Ondonga-leiers hof toe oor koning

Jacqueline Louw – Die Ondonga tradisionele owerheid het verlede Vrydag die Windhoek-hoërhof versoek om ’n bevel te gee sodat die owerheid onbelemmerde en onbeperkte toegang tot koning Immanuel Kauluma Elifas mag hê in sake met betrekking tot die tradisionele owerheid en sy lede.

Hulle het verder versoek dat Ondonga-koningin Sesilia Ndapandula Elifas verbied word om toegang tot die koning te belemmer of in die sake van die tradisionele owerheid in te meng.

Hulle vra ook vir ’n bevel dat die tradisionele raadslede Peter Shimweefeleni Kauluma en Fillemon Shuumbwa Nangolo onmiddellike toegang tot die Ondonga-koning moet kry sonder die inmenging of teenwoordigheid van koningin Sesilia.

Die tradisionele owerheid het die hof voorts vir ’n bevel versoek dat die koning deur twee onafhanklike mediese dokters en ’n sielkundige ondersoek word om sy fisieke, emosionele en geestesgesondheid te bepaal. Gebaseer op die uitslag van hierdie ondersoeke, vra die tradisionele owerheid ook vir die mag om die hof te nader vir ’n bevel wat die koning ongeskik verklaar om sy gewone pligte, rolle en funksies uit te voer.

KOMMER OOR GESONDHEID

Mnr. John Walenga, ’n senior tradisionele raadslid van die owerheid, het in ’n beëdigde verklaring gesê die koning se gesondheid het so agteruitgegaan dat hy nie meer na homself kan omsien nie.

Volgens hom is die koning se geheue nie meer goed nie, herken hy selde mense en is hy dikwels ingedagte. Walenga beweer verder die koning kan nie meer die waarheid van valshede onderskei nie en dat hy gevolglik vatbaar vir manipulasie is. Hy sê verder die tradisionele owerheid is op die punt om deur die koningin vernietig te word, berigte oor vermiste vee in die gemeenskap die ronde doen en niemand meer rekening hou van veegetalle en dus die rykdom van die tradisionele owerheid nie.

In sy beëdigde verklaring sê Walenga: “Daar is duidelik ’n leierskapskrisis omdat die koning nie in ’n goeie algemene fisieke en geestestoestand is nie; hy is oud en geïsoleer van sy tradisionele ondersteuningstruktuur.”

Hierdie bewerings word deur koningin Sesilia weerlê in haar beëdigde verklaring wat voor die hof gedien het. Alhoewel sy erken dat die koning in ’n verswakte toestand is, ontken sy dat hy nie in staat is om sy pligte na te kom nie.

Walenga sê ook as gevolg van die gebrek aan toegang tot die koning kan die raadslede nie sekere onlangse besluite bevestig wat glo deur hom gemaak is nie. Hierdie besluite sluit onder meer in die aanstelling van ’n nuwe senior tradisionele raadslid, me. Ester Gwashamba Nepando, die afdanking van agt raadslede in April en die terugtrekking van die erkenning van mnr. Fillemon Shuumbwa Nangolo as die koning se opvolger.

Die koninging ontken dat Nangolo as die koning se opvolger aangewys is. Sy sê ook dat Walenga en ander afgedankte tradisionele raadslede vir eie gewin optree en hulle vir die tweespalt in die Ondonga-gemeenskap verantwoordelik is. Sy sê verder weens sy afdanking het Walenga nie magtiging om ’n hofaansoek namens die Ondonga tradisionele owerheid in te dien nie.

Die aansoekers is deur prokureurs George Coleman en Saima Nambinga verteenwoordig terwyl prokureurs Elias Shikongo en Sandra Miller die koningin verteenwoordig.

Regter Shafimana Ueitele het sy uitspraak voorbehou en het die saak tot 8 Mei vir sy beslissing uitgestel.