Republikein Newspaper

Elvira Hattingh - FNB Namibia, deur middel van die FirstRand Namibia Foundation Trust, het verlede week N$1 miljoen aan die Dare to Care-droogtehulpfonds op Okakarara geskenk.

Tot dusver is N$5,5 miljoen deur dié fonds ingesamel, wat gesamentlik deur twee landbou-unies bestuur word – die Namibië Landbou-unie (NLU), asook die Namibië Ontluikende Kommersiële Boere-unie (NECFU).

Die doel is om N$10 miljoen in te samel sodat voer vir beide kommunale en kommersiële boere teen N$50 per sak gesubsidieer kan word.

Me. Clara Bohitile, FirstRand Namibia Foundation Trust se voorsitter, sê dit is noodsaaklik dat almal hulp verleen waar nodig, sodat die land hierdie krisis kan oorleef.

“Verskeie Namibiërs is maar té bewus van die uitwerking van ernstige watertekorte en die werklikheid van droogte.

“Ons glo ons het as ‘n verantwoordelike maatskappy ‘n plig teenoor die omgewing om seker te maak die impak van ons aksies op die land, sy mense en ons natuurlike hulpbronne is minimaal, sodat toekomstige generasies dit ook kan geniet.

“As ‘n maatskappy wil ons graag vennootskappe met die regering en inisiatiewe soos die Dare to Care-droogtehulpfonds aangaan om oplossings vir ons volk se grootste uitdagings te vind en ook om hulp te verleen waar nodig.

“Ons handelsmerk se slagspreuk is juis ‘Hoe kan ons jou help?’” sê Bohitile.

Wesbank het ‘n bykomende N$2 000 geskenk, en die fonds is ook nou ‘n begunstigde van die FNB Happiness Store, waar enigiemand ‘n bydrae kan maak wat hulle pas.

Okakarara se burgemeester, me. Veundjua Kamutuezu, het die landbou- en private sektor vir hul reaksie op die regering se hulproep bedank.

“Die gesamentlike poging deur die landbou- en private sektor onder die Dare to Care-sambreel is ‘n belangrike stap om boere te help deur sekere veevoere meer bekostigbaar te maak deur middel van subsidies,” sê sy.

Mnr. Ehnrst Katjiku, Okakarara se uitvoerende hoof, het ook sy dank uitgespreek. Hy het ‘n beroep op boere gedoen om eerlik te wees wanneer hulle vir gesubsidieerde veevoer vra om seker te maak korrupsie laat die goeie inisiatief nie ontspoor nie.

Boere soos me. Godfriedine Muniazo en mnr. Gerson Muniazo het gesê hoe dankbaar hulle is dat die fonds verligting bring, omdat hulle nou hul vee kan voer en soveel moontlik daarvan kan red.

“Dis ‘n groot verligting, die jaar se droogte het die nedersetting waarvandaan ek kom baie swaar getref,” het Muniazo gesê.