Musici wil kus bekoor met Kersliedere

’n Klassieke konserttoer

16 December 2020 | Gebeure
Die teaterproduksiegroep Playmakers het die talente van die jong operasanger Galilei Njembo en die pianis Retha-Louise Hofmeyr ingespan om eerskomende naweek musiekuitvoerings op Swakopmund en Walvisbaai aan te bied.

“Ek het gehoor van Retha-Louise en Galilei wat 'n Kerskonsert vir die Kankervereniging aanbied en ek het gedink dit sal 'n wonderlike vertoning wees om vir Kersfees na die kus te neem. Ek het FNB genader en hulle was vuur en vlam om die konsert te borg. Dit is innoverend en klassiek,” sê die regisseur Sandy Rudd van Playmakers.

“Galilei is myns insiens een van Namibië se opkomende sterre; 'n jong man met groot musikale talent. Hy is reeds 'n wêreldklas-operasanger en sal ’n uitstekende ambassadeur vir Namibië wees. Retha Louise is 'n wêreldklas-pianis. Ons het reeds meer as 38 jaar gelede saam by die Nasionale Teater opgetree. Dit is vir my 'n ware eer om weer saam met haar te werk. Twee ongelooflike musikante wat geliefde Kersliedere uitvoer, is nie ’n ervaring om mis te loop nie.”

Die toer sal bestaan uit twee formele konserte, waarvan die eerste op Saterdag (19 Desemver) om 19:00 by die Walvisbaai Internasionale Skool sal plaasvind. Die tweede uitvoering is Sondag (20 Desember) om 19:00 by die Lutherse Kerk op Swakopmund. Playmakers wil ook met “pop-up”-operakonserte eksperimenteer, wat gratis opvoerings in die informele gebiede van Walvisbaai en Swakopmund sal behels.

“Dié informele konserte sal ’n nuwe ervaring vir Namibië wees. Pop-up theatre is soos 'n mini flash mob met een kunstenaar. Galilei en ek sal geskikte plekke vind en hy sal net optree. Niemand het nog nie so 'n operakonsert in Namibië aangebied nie. Ek is baie opgewonde oor hierdie eksperiment. Hopelik sal iemand wat kyk, verlief raak op operasang en kan dit hul lewe vir altyd verander. Wie weet, miskien is dit die nuwe manier van optree. Dit is ’n innoverende, toeganklike teaterervaring,” sê Rudd opgewonde.

DIE KUNSTENAARS

Die 20-jarige Galilei Uajenenisa Njembo is 'n jong voornemende operasanger van Windhoek. Hy studeer tans vir sy BA-graad in musiek vir vokale uitvoering aan die McGill-universiteit, een van die wêreld se voorste tersiêre instellings vir uitvoerende kunste. Aangesien hy 'n lid en gereelde solis van die internasionaal-erkende College of the Arts (Cota) se jeugkoor was, floreer hy deesdae in die klassieke musiekbedryf in Namibië.

Hy het sedert 2017 die verhoog met die Namibiese Nasionale Simfonieorkes gedeel en is in 2018 bekroon as die top-Namibiese student by Trinity College London. In 2019 het hy die Cota-prys vir uitnemendheid ontvang. Later is hy genooi om deel te neem aan die 2020-Immling Opera Festival in Duitsland.

Retha-Louise Hofmeyr was die direkteur van kunste in die Namibiese regering vanaf 1990 tot 2015. Tydens dié periode was sy verantwoordelik vir die ontwikkeling van kunsonderwys en die kreatiewe bedryf. Voorheen was sy 'n musiekdosent aan die Akademie vir Tersiêre Onderwys (1985-1990), 'n musiekvervaardiger vir die voormalige SWABC (1983-1985) en repetiteur vir PACT Ballet. Sy het 'n BMus, 'n onderwysdiploma, 'n MPhil in Entrepreneurskap aan die Universiteit van Pretoria, 'n uitvoerderslisensie van die Universiteit van Suid-Afrika (Unisa) en 'n diploma van Porto en Salzburg. Sy is 'n musiekeksaminator vir Unisa en het in Suid-Afrika, Namibië, Portugal, Italië, Duitsland, Oostenryk en die VSA opgetree.

Sy het reeds verskeie toekennings ontvang, waaronder twee erebewyse van die Franse regering.

Playmakers is 'n amateur-teatergroep wat die uitvoerende kunste in Namibië bevorder en is al die afgelope 40 jaar betrokke by meer as 100 produksies. Rudd, ’n bekroonde regisseur, was die dryfveer agter al hierdie produksies.

Kaartjies is vooraf beskikbaar op Webticket of by Pick-n-Pay. Kaartjies kos N$100 elk. Alle opbrengste is vir Galilei se klasgelde. Hy studeer tans aan die McGill-universiteit in Montreal, Kanada.

“Dit was so 'n moeilike jaar vir ons almal. Doen jouself 'n guns deur 'n goeie doel te ondersteun en gun jouself 'n uur van genot,” sê Rudd.

Soortgelyk

 

Okavango-alliansie vra vir moratorium op oliesoektog

1 uur gelede | Omgewing

'n Alliansie van plaaslike en internasionale burgerlike organisasies en aktiviste, Save Okavango's Unique Life (Soul), wil hê 'n moratorium moet geplaas word op ReconAfrica se...

Namibië se Ontplooiings- en Immuniseringsplan "onder die beste...

3 ure gelede | Gesondheid

Namibië se Ontplooiings- en Immuniseringsplan teen Covid-19 is deur die Wêreldgesondheidsorganisasie (WHO) as "een van die beste in die wêreld" beskryf. Volgens die minister van...

N$583 miljoen vir Namibië se Covid-19 Ontplooiings- en Immuniseringsplan...

4 ure gelede | Gesondheid

Die totale voorgestelde begroting vir Namibië se Ontplooiings- en Immuniseringsplan vir Covid-19-entstowwe is N$583 miljoen waarvan N$484,8 miljoen vir die aankoop van die entstowwe is....

Covid-19-regulasies geld tot 31 Maart

4 ure gelede | Gesondheid

Pres. Hage Geingob het pas by Staatshuis aangekondig die huidige Covid-19-maatreëls geld vir die volgende 36 dae vanaf middernag tot 31 Maart (Onafhanklikheidsdag op 21...

Metro spoils its customers

6 ure gelede | Plaaslik

Metro Namibia celebrated its birthday in style once again by spoiling five lucky customers each to a trailer of their own, stocked with N$5,000-00 worth...

Knopvelsiekte breek in Omaheke uit

15 ure gelede | Landbou

Knopvelsiekte het by Eiseb in die Omahekestreek uitgebreek en die beweging van beeste in dié gebied is tot verdere kennisgewing opgeskort.Dr. Albertina Shilongo, hoof-veeartsenybeampte in...

Vrou woon in haar motor by hospitaal

15 ure gelede | Mense

Henriette Lamprecht – 'n Bejaarde vrou van die kus woon die afgelope week in haar motor in die parkeerterrein van 'n staatshospitaal in Windhoek om...

Toekoms van 77 Air Nam-vlieëniers onseker

15 ure gelede | Vervoer

Francoise Steynberg – Altesaam 77 vlieëniers van Air Namibia se toekoms is onseker. Boonop het bykans 75% van die redery se vlieëniers se lisensies verval...

Ses damme voller as 100%

15 ure gelede | Weer

Elvira Hattingh – Terwyl altesaam sowat ses Namibiese damme tans 100% of meer water bevat, oorstroom die Zambezirivier sy walle, met water wat in die...