Republikein Newspaper

Yandi du Plessis - ’n Sooispitseremonie vir die voorsiening van krag aan die Otjomuise- en Havana informele nedersettings het Vrydag in Otjomuise in die hoofstad plaasgevind.

Die ministerie van landelike en stedelike ontwikkeling het N$14 miljoen vir die kragvoorsieningsprojek bewillig en sal na verwagting teen die einde Augustus vanjaar voltooi wees.

Die minister van landelike en stedelike ontwikkeling, dr. Peya Mushelenga, het tydens die geleentheid gesê die suksesvolle voltooiing van dié projek sal ’n merkwaardige verandering te weeg bring en ’n positiewe impak op die lewens van die gemeenskap hê.

Hy het in November verlede jaar gesê sy ministerie sal N$14 miljoen in die kragvoorsiening van 1 200 huise teen Junie 2020 belê.

“Ons het 'n morele verpligting om sosioëkonomiese ongelykhede in ons midde te herstel,” het Mushelenga gesê.

Volgens hom sal die suksesvolle en tydige voltooiing van die kragprojek ‘n teken van vooruitgang wees en inwoners van die Om’gulu-goombashe-, Kilimanjaro-, Babylon-, One Nation- en ander nedersettings kan in die toekoms dieselfde diens ontvang.

Die adjunkburgemeester, mnr. Ian Subasubani, het gesê die minister se teenwoordigheid is ‘n aanduiding van die belangstelling wat aan dienslewering, spesifiek vir minderbevoorregte stedelike inwoners, geheg word.

Hy het die inwoners van Otjomuise en Havana verwelkom en gesê: “Ons as julle politieke leiers is hard aan die werk om oplossings vir julle uitdagings te vind. Dit mag dalk nie teen die gewenste pas plaasvind nie, maar ons probeer ons bes.”

Die burgemeester van Windhoek, me. Fransina Kahungu, het gesê hulle is tevrede met die resultate van die herrangskikking van die stad se hulpbronne.

“Elektrisiteit was in die verlede ’n luuksheid maar is vandag ’n noodsaaklikheid vir almal.”

Volgens Kahungu sal baie mense in die Khomasdal- en Moses Garoëb-kiesafdelings binnekort onwettige kragverbindings vaarwel kan roep.

“Inwoners sal binnekort geld kan spaar, aangesien hulle nie meer buitensporige tariewe aan onwettige kragvoorsieners hoef te betaal nie,” het sy gesê, en bygevoeg skoolkinders sal nie langer ‘n rede hê om nie op skool te presteer nie, aangesien hulle nou in die aande kan leer.

Sy het inwoners herinner dit is hul burgerlike plig om hul maandelikse munisipale rekeninge betyds te vereffen.

Kahungu het ‘n beroep gedoen op die konstruksiemaatskappye wat die tenders ontvang het, Ekodi Investment cc, NK Trading cc en Faraday’s Electrical & Mechanical cc, om goeie diens te lewer en nie in die proses geld te vermors en die mense teleur te stel nie.

Die goewerneur van die Khomasstreek, me. Laura McLeod-Katjirua, het die munisipaliteit met die doelgerigte hervatting van hul ontwikkelingsverantwoordelikheid gelukgewens, asook hul konsekwentheid tydens die program. “Dit is ‘n aanduiding van die stad se toewyding om dienste na sy mense te neem,” het sy gesê.

“Die proses om dienste na die mense in informele nedersettings te neem is ingewikkeld, en die verantwoordelikheid kan nie slegs op die skouers van die Windhoek-munisipaliteit rus nie. Almal moet hul kant bring om die gemeenskap in te lig oor die belang van georganiseerde nedersettings en sodoende die kommerwekkende idee van grondonteiening te ontmoedig.”

Mnr. Samuel Angolo, die streekraadgewer van die Khomasdal-kiesafdeling, het die betrokke partye bedank, en gesê die verwesenliking van die projek is werklik ‘n aanduiding dat verandering op pad is.

“Ons is innig dankbaar. Nou kan ons kinders by die huis leer en ook ‘n kans hê om teen ander leerlinge in die land mee te ding,” het Angolo gesê. – [email protected]