Olifante vertrap Noorde-plase

Reeds 21 olifantbesoeke vanjaar

11 August 2020 | Omgewing
Elvira Hattingh - Twee troppe olifante het sedert Donderdag en oor die afgelope naweek verwoesting op plase teen die veterinêre kordonheining in die Noordooste gesaai, met een plaas wat reeds die 21ste keer vanjaar deur die olifante besoek is.

Mnr. Riaan White van die plaas Uitsig sê hy het pas tevergeefs N$97 000 aan ’n elektriese heining spandeer om die olifante te probeer uithou.

Dit volg na die olifante sy plaas in 2019 altesaam 69 keer besoek het en skade van N$384 000 aangerig het.

“Ek het gister vir my vrou gesê ek dink ons moet maar liewer alles verkoop en al die waterpunte tot niet maak. Dalk moet ons net begin hout maak op die plaas,” het hy moedeloos gister aan Republikein gesê.

Hy sê sy plaaswerkers raak ook moedeloos om herhaaldelik dieselfde heinings te moet regmaak. “Soos wat jy regmaak, kom breek hulle dit weer, ’n mens kom net nie voor bly nie.

“Jy werk dag in en dag uit oor die olifante, soms gaan sit ons in die nag by ons heinings om hulle te probeer verjaag as satellietdata wys hulle is naby.”

White sê die olifante is gereelde besoekers aan veral sewe plase in die omgewing. Die keer het die twee troppe van altesaam tussen 70 en 80 olifante die plase Uitsig, Mooibome, Tranedal, Driemaal en Mylpaal besoek nadat hulle die veterinêre kordonheining oorgesteek het. Hulle het klaarblyklik in kleiner groepe opgedeel terwyl hulle die plase besoek het.

White sê dit blyk die olifante kom water op kommersiële plase soek, nadat hulle reeds die meeste waterpunte verder noord op die agentskap vir n ywerheidsontwikkeling in Namibië (Nida) se plase verwoes het.

Hy sê een van sy buurmanne het die afgelope jaar reeds alle pogings laat vaar om heinings of krippe te herstel.

Mnr. Peet Jacobsz wat op die plaas Tranedal boer, sê hy is net so moedeloos nadat die olifante sedert Donderdag twee van sy veeposte en ’n plaasdam verwoes het, wat beteken ’n klomp van sy beeste staan nou sonder water.

“Boonop het hulle hekke en heinings vernietig so ver soos hulle gekom het,” het Jacobsz gesê.

Gisteroggend het hy gesê dit blyk dat die olifante weer sy plaas verlaat het nadat groot skade aangerig is.

LPO GEFRUSTREERD

Die Lewendehaweprodusente-organisasie (LPO) se voorsitter, mnr. Thinus Pretorius, sê veeprodusente se probleme met olifante in dié en talle ander dele van die land is ‘n stokou probleem.

Hy sê die regering het intussen ’n kontrak met ’n private onderneming, onder leiding van dr. Malan Lindeque, aangegaan om ’n bestuursplan vir die olifante in Namibië saam te stel, waaraan daar tans aktief gewerk word.

“Die ministerie van die omgewing, bosbou en toerisme kom nie hul verantwoordelikheid na om die konflik tussen mense en wilde diere te bestuur nie.

“Papierwerk help niks as dit wat daarop staan, nie in praktyk toegepas word nie. Dit is waar die probleem lê en ons is gefrustreerd, om dit lig te stel,” het Pretorius gesê.

“Toepassing is ’n riller, dit help nié om ’n beleid te skryf of nog ’n papier van maanskyn en rose op te stel nie. Die probleem lê by die amptenare wat die werk moet uitvoer.

“’n Kommersiële boer kan nie saam met ’n olifant boer nie, ook nie met ’n hiëna of ’n trop sebras wat onbeperk sy eiendom betree en sy weiding verwoes nie,” het Pretorius gesê.

Hy sê die noordooste se olifantprobleme is telkemale reeds met die ministeries van staatsondernemings, handel en nywerheid, asook die omgewing en toerisme opgeneem.

Hy het gesê probleme met olifante is ook besig om by Outjo, Kamanjab, Korixas, Kalkveld en Omaruru handuit te ruk, terwyl sommiges ook ernstige probleme met hiënas, leeus of sebras ervaar wat uit die Namib-Naukluftpark na die Khomas Hochland beweeg.

“Dieselfde geld vir die buffels van Waterberg – al is 400 van hulle onlangs na Zambië verskuif, is hulle steeds oorbevolk en sal hulle aanhou uitbreek as daar nie weiding is nie. Dit stel die hele land se gesondheidstatus in gevaar,” het hy gesê.

- [email protected]

Soortgelyk

 

Nog 38 leerlinge toets positief vir Covid-19

1 uur gelede | Gesondheid

Die minister van gesondheid en maatskaplike dienste, dr. Kalumbi Shangula, sê nog 38 leerlinge van 'n sekondêre skool in die Onandjokwe-distrik het positief vir Covid-19...

Ligloop vir motorswendelary

4 ure gelede | Misdaad

’n Onlangse misdaadverslag van die Namibiese polisie waarsku die publiek teen ’n sindikaat wat goedkoop motors onder valse voorwendsels op sosiale media adverteer. Die swendelaars...

Feedmaster se Namib Laboratories doen nou Covid-toetse

4 ure gelede | Tegnologie

Die voermaatskappy Feedmaster se laboratorium wat in 2018 opgerig is om diagnostiese mikrobiologiese-, serologiese- en polimerase-kettingreaksie (PCR)-toetse vir die Namib Meulens-groep van maatskappye te doen,...

Psemas-tender sluit

17 ure gelede | Gesondheid

Henriette Lamprecht – Die tender om die staat se mediese fonds (Psemas) te bestuur, het Woensdag (23 September) gesluit. Dit volg nadat sekere vereistes in...

Babelse verwarring oor toerismeregulasies

17 ure gelede | Toerisme

Francoise Steynberg – Met Babelse verwarring wat in die toerismesektor oor die nuwe Covid-19-regulasies heers, word steeds op meer duidelikheid gewag.“Ons sal weet sodra daar...

Gemsbok soek lafenis

17 ure gelede | In beeld

Die Desert Hills Lodge in die Naukluft-berge naby Sesriem het 'n spesiale besoeker gehad wat sy dors in die swembad kom les het. Volgens mnr....

N$30 miljoen dringend nodig om rooisprinkane te beveg

17 ure gelede | Landbou

Elvira Hattingh – Sowat N$30 miljoen se benodighede word “sonder oponthoud” vir die bestryding van die Afrika rooitreksprinkaan in die Zambezistreek benodig. Dit, om te...

Weer vir 28 September

17 ure gelede | Weer

BINNELAND: Koud in die oggend, andersins sonnig en matig tot warm, maar baie warm in die Noorde met 'n paar wolke wat oor die Zambezistreek...

Skoonmaakveldtog takel landswye probleem

17 ure gelede | Gesondheid

Jana-Mari Smith – 'n Geskatte 61 ton menslike ontlasting en huishoudelike rommel word daagliks in die openbare areas in Windhoek se informele nedersettings gestort. Dié...