Mooi rokkies wil sy dra

Dalk het jy al die dinamiese toergids op die Internasionale Lughawe Hosea Kutako met haar kleurvolle Herero-rokke gewaar waar sy internasionale toeriste vriendelik verwelkom, want Katrina Kandjii-Black staan uit! Sy pronk flambojant met 'n breë glimlag in 'n Herero-rok met die Namibiese, Duitse of Italiaanse vlag. Selfs haar naels is in die kleure van die vlae geverf. Katrina is nie net vlot in onder meer Duits en Italiaans nie, maar is die enigste swart vroulike eienaar van 'n toeroperateurmaatskappy wat as toergids self toeriste in die land rondry.Die 41-jarige toergids is gebore op Gobabis en haar huistaal is trots Otjiherero. Sy is ook vlot in Afrikaans en Engels en kan 'n bietjie Damara/Nama praat. Sy was in die Primêre Skool Epako op Gobabis en Sekondêre Skool Paresis op Otjiwarongo.Toe sou Katrina nooit kon raai dat sy vir nege jaar ver paaie in Italië en Duitsland moes loop om hul vreemde tale en toerisme daar te studeer nie.As bedryfstudent by die destydse Politegnikum van Namibië, het sy 'n beurs losgeslaan by die Universiteit van Trento in noordelike Italië op die grens van Oostenryk in die Italiaanse Alpe waar sy ses jaar studeer het. Sy vertel hoe koud dit was om in die Alpe te ski. Daarna het sy vir drie jaar aan die Duitse Universiteit van Münster in die staat Noord-Ryn Wesvale studeer. “Dit was vir my baie swaar, want ek moes eers Italiaans en Duits leer vir my studies in hierdie mediums. Ek het altyd geweet ek wil terugkom huis toe sodra ek klaar studeer het,” sê Katrina. “Ek het geweet dit is nie my plek nie en daar was altyd iemand wat jou daaraan herinner jy is nie van hier nie.” In 2010 het sy met 'n blye hart na Namibië teruggekeer en haar eerste werk was as 'n lektor in Italiaans vir beginners as semesterkursus by die Politegnikum. Katrina het 'n oproep van 'n toeroperateur gekry wat 'n tolk gesoek het.“Italiaanssprekende Namibiese toergidse is so skaars soos hoendertande” en dit het die saadjie geplant om in 2013 haar eie toeroperateurmaatskappy, Ipaha Travels, te stig. Sy is meestal toergids vir Italiaanse en Duitse toeriste.Katrina was ook vir ses jaar die president van die Emerging Tourism Enterprises Association of Namibia, “maar ek sit nie in 'n kantoor nie, ek reis die land vol met my toeriste”.In 'n maand is sy tussen 10 en 20 dae weg van die huis, soms met dubbelskoftoere. Sy bied standaardtoere na Sossusvlei, die Visrivier-canyon, Sandvishawe, Twyfelfontein en die Etosha Nasionale Park aan, maar sy beskou haarself as 'n kulturele toergids.“Ná jare se ondervinding in die toerismebedryf blyk dit die toeriste stel meer belang in die diversiteit van ons kulture. Hulle wil sien hoe ons Namibiese mense van dag tot dag leef.” Op die Twyfelfontein-roete vat Katrina haar toeriste na die Damara Lewende Museum. Op Okahandja besoek hulle die Herero-grafte waar sy hulle met trots van die geskiedenis en erfenis van die Herero vertel.“Om die kulturele aspekte te weergee, is deel van my. Dis wat my anders maak, saam met my taalvaardigheid. Ek is 'n kulturele toergids. My werk is om in te lig, te onderrig en te vermaak.“Ek gee persoonlike aandag aan my toeriste, dit is waarom ek hulle met 'n Herero-rok met die Duitse of Italiaanse vlag verwelkom,” sê Katrina. KARAKTER EN HOUDINGSy is besig om 'n boek te skryf wat handel oor haar ondervindinge in Europa, die kulturele verskille en haar ervaring as toergids vir Duitsers en Italianers. Sy hoop die boek sal ook as 'n gids vir toekomstige toergidse dien.“'n Toergids het vaardighede nodig om onverwagse probleme op enige tyd te hanteer. Dit verg vaardighede om 38 vreemdelinge vir 10 tot 25 dae as 'n groep te verenig. “Elke gas moet as 'n individu in 'n groep hanteer word. Om 'n toergids te wees, moet jy 'n spesiale karakter en te alle tye die regte houding hê,” verduidelik Katrina.Sy sê die boek het nog nie 'n titel nie en sy sal dit in Duits en Italiaans vertaal. “Die boek is ook vir my twee kinders sodat hulle eendag kan verstaan waarom hul ma altyd van die huis af weg is.”GESINKatrina is vyf jaar getroud met Sylvester Black wat in die Omahekestreek boer. Hulle het twee dogters, Uaundjua(4) en die driejarige Tangee. “As 'n ma van twee kan ek slegs my drome bereik met die voortdurende steun van my man wat altyd bereid is om die moederrol te vervul as ek weg is.“Ek hoef nooit oor enigiets by die huis bekommerd te wees nie en kan my volle aandag by my toeriste bepaal.” Omdat Katrina haar eie besigheid het, sorg sy dat sy altyd met haar dogters se verjaardae by die huis is en van einde November tot einde Januarie saam met haar gesin vakansie hou. “Ek wil graag my kinders se horisonne verbreed en ek vat hulle ook op reise in ons land. Vanjaar gaan ons gesin vir die eerste keer saam oorsee,” vertel Katrina opgewonde. Hierdie toergids dra nie net mooi rokkies nie, maar dra ook die belange van haar toeriste, kultuur én gesin op haar hart.

Mooi rokkies wil sy dra

Kommentaar

Republikein 2025-07-01

Meld asseblief aan om kommentaar te lewer

Mooi rokkies wil sy dra

Kommentaar

Republikein 2025-07-01

Meld asseblief aan om kommentaar te lewer

MELD AAN

Advertensie