Namibië verloor 'n volksmoeder
Namibiërs groet een van hul statige dames.
Ronelle Rademeyer - Die 87-jarige me. Stienie Mudge, eggenoot van die baanbreker-politikus en grondwetskrywer mnr. Dirk Mudge, het Dinsdagnag ná 'n lang siekbed in die Paramount-versorgingseenheid in Windhoek gesterf.
Die Mudges was op een maand na 67 jaar getroud.
Dit was op 27 September vanjaar presies 40 jaar sedert Mudge en sy ondersteuners uit die Nasionale Party weggebreek het en deur middel van 'n onderhandelde skikking die weg vir 'n onafhanklike Namibië gebaan het. Dit was ook dié gebeurtenis wat tot die stigting van Republikein gelei het.
In al dié jare was sy deurgaans statig aan haar man se sy en het met haar sagte, innemende geaardheid diep in die harte van mede-Namibiërs gekruip.
Van hul laaste groot geleenthede saam in die openbare oog was toe sy outobiografie, Dirk Mudge: Enduit na 'n onafhanklike Namibië, in 2015 bekend gestel is.
Estelle de Bruyn het die Mudges onlangs by Paramount besoek, waar hy aan haar gesê het hy is diep dankbaar vir die uitstekende sorg wat hulle ontvang, die vriendelikheid, die deernis en die liefdevolle wyse waarop personeel na hulle omsien.
Stienie Jacobs is op 31 Mei 1930 op die plaas Ovikere in die Otjiwarongo-distrik gebore. Sy het 'n plaasskool bygewoon en later op Swakopmund haar laerskoolopleiding voltooi. Haar hoërskooljare was by die Bloemhof Meisieskool op Stellenbosch waarna sy aan 'n onderwyskollege in Bloemfontein studeer het. Sy het vir 'n kort tydjie hierna op Otjiwarongo skoolgehou voordat sy met Mudge getroud is.
“Sy was die gom wat ons familie bymekaar gehou het,” vertel me. Chrisna Greeff, haar dogter.
“Sy het 'n groot rol in my pa se lewe gespeel, maar altyd in die agtergrond. Sy was nie een vir die kollig nie en was op haar gelukkigste as sy net 'n vrou, ma en ouma kon wees. Sy was 'n dame met soveel styl en ongeag hoe rof dinge gegaan het of hoe gestres sy ook al was, sy het dit nooit gewys nie.
“My ma en pa sou op 15 Januarie 67 jaar getroud gewees het, maar my pa sê hulle was drie jaar voor hulle huwelik 'gekys', met ander woorde hulle was 70 jaar bymekaar,” het Greeff bygevoeg.
Tannie Stienie, soos sy alombekend was, laat haar vyf kinders, Henk, Chrisna, Riëth, Annalien en Jaco, asook 16 kleinkinders en 21 agterkleinkinders agter.
“Met al die aangetroudes bygetel, is ons 56,” vertel Greeff oor dié familie wat almal besonder na aan mekaar is.
'n Afskeidsdiens vir die familie vind vandag by die Lukas Kirche in Reuningstraat in Windhoek plaas, terwyl 'n gedenkdiens vir die publiek op 12 Januarie vanuit die Christuskirche aangebied sal word.
Die Mudges was op een maand na 67 jaar getroud.
Dit was op 27 September vanjaar presies 40 jaar sedert Mudge en sy ondersteuners uit die Nasionale Party weggebreek het en deur middel van 'n onderhandelde skikking die weg vir 'n onafhanklike Namibië gebaan het. Dit was ook dié gebeurtenis wat tot die stigting van Republikein gelei het.
In al dié jare was sy deurgaans statig aan haar man se sy en het met haar sagte, innemende geaardheid diep in die harte van mede-Namibiërs gekruip.
Van hul laaste groot geleenthede saam in die openbare oog was toe sy outobiografie, Dirk Mudge: Enduit na 'n onafhanklike Namibië, in 2015 bekend gestel is.
Estelle de Bruyn het die Mudges onlangs by Paramount besoek, waar hy aan haar gesê het hy is diep dankbaar vir die uitstekende sorg wat hulle ontvang, die vriendelikheid, die deernis en die liefdevolle wyse waarop personeel na hulle omsien.
Stienie Jacobs is op 31 Mei 1930 op die plaas Ovikere in die Otjiwarongo-distrik gebore. Sy het 'n plaasskool bygewoon en later op Swakopmund haar laerskoolopleiding voltooi. Haar hoërskooljare was by die Bloemhof Meisieskool op Stellenbosch waarna sy aan 'n onderwyskollege in Bloemfontein studeer het. Sy het vir 'n kort tydjie hierna op Otjiwarongo skoolgehou voordat sy met Mudge getroud is.
“Sy was die gom wat ons familie bymekaar gehou het,” vertel me. Chrisna Greeff, haar dogter.
“Sy het 'n groot rol in my pa se lewe gespeel, maar altyd in die agtergrond. Sy was nie een vir die kollig nie en was op haar gelukkigste as sy net 'n vrou, ma en ouma kon wees. Sy was 'n dame met soveel styl en ongeag hoe rof dinge gegaan het of hoe gestres sy ook al was, sy het dit nooit gewys nie.
“My ma en pa sou op 15 Januarie 67 jaar getroud gewees het, maar my pa sê hulle was drie jaar voor hulle huwelik 'gekys', met ander woorde hulle was 70 jaar bymekaar,” het Greeff bygevoeg.
Tannie Stienie, soos sy alombekend was, laat haar vyf kinders, Henk, Chrisna, Riëth, Annalien en Jaco, asook 16 kleinkinders en 21 agterkleinkinders agter.
“Met al die aangetroudes bygetel, is ons 56,” vertel Greeff oor dié familie wat almal besonder na aan mekaar is.
'n Afskeidsdiens vir die familie vind vandag by die Lukas Kirche in Reuningstraat in Windhoek plaas, terwyl 'n gedenkdiens vir die publiek op 12 Januarie vanuit die Christuskirche aangebied sal word.
Kommentaar
Republikein
Geen kommentaar is op hierdie artikel gelaat nie