Republikein Newspaper

Werkernemers van B2Gold se Otjikoto-myn het Vrydag tydens Nasionale Boomplantdag 1 000 bome en saailinge by die myn geplant.

Volgens die besturende direkteur van die myn, mnr. Mark Dawe, is dit die eerste keer dat hulle die dag vier.

“Ons probeer om die skade te herstel wat mynbouaktiwiteite aan die omgewing aanrig,” het hy gesê.

Volgens hom is inheemse bome soos kameeldoring en verskeie ander doringbome geplant.

Die minister van landbou, water en bosbou, mnr. Alpheus !Naruseb, het ’n beroep op alle Namibiërs gedoen om bome te plant en beskerm om ontbossing te voorkom.

Hy het die beroep tydens vieringe op Omaruru gemaak.

“Dit is almal se verantwoordelikheid om ontbossing te bekamp terwyl die volhoubare lewensbestaan van alle gemeenskappe wat van bosbou afhanklik is, bevorder moet word.”

Wêreldwyd word boomplantdag gebruik om bewustheid oor die belangrikheid van alle woude en bome te skep. In Namibië word die dag vir die afgelope 27 jaar op elke tweede Vrydag in Oktober gevier.

!Naruseb het gesê mense moet daarvan bewus wees dat ontbossing meestal veroorsaak word deur die onvolhoubare omskakeling van bosgrond na landbougrond, asook veegebiede wat nie net die lewensbestaan van bosbouers, bosgemeenskappe en inheemse bevolking benadeel nie, maar ook die verskeie lewensvorme op die planeet bedreig.

“Die lewensbestaan en voedselsekuriteit van baie van die wêreld se arm mense is afhanklik van woude en bome. Toegang tot bosprodukte, goedere en dienste is van uiterste belang vir die lewensbestaan en veerkragtigheid van die armste huishoudings,” het hy gesê.

Hy het gesê boomplantdag word vanjaar gevier onder die tema “Bosse verhoog die veerkragtigheid teen droogte: Plant bome om die risiko's vir klimaatsverandering te verminder”. Die boom van die jaar is die Zambezi-kiaat (Baikiaea Plurijuga). - Nampa