'n 'Resep' vir geluk?

Elvira Hattingh - Vreemd hoe die mensdom altyd soekend is na geluk.

Sommige glo dit lê aan die anderkant van sukses, soos ‘n pot goud, begrawe by die bereiking van doelwitte en mylpale.

Nog meer gewaagd – party soek dit aan die onderkant van daai vonkelende glas, vol rooi.

“As ek net genoeg geld kan hê, as ek net daardie droomwerk kon hê, as ek net nie hoef te gewerk het nie.”

Geluk is skynbaar ontwykend. Elders, net nie hier nie.

In onlangse ‘n Ted-praatjie deur Shawn Achor oor die sielkunde agter geluk, beweer hy dat wetenskaplikes intussen ‘n “resep” vir geluk ontdek het.

Dit bestaan glo uit vyf daaglikse doen-goed.

Dit is so eenvoudig soos om elke dag ‘n lysie van drie items te maak waaroor jy dankbaar is. Dan moet jy ook daagliks ‘n dagboek-aantekening maak oor iets positiefs wat met jou in die afgelope 24 uur gebeur het. Die redenasie is dat as jy dit neerskryf, jou brein dit herleef.

Hy stel ook voor jy moet daagliks oefen en mediteer – laasgenoemde moet sommer ‘n paar keer per dag gedoen word. Nee, jy hoef nie ‘n koeng foe-meester of iets te wees nie, haal net diep en stadig asem en fókus op jou asemhaling.

Laastens moet jy iets goeds doen vir iemand anders – die Engelse praat van “random acts of kindness”.

Interessant genoeg word hierdie doen-dinge oor die eeue lank heen in gelowe, ook aan onder meer Christene, voorgeskryf.

Jy moet byvoorveeld daagliks jou seëninge tel – jy dink dus na oor dinge waaroor jy dankbaar is en oor positiewe gebeurtenisse in jou lewe.

Jy moet gereeld bid, wat volgens die kenners ‘n soortgelyke uitwerking op jou psige het as om te mediteer. En ja – om jou Christenwees prakties uit te leef, behels veral om goeie dade te verrig. Dit laat mens wonder oor die oorsprong van hierdie “wetenskaplike ontdekking” oor geluk.

Nietemin, die punt wat Achor probeer maak het, is dat geluk nie van eksterne faktore afhang nie, maar eerder afhanklik is van die werking van jou psige. Geluk is ‘n voorvereiste vir sukses en nie andersom nie.

Volgens hom is daar tydens navorsing bevind net 25% van sukses in die beroepswêreld word deur jou IK bepaal, terwyl 75% voorspel kan word deur te kyk na jou vlakke van optimisme, sosiale ondersteuning, asook jou vermoë om stres as ‘n uitdaging eerder as ‘n bedreiging te beskou.

Hy beweer jy kan jou brein geluk “leer”. Dit is ook nie afkomstig van “vlak” gevoelens soos tydelike vrolikheid of optimisme nie.

Daar is ook goeie rede waarom mense instinktief daarna streef om gelukkiger te wees: Achor sê ‘n gelukkige brein presteer beter. ‘n Optimistiese brein is intelligenter, kreatiewer en meer energiek.

Navorsing dui aan gelukkige “breine” is 31% produktiewer is as ongelukkiges, 37% meer suksesvol met verkope, en gelukkige dokters werk 19% vinniger en maak meer akkurate diagnoses.

Anchor sê indien dié oefening vir ‘n gelukkige brein 21 dae lank, twee minute per dag gedoen word, kan jy jou brein herprogrammeer om meer optimisties te wees.

Só leer jou brein om nie eers die negatiewe te soek nie, maar eerder die positiewe.

Skepties? Ek ook!

Maar ek glo wel dat genoeg, doelbewuste en daaglikse dankbaarheid jou lewe kan omkeer. Veral as jy weet waar jou seëninge vandaan kom. Dit skep vrede en tevredenheid – en behoort as motivering te dien om ook iets goeds vir ander te doen.