Omicron laat rooi ligte flikker

Henriette Lamprecht en Ellanie Smit

Die Namibiese regering monitor die situasie rakende die Omicron-variant en sal die nodige stappe doen om die impak daarvan te bestuur.

Dit was gister die boodskap van die minister van gesondheid en maatskaplike dienste, dr. Kalumbi Shangula, nadat buitelandse deure in en van Europa en Amerika tot die Verenigde Arabiese Emirate (VAE) die afgelope naweek weens die teenwoordigheid van dié nuwe variant in onder meer Suid-Afrika en Botswana ook vir Namibië toegeklap het.

Namibië is saam met lande soos Suid-Afrika, Botswana, Mosambiek, Zimbabwe, Lesotha, Malawi en Eswatini op die rooilys vir besoekers geplaas. Dit nadat Suid-Afrikaanse wetenskaplikes die Omicron-variant geïdentifiseer het en die Wêreldgesondheidsorganisasie (WHO) dit as ’n variant van kommer verklaar het.

Shangula het gister beklemtoon die monitering van die situasie sluit in toetsing vir Omicron. Hy het ’n beroep op die publiek gedoen om kalm te bly en huidige voorsorgmaatreëls te handhaaf.

“Die voorsorgmaatreëls bly dieselfde, maar dit moet veral op individuele vlak versterk word. Dit sluit inenting in,” het Shangula gesê.

Namibië is reeds sedert die naweek op ’n hoë gereedheidsgrondslag en tot op hede is geen Omicron-geval nog in die land aangemeld nie.

Die uitvoerende direkteur in die ministerie, mnr. Ben Nangombe, het belowe om inwoners op hoogte van enige nuwe verwikkelinge te hou.

“Die ministerie gaan voort om die situasie te monitor wat insluit om positiewe weefselmonsters aan genoomtoetsing vir moontlike identifikasie van enige variant van kommer te onderwerp,” het hy gesê.

Intussen het rolspelers in die plaaslike toerismebedryf die beperkings op reise deur internasionale lande as “drakonies” en ’n “doodskoot” beskryf.

Volgens die uitvoerende hoof van die gasvryheidsvereniging van Namibië (HAN), me. Gitta Paetzold, is die besluit te vinnig en sonder wetenskaplike bewyse geneem wat bewys dit is dodeliker.

“Ons weet ook nie of die oorsprong in Suid-Afrika is nie. Wat teen ons streek tel, is die lae vlak van inenting, dit is waarop ons op die oomblik moet fokus,” het sy gesê.

Die uitvoerende hoof van die Namibiese toerismeraad, mnr. Digu //Naobeb, sê Namibië was op die punt om tekens van verbetering in die aankoms en besprekings van buitelandse reisigers te sien.

Volgens hom kan beperkings katastrofiese gevolge hê, omdat besighede hoop verloor en uiteindelik hul deure sluit wat weer tot werksverliese lei.

“Dit kan nie beperk word tensy een of ander ekonomiese reddingsooreenkoms aangebied word om die bedryf vir die kort termyn aan die gang te hou nie,” het hy gesê.

//Naobeb het ook gemaan Europese lande moet na elke Suider-Afrikaanse land op ’n “geval tot geval-basis” kyk, met die huidige besluit wat niks anders as “drakonies” is nie.

Angola is die eerste Afrikaland wat sy grense vanaf 1 Desember vir Namibiërs en asook mense uit die ses ander lande sluit. Besoekers uit Brittanje, Duitsland, Amerika en Angola vorm deel van Namibië se toptien-toerismemarkte.

Die woordvoerder van die ministerie van die omgewing, bosbou en toerisme, mnr. Romeo Muyunda, het die situasie as “baie betreurenswaardig” beskryf.

“Dit gebeur in ’n tyd waarin die toerismebedryf net begin het om weer sy houvas ná ’n lang droogte van geen inkomste te kry. Dis ’n terugslag in terme van wat ons tot dusver bereik het. Namibië het die nodige maatreëls in plek om die veiligheid van ons toeriste te verseker. Elke land het egter die soewereine reg om sy eie maatreëls in te stel,” het hy gesê.

Volgens hom gaan die ministerie ook met die ministerie van internasionale betrekkinge en samewerking oor die kwessie vergader.

Mnr. Delphin Ilunga van Furaha Tours and Safaris sê hy het reeds kansellasies vir besprekings tot einde Desember ontvang.

“Ons het reeds kansellasies en lodges en parkfooie is reeds betaal. Ons weet nie hoe gaan die terugbetalings – veral van die toerismesektor – werk nie, omdat hulle gewoonlik nie besprekings terugbetaal of oordra nie.”

Om weer besprekings te doen, sal ook afhang wanneer Namibië weer as “gunstig” vir toeriste verklaar word.

Ilunga sê sekere mense het ook net seker tye van die jaar verlof.

“Wanneer dit verby is, stel hulle dit, óf uit tot volgende jaar, óf kanselleer dit heeltemal.”

Die perssekretaris in die kantoor van die president, dr. Alfredo Hengari, het bevestig president Hage Geingob is in konsultasie met alle lynministeries om ’n oplossing te probeer vind.

In kommentaar op Suid-Afrika se reaksie dat die beperkings ’n “straf” is, het Hengari gesê: “Ons is nie Suid-Afrika nie.”

Een van die eerste slagoffers van die wêreldwye reisbeperkings is die driehoekige internasionale Castle Lite-krieketreeks tussen Namibië, die VAE en Oman wat in Windhoek onderweg was en waarvan ses geskeduleerde wedstryde in die slag gebly het. Gevalle van Omicron is teen druktyd buiten in Botswana en Suid-Afrika ook in Brittanje, Hongkong, Italië, Israel, België, Duitsland, die Tseggiese Republiek en Australië aangemeld.

Prof. Tulio de Oliveira, die direkteur van die sentrum vir epidemiese reaksie en innovering in Suid-Afrika, het gesê dit blyk Omicron versprei vinnig, met die variant wat alle infeksies in die land in minder as twee weke oorheers.

Dr. Angelique Coetzee, voorsitter van die Suid-Afrikaanse Mediese Vereniging en die eerste Suid-Afrikaanse dokter wat owerhede ingelig het oor pasiënte met Omicron, sê die simptome is “ongewoon, maar matig”.

Die simptome van positiewe pasiënte wat sy behandel het, het ingesluit “intense moegheid” en ’n hoë polsslag. Nie een het ’n verlies aan smaak of reuk ervaar nie. Die helfte was nie ingeënt nie.

Dr. Rudo Mathivha, hoof van die intensiewesorgeenheid by ’n Omicron-epiesentrumhospitaal, het beaam sowat 65% is nie ingeënt nie en die res het net een spuit gehad. – [email protected] en [email protected]