N$3,6 miljoen vir swartrenosters

Die Europese Unie (EU) en die Organisasie van Afrika, Karibiese en Stille Oseaanstate (OACPS) deur die Biodiversiteit- en Beskermde Gebiede-program (Biopama) ondersteun die Save The Rhino Trust (SRT) Namibia met meer as N$3,6 miljoen (200 000 euro) om swartrenosters in die Noordweste te beskerm. Die projek wat oor twee jaar sal strek, sal opleiding en toerusting aan SRT-spoorsnyers en –renosterbewaarders verskaf om voort te gaan om swartrenosters in die Kunene- en Erongostreek te monitor en te beskerm. Hulle veg onverpoos om die laaste vrylopende swartrenosters in die wêreld van uitwissing te red. Die swartrenoster is op die Wêreldbewaringsorganisasie (IUCN) se rooilys as ’n bedreigde spesie geklassifiseer.Die projek sal die versameling van data vir renostermonitering verbeter. Infrastruktuur sal geïnstalleer word en nuwe tegnologie sal gebruik word vir beter kommunikasie van spoorsnyers in die veld terwyl hulle patrollies oor die ruwe, bergagtige terrein van 25 000 vierkante kilometer stap. Dit sal verseker dat renosters as toeristetrekpleister en die bestaande renosterbewaarderprogram volhoubaar bly en tot voordeel van die biodiversiteit en plaaslike gemeenskappe strek. Die renosterbewaarderprogram word as een van die mees innoverende gemeenskapsgebaseerde bewaringsinisiatiewe in Afrika geag. Dit verskaf ook ’n inkomste aan sowat 50 renosterbewaarders wat tans in die Noordweste werk. “Ek is baie beïndruk met die ondersteuning wat natuurbewaring in Namibië tydens die Covid-19-krisis kry. Die vennootskap met Biopama kom op ’n geleë tyd om ons toe te laat om ons belangrike werk teen stropers voort te sit,” het die uitvoerende hoof van SRT Namibia, mnr. Simson Uri-Khob gesê. “Terwyl fondse vir bewaringsprojekte daal, beteken dit stropery sal styg.” Die EU-ambassadeur in Namibië, me. Sinikka Antila, sê Namibië word erken as die pionier van volhoubare wildbestuur en vertel ’n suksesverhaal van bewaring. “Die EU is verheug om ’n vennoot van van SRT te wees en biodiversiteitsbewaring bly ’n prioriteit vir die EU.”

N$3,6 miljoen vir swartrenosters

Kommentaar

Republikein 2025-07-03

Meld asseblief aan om kommentaar te lewer

N$3,6 miljoen vir swartrenosters

Kommentaar

Republikein 2025-07-03

Meld asseblief aan om kommentaar te lewer

MELD AAN

Advertensie