Republikein Newspaper

Die opsies vir ’n terugkeer na rugby-aktiwiteite gedurende vlak 4 van die Covid-19-noodtoestand is in diepte bespreek tydens die Namibië Rugby-unie se jaarvergadering en die besluit is geneem om kompetisie in Augustus te hervat.

Die NRU se ligas (premierliga, reserweliga en eersteliga) sal in ’n enkelronde beslis word.

Ondanks die beginselbesluit word uitgewys dat ’n veilige terugkeer vir rugby as kontaksport met geweldige en verreikende uitdagings gepaard gaan. Klubs sal verskeie ingrypende maatreëls moet toepas om die risiko van oordrag en verspreiding van Covid-19 te verhinder.

Die jaarkongres by die Safari Hotel in Windhoek het ook met die verkiesing van die uitvoerende raad gepaard gegaan.

Die uitvoerende komitee het die mandaat van die land se rugbyklubs verkry om die strategiese inisiatiewe uit te voer vir die volgende vierjaarsiklus wat op die 2023 Wêreldbeker in Frankryk, asook die beslissende kwalifiserende reekse van Rugby Afrika in die voorafgaande twee jare, sal uitloop.

Volgens die president, mnr. Corrie Mensah, word die afwesigheid van “nuwe bloed” gesien as die Namibiese rugbyklubs se vertroue in die werk en prestasie van die raadslede die afgelope twee jaar.

Die volgende bestuursposisies is almal onbestrede gevul:

President: Corrie Mensah.

Visepresident vir bestuursake: Walter Don.

Sentraal (twee verteenwoordigers): James Camm en Johannes Ockhuizen.

Weste-verteenwoordiger: Chandler Plato.

Noorde-verteenwoordiger: Steve van Wyk.

Skeidsregtersvereniging: William Steenkamp.

Skoleverteenwoordiger: Jannie Potgieter.

Verder is onderneem om spesialis-aanstellings by die volgende geskeduleerde raadsvergadering aan te wys, wat ’n regsverteenwoordiger, finansiële beampte en verteenwoordiger vir vrouerugby insluit. Die amp van visepresident vir rugbysake, tevore gehou deur mnr. Ivan Gaya, moet ook gevul word.

By die vergadering is die jaarlikse finansiële state aanvaar, wat as ’n belangrike maatstaf in die vertoning van die uitvoerende komitee oor die afgelope twee jaar beskou word.

Die huidige NRU-grondwet, met enkele wysigings om onder meer in pas met die Sportkomissie se riglyne te wees, is ook aanvaar.

Die Namibiese Sportkommissie se hoofadministrateur, mnr. Simaata Mwiya, asook die Namibiese Namsionale Olimpiese Komitee (NNOK) se verteenwoordigende lid vir rugby, mnr. Dawie Augustyn, het ook die vergadering as waarnemers bygewoon.