’n Eerste vir die land

SWA Safaris Namibia het twee splinternuwe busse van Hannic Motors in Windhoek aangekoop. Die voertuie is spesiaal vir die toerismebedryf en Afrika se grondpaaie gebou.

Volgens mnr. Xing Ru Zhang is hul masjiene en die onderstel spesiaal ontwerp om op grondpaaie te kan ry.

“Dit is die eerste Zhongtong-busse wat in Namibië verkoop is. Hulle is reeds die afgelope 20 jaar op die paaie van Mosambiek, Tanzanië, Zambië en Zimbabwe,” het hy gesê.

Standaard in elke bus is kragstuur, dubbele lugversorging, selfoonkragproppe by passasiersitplekke, ’n yskas, twee spaarbande en ’n radio.

Volgens mnr. Wilfried Sentefol, die besturende direkteur van SWA Safaris Namibia, is dit die eerste busse wat hulle direk ingevoer het.

“Die ander busse in ons besit is almal in Suid-Afrika aanmekaargesit. Om hulle direk in te voer, is baie goedkoper - dit kos die helfte minder as die ander busse,” het hy gesê.

Onderdele vir die Zhongtong-busse is by Hannic Motors beskikbaar wat ook gekwalifiseerde motorwerktuigkundiges in diens het.