Olimpiër maak sy beroepsdebuut

Andrew Poolman – Boksliefhebbers in die noorde kan maar gerus hul lippe aflek om op 27 Maart die bekroonde amateurbokser Junias Jonas se eerste toetrede tot die beroepskryt te beleef.Die 27-jarige weltergewig Jonas is steeds bestem om vanjaar in Tokio by sy tweede Olimpiese Spele aan te tree.Die gebore Swakopmunder is die heersende Statebondspele-kampioen van Melbourne 2018, nadat hy vier jaar tevore met die silwer weggestap het en net deur Josh Taylor geklop is – die onoorwonne WBA- en IBF-titelhouer wat binnekort al die betekenisvolle kampioengordels op ligweltergewig teen Jose Carlos Ramirez (WBO- en WBC-kampioen) kan verenig.Die Olimpiese reëls vir boksers is in onlangse jare verslap en vegters word nou toegelaat om hoogstens 14 beroepsgevegte te hê en steeds as “amateurs” vir die Spele te kwalifiseer, het die Namibiese Nasionale Olimpiese Komitee (NNOK) se me. Joan Smit aan die koerant bevestig.Op 27 Maart is Jonas bestem om sy beroepsdebuut op die MTC Kilimanjaro-boksklub se aand van gevegte op Ondangwa te maak.Jonas se opponent Dominikus Weyulu is ’n geharde vegter wat reeds vir die 14de keer in ’n beroepsgeveg betrokke sal wees.Weyulu se rekord sal niemand beïndruk as jy hoor hy het twee gewen, tien verloor en een keer gelykop geboks nie. Net drie vegters het hom egter met uitklophoue baasgeraak – Harry Simon Junior, Nathanael Kakololo en Sebastian Natanael, wat almal as boksers met hoër ambisie gesien word. Weyulu is nietemin ’n aanhouer tot die einde, al is hy een van daardie buiteperd wat nooit juis op “liefde” van die tellinghouers sal kan staatmaak nie.Junias het gister nie gereageer op ’n aanbod om oor die geveg kommentaar te lewer nie. Hy het ook nog geen kontrak met ’n promotor onderteken nie, sê hy.Vandat hy op die internasionale toneel gebars het met sy 2014 Statebond-silwermedalje uit Glasgow, Skotland, word sy vooruitsigte in die beroepskryt reeds as bogemiddeld gereken.Sy deelname aan die 2016 Olimpiese Spele in Rio de Janeiro het onverwags skeefgeloop toe hy op ’n klag van verkragting in hegtenis geneem is. Hy is tydelik uit aanhouding vrygelaat op die oggend van sy eerste geveg, wat hy teen ’n Fransman verloor het.Nadat hy etlike maande in Rio de Janeiro in die sorg van die ambassade moes deurbring om die voortslepende hofsaak te beveg, is die klag nóg maande later teruggetrek.HOOFGEVEGDie junior weltergewig Michael Benhard, een van die Noorde se lieflingseuns wat op 27 April in die hoofgeveg teen Varde (Swapo) Ndayambeka deur die toue klim, het twee keer teen Weyulu geboks en beide kere met punte gewen. Benhard, seun van die Olimpiese bokser Joseph Benhard, se beroepsrekord staan op agt gewen en een gelykop, teenoor Ndayambeka se ses gewen en vier verloor.Die baie belowende superkapokgewig Flame Nangolo (vyf uit vyf) is ook op die voorprogram teen Gustaf Petrus (3-1), terwyl die veergewigte Kennedy Imalwa (7-4-1) en Onesmus Nekundi (11-5-2) ook gesoute vegters is.’n Enkele nasionale titelgeveg word aangebied, naamlik tussen die superkapokgewigte Julius Sheetheni (5-4-1) en Andreas Mwenyo (3-4-1).– andrew@republikein.com.naFOTO’sDominikus Weyulu is ’n geharde vegter wat vir Junias Jonas in sy beroepsdebuut inwag. Foto Andrew PoolmanJunias Jonas, die 2018 Statebondkampioen, nader die einde van sy bekroonde amateurloopbaan. Foto Nampa/Reuters

Olimpiër maak sy beroepsdebuut

Kommentaar

Republikein 2022-05-22

Meld asseblief aan om kommentaar te lewer

Olimpiër maak sy beroepsdebuut

Kommentaar

Republikein 2022-05-22

Meld asseblief aan om kommentaar te lewer

MELD AAN