Nujoma 'wil weer president word'

Catherine Sasman – Menseregte-aktivis Phil ya Nangoloh beweer op sy Facebook-blad in ’n ope brief aan stigterpresident Sam Nujoma hy is deur “geloofwaardige” bronne ingelig dat Nujoma beplan om homself weer as presidensiële kandidaat by Swapo se komende kongres beskikbaar te stel.

In ’n ope brief van nege bladsye sê Ya Nangoloh hy is “oortuigend” ingelig dat Nujoma “in die geheim hoop” op ’n presidensiële nominasie - vermoedelik om president Hage Geingob en moontlik ander kandidate ook uit te daag.

Ya Nangoloh het verskeie reguit vrae aan Nujoma gestel en verduidelik waarom hy homself nie vir dié posisie beskikbaar moet stel nie.

Onder andere vra Ya Nangoloh of Nujoma agter die sogenaamde Agenda 17 sit, waarvan die hoofdoel na bewering is om alle kanse op ’n tweede presidensiële termyn vir Geingob te stuit.

Ya Nangoloh insinueer dat Nujoma Swapo-lede ondersteun wat teen Geingob gekant is, en dat hy “stilletjies” afgevaardigdes by die kongres aanmoedig om teen Geingob of enige ander teenstander van die party se presidentskap, te stem.

“Ek is baie bekommerd oor ’n scenario waar die Namibiese president en Swapo se president nie een en dieselfde persoon is nie,” het Ya Nangoloh gesê en bygevoeg dat só ’n situasie negatiewe gevolge vir openbare en nasionale veiligheid kan inhou.

TEEN NUJOMA-NOMINASIE

Ya Nangoloh, ’n bekende Nujoma-teenstander, sê hy is gekant teen die stigterpresident se politieke terugkeer, direk of indirek deur gevolmagtigdes, eerstens weens Nujoma se gevorderde ouderdom en omdat daar ’n dringende behoefte is vir jonger geslagte om die party se sake oor te neem. Tweedens, sê Ya Nangoloh, het Nujoma oorgenoeg tyd gehad om as Swapo en die Namibiese regering se leier te dien ná sy 40 jaar lange presidentskap van die party én sy drie termyne as president van die land.

Hy sê Nujoma moet as Swapo se eerste leier en oudhoofbevelvoerder verantwoordelik gehou word vir die Swapo put-sage waarin duisende mense verdwyn het of sistematies gemartel en vermoor is.

Hy sê ook Nujoma het op “roekelose wyse” PLAN-vegters beveel om die Namibiese grens met Angola oor te steek, in stryd met Resolusie 435 van die Verenigde Nasies se Veiligheidsraad, en dat dit die slagting van meer as 300 mense op 1 April 1989 meegebring het.

Ya Nangoloh het geskryf wydverspreide korrupsie het in die openbare sektor wortel geskiet tydens Nujoma se termyn van 15 jaar as staatshoof.

Dít in die vorm van baantjies vir boeties en die toekenning van winsgewende tenders, asook die twyfelagtige hervestiging van politieke boesemvriende op staatsbeheerde plase.

Hoewel Nujoma verskeie presidensiële kommissies van ondersoek na bewerings van korrupsie gelas het, is nie een van die bevindings van dié verslae, afgesien van die ondersoek na die verslag rondom die Ontwikkelingsbrigade, tot dusver openbaar gemaak nie.

Ya Nangoloh blameer ook vir Nujoma vir die dramatiese toename in Chinese burgers in die land, wat volgens hom onder die dekmantel van beleggings na Namibië kom en deur die jare bykans elke sfeer van die plaaslike ekonomie binnegedring het - wettig of onwettig.

Ya Nangolo het Nujoma oor sy stilswye oor die sistematiese stroping en plundering van Namibiese wildlewe en fauna deur Chinese en Noord-Koreaanse burgers berispe.

“Terloops,” skryf Ya Nangoloh aan Nujoma, “die meeste van dié stropingsaktiwiteite word vanuit die Omusatistreek uitgevoer vanwaar jy kom. So, wat presies is dit, dr. Nujoma, wat Namibië aan China en sy burgers verskuldig is? Verdra jy dié oortredings weens jou noue verwantskap met die Chinese nedersetters?”

Ya Nangoloh beweer honderde Namibiërs kla oor die “wegsteek” van VN- en ander internasionale fondse in China, wat opsy gesit is vir hul repatriasie, hervestiging en rehabilitasie ná jare in ballingskap.

Nujoma se woordvoerder, mnr. John Nauta, het gesê: "Ons is nou al gewoond aan Phil ya Nangoloh se dagdrome en wilde verbeelding. Laat hy maar slapelose nagte hê! Hy sien Nujoma oral, soveel so dat hy nie meer slaap nie!"