Nasionale minimumloon ondersoek

Augetto Graig - Die ministerie van arbeid, nywerheidsbetrekkinge en werkskepping ondersoek die moontlikheid van 'n nasionale minimumloon.
'n Spesialis van die Internasionale Arbeidsorganisasie (ILO) het reeds die land hieroor besoek. Volgens die minister, mnr. Erkki Nghimtina, is dít nodig om uiterste armoede in die land te verminder.
Nghimtima het beklemtoon dit is nie 'n plaasvervanger vir kollektiewe bedinging nie.
"Ons het reeds in die bou- en sekuriteitsbedryf minimumloonooreenkomste. Soortgelyke ooreenkomste moet die statutêre minimum oorskry,” het hy gesê.
Die minister was aan die woord by die Namibiese Werkgewersfederasie (NEF) se jaarvergadering wat in Windhoek plaasgevind het.
Nghimtina het werkgewers aangemoedig om "die jeug te help om werk te kry".
"Sluit die informele en ongeskoolde ekonomie ook in. Verskaf ordentlike werk in Namibië sodat ons in harmonie stabiele arbeidsverhoudinge kan handhaaf."
Hy het gevra dat betrokkenheid by werkgewersorganisasies en vakbonde bevorder word, asook ’n begrip van wetlike regte en verpligtinge.
"Ons moet saam die uitdagings vir swartmense en gestremdes oorkom deur opleiding inklusief te maak en entrepreneurs te ondersteun,” het hy gesê.
Die minister het voorts teen "te veel verteenwoordigende organisasies" gewaarsku.
“Fragmentasie van vakbonde is nie uniek nie. Onder werkgewers is daar soortgelyke neigings - veral wanneer hulle hul eie belang voor gemeenskaplike belang stel,” het Nghimtina gesê.
Volgens die minister het sekere Namibiese werkgewers "onaanvaarbare houdings" en neem nie werkers se behoefte aan 'n vaste werk in ag nie.
"Hulle gebruik deeltydse en informele werk, sowel as lae beloning om vinnig geld te maak en dit kan tot arbeidsonrus lei. NEF moet 'n voorbeeld stel en ook na Suid-Afrikaanse kettingwinkels en buitelandse boumaatskappye uitreik."
Nghimtina het gesê werkgewers moet werkers vir insette vra oor hoe hulle 'n beter bydrae tot die besigheid kan lewer.
Die gasspreker tydens die geleentheid, dr. Joseph Diescho, het intussen na die voorgestelde
Nuwe Raamwerk vir Gelyke Ekonomiese Bemagtiging (NEEEF) verwys as "'n seun en 'n oorlogsugtige”.
“Ja, ons het nie genoeg vordering gemaak nie, maar dit vat meer bespreking met rolspelers, insluitende die armes,” het Diescho gesê.
“Wat doen ons vandag om die lewens van ons mede-Namibiërs te verbeter? 'n Mens kan nie die sterkes vernietig om die swakkes sterker te maak nie. Besigheid is 'n individuele keuse wat kom uit diep passie. Jy kan dit nie oordra deur politiek of selfs geloof nie.”
Diescho het die huidige Namibië met 'n zebra vergelyk en gesê: "Of jy nou die wit streep of die swart streep slaan, die dier kry seer."