is: Op die paneelbord sit die revolusiemeter, en dan sit die ou knormoer ook nog reg onder my neus. En nou onthou ek dat Pa altyd gesê het dat hy op die “rimme” ry as hy sy tande uitgehaal het. Gelukkig hoef ek nie met “rimme” te sukkel nie, want my tjor het paprybuitebande omdat manlief dink ek kan so-by-so nie die “(ver)dom(de)krag-ding hanteer nie”.

In teenstelling met die fênsie terme in Wiel, klink flappe en kattebak vir my na 'n gekskeerdery. Maar dit is steeds beter as een of ander turbo charger, 'n enkelkrulnaaf-turboaanjaer wat klink soos ingroeitoonnaels wat 'n mens in jou slaap rondjaag, of 'n kontraroterende balanseeras wat die nasmaak van 'n gediagnoseerde geestesversteurde in die mond laat. Hóé ook al Ma, maak tog Ma se teenuitglysitplekgordel vas as Ma moet ry, al is dit hóé veilig daar.

Ai Ma, soek dit op in die klanttevredenheidsindeks neffens Ma!

Baai, my Ma.



Dr. Chrisna Beuke-Muir

Vakgroep Afrikaans

Universiteit van Namibië