Namibië en Botswana sluit grensverdrag
Samewerking tussen die buurlande is volgens beide staatshoofde deur die besoek versterk.
Augetto Graig
Sestien jaar nadat 'n gesamentlike kommissie die grense tussen Namibië en Botswana in die Kwando, Linyanti en Choberiviere aanvanklik gekarteer het, het die twee lande gister in Windhoek formeel 'n grensverdrag in dié verband onderteken.
Dit was die hoogtepunt van die president van Botswana, mnr. Ian Khama, se kort staatsbesoek aan Namibië.
President Hage Geingob het die ondertekening van die verdrag as 'n merkwaardige mylpaal beskryf en gesê die verdrag sal vrye beweging van mense vergemaklik. “Met die verdrag is ons vryer om rond te beweeg, nie net met goedere nie, maar ook as mense, en ek is gelukkig om dit namens julle (Namibiërs) te onderteken,” het Geingob gesê.
Ook Khama het die verdrag as 'n mylpaal beskryf en die werk van albei lande se opnamespanne geloof. Hy het gesê die ooreenkoms sal help om geskille tussen die lande te vermy en vrede te verseker.
Khama het voorgestel die twee lande se staatshoofde en ministers moet mekaar minstens twee keer per jaar besoek.
Tydens die opening van die samesprekings, waartydens ministers van albei lande teenwoordig was, het pres. Geingob sy dankbaarheid vir die besoek deur sy “broer” uitgespreek. “Ons maak ons vriende, en ons maak ons vyande, maar God maak ons bure,” het die Namibiese staatshoof gesê.
Volgens Geingob geniet Namibië en Botswana lang, historiese betrekkinge en bilaterale samewerking danksy gedeelde toewyding tot ekonomiese ontwikkeling en die verbetering van die lewens van albei lande se mense.
Geingob het gesê die ontmoeting versterk samewerking op gebiede soos energie, onderwys, gesondheid, verdediging en die omgewing. Hy het die vennootskap vir die ontwikkeling van 'n hawe vir Botswana in Walvisbaai uitgesonder, waarmee die Namibiese president vinniger vordering opmerk.
Nog 'n aspek van samewerking wat Geingob geloof het, is Air Namibia se direkte vlugte na Gaborone. Volgens hom is hierdie praktiese verbinding tussen inwoners noodsaaklik vir die bevordering van handel en toerisme.
Meer as 100 Namibiese studente studeer tans in Botswana, insluitend 14 gestremde studente.
“Die vrye beweging van goedere en dienste moet toegelaat word,” het Geingob oor streeksintegrasie beklemtoon.
Khama keer vanmiddag na Botswana terug.
Hy sal na verwagting in April die leierskap van sy land aan visepresident Mokgweetsi Masisi oorhandig.
Sestien jaar nadat 'n gesamentlike kommissie die grense tussen Namibië en Botswana in die Kwando, Linyanti en Choberiviere aanvanklik gekarteer het, het die twee lande gister in Windhoek formeel 'n grensverdrag in dié verband onderteken.
Dit was die hoogtepunt van die president van Botswana, mnr. Ian Khama, se kort staatsbesoek aan Namibië.
President Hage Geingob het die ondertekening van die verdrag as 'n merkwaardige mylpaal beskryf en gesê die verdrag sal vrye beweging van mense vergemaklik. “Met die verdrag is ons vryer om rond te beweeg, nie net met goedere nie, maar ook as mense, en ek is gelukkig om dit namens julle (Namibiërs) te onderteken,” het Geingob gesê.
Ook Khama het die verdrag as 'n mylpaal beskryf en die werk van albei lande se opnamespanne geloof. Hy het gesê die ooreenkoms sal help om geskille tussen die lande te vermy en vrede te verseker.
Khama het voorgestel die twee lande se staatshoofde en ministers moet mekaar minstens twee keer per jaar besoek.
Tydens die opening van die samesprekings, waartydens ministers van albei lande teenwoordig was, het pres. Geingob sy dankbaarheid vir die besoek deur sy “broer” uitgespreek. “Ons maak ons vriende, en ons maak ons vyande, maar God maak ons bure,” het die Namibiese staatshoof gesê.
Volgens Geingob geniet Namibië en Botswana lang, historiese betrekkinge en bilaterale samewerking danksy gedeelde toewyding tot ekonomiese ontwikkeling en die verbetering van die lewens van albei lande se mense.
Geingob het gesê die ontmoeting versterk samewerking op gebiede soos energie, onderwys, gesondheid, verdediging en die omgewing. Hy het die vennootskap vir die ontwikkeling van 'n hawe vir Botswana in Walvisbaai uitgesonder, waarmee die Namibiese president vinniger vordering opmerk.
Nog 'n aspek van samewerking wat Geingob geloof het, is Air Namibia se direkte vlugte na Gaborone. Volgens hom is hierdie praktiese verbinding tussen inwoners noodsaaklik vir die bevordering van handel en toerisme.
Meer as 100 Namibiese studente studeer tans in Botswana, insluitend 14 gestremde studente.
“Die vrye beweging van goedere en dienste moet toegelaat word,” het Geingob oor streeksintegrasie beklemtoon.
Khama keer vanmiddag na Botswana terug.
Hy sal na verwagting in April die leierskap van sy land aan visepresident Mokgweetsi Masisi oorhandig.
Kommentaar
Republikein
Geen kommentaar is op hierdie artikel gelaat nie