MET maak toerismesyfers vir 2018 bekend

‘Toerisme is ’n pilaar van ons ekonomie’

22 January 2020 | Ministeries
Yandi du Plessis - Volgens amptelike statistieke het die getal buitelandse besoekers aan Namibië van 2017 tot 2018 met ’n “indrukwekkende” 3,2% gegroei, en het die getal toeriste met 3,9% vir dieselfde tydperk gegroei.

’n Totaal van 1 659 762 buitelanders het Namibië in 2018 besoek, waarvan 1 557 279 toeriste was.

Die minister van die omgewing en toerisme, mnr. Pohamba Shifeta, het lede van die media en ander belanghebbendes gister toegespreek om 2018 se lang verwagte toerismesyfers eindelik bekend te maak.

“Dié statistieke gee ons die versekering dat ons goeie vordering maak in ons pogings om ons toerismebedryf te laat groei en ontwikkel.”

Die 10 lande wat in 2018 die meeste besoek aan Namibië afgelê het, is Angola, Suid-Afrika, Zambië, Duitsland, Zimbabwe, Botswana, Frankryk, Brittanje, Amerika en Nederland.

Die toptien- oorsese toeristemarkte is Duitsland, Frankryk, Brittanje, Amerika, Nederland, Switserland, Italië, België, China en Skandinawië.

Meer vroue (40,7%) het Namibië in 2018 as in 2017 besoek, hoewel dié getal met skaars meer as 1% op is.

In 2018 het die aantal mansbesoekers van 60,4% in 2017 tot 59,3% gesak.

Die meeste besoekers is tussen 30 en 39 jaar (25,9%), en die tweede grootste groep is tussen 40 en 49 jaar (20,6%) oud.

Die persentasie mense wat Namibië besoek om vriende of familie te besoek, is 50,9% en is meestal besoekers van ander Afrikalande.

Sowat 34,8% is vakansiegangers en 12,3% besoek Namibië vir sake.

Dié statistieke is noodsaaklik vir die beplanning en ontwikkeling van die Namibiese toerismebedryf.

“Ons moet weet hoeveel mense ons land besoek, van watter lande hulle af kom en hoe lank hulle hier is. Dié inligting is belangrik vir die groei en ontwikkeling van die publieke en private sektor. Hiermee kan hulle beter vir die toekoms beplan,” het Shifeta gesê.

“Sonder betroubare en akkurate statistieke is dit byna onmoontlik om ons langtermyndoelwitte vir ons 2030-visie te bereik.

“Dit gee ons die sekerheid dat ons in die wêreldmark as ‘deelnemers’ beskou kan word. Daar is nog baie ruimte vir verbetering in dié bedryf. In vergelyking met ander ekonomiese sektore in Namibië is die toerismebedryf besig om vinnig te groei, en ons glo die reis- en ontspanningsbedryf staan as een van dié met die grootste potensiaal uit.”

Die groei in toeristegetalle help die toerismebedryf om ’n groot bydrae tot die land se bruto binnelandse produk (BBP) te lewer, asook met grootskaalse werkskepping.

Toerisme beïnvloed die BBP en die ekonomie op verskeie maniere.

“Toerisme raak elke aspek van ons gemeenskap, en die impak daarvan kan veral in die plattelandse dele van ons land gesien word,” het Shifeta gesê.

Daar is wel geleenthede wat nog nie ten volle benut is nie. Namibië het ’n verskeidenheid produkte en geleenthede vir toeriste.

“Namibië het groot, oop ruimtes, natuurskoon en blootstelling aan uiteenlopende kulture. Toeriste word na bestemmings gelok deur vorige ervarings en deur dít wat die bestemming hulle kan bied. Vir ons om in dié bedryf te kan meeding, is dit belangrik om te sorg dat ’n hoë standaard gehandhaaf en doeltreffende dienste gelewer word.”

Om Namibië as gewilde toeristebestemming te bevorder, moet bemarking op ’n groter en doeltreffender skaal plaasvind, sê die minister.

Die toerismebedryf moet ook poog om ’n groter verskeidenheid produkte bekend te stel, meer op seisoenaliteit te fokus en meer strategiese bestuur toe te pas.

Die groeiende toeristesyfer het weer eens bewustheid van die belangrikheid van goeie infrastruktuur en menslike hulpbron-ontwikkeling geskep.

Die sukses van die toerismebedryf hang van die samewerking tussen alle belanghebbendes af, wat ’n aandeel in die bedryf het.

“Om ons land met die wêreld te deel, is ’n proses wat betekenisvolle publieke en privaat vennootskappe vereis om gehalteprodukte te vervaardig, bewustheid te skep en uitstekende kliëntediens te lewer.

Oor waarom die syfers laat vrygestel is, het die minister gesê hulle kry die data by verskillende ministeries, en hulle het nie die kapasiteit gehad om dit betyds te verwerk nie.

Hy sê beskikbare tegnologie sal in die toekoms beter ingespan word om data vinniger te verwerk.

Hulle hoop om 2019 se toerismesyfers teen Augustus vanjaar bekend te maak.

LUGREDERY SPEEL STEEDS ’N ROL

Shifeta het ook stilgestaan by die groot rol wat Air Namibia steeds in die toerismebedryf speel.

Van die buitelandse toeriste wat van lugvervoer gebruik maak, word 41% deur die nasionale lugredery ingevlieg.

Dit is ’n 6,7%-verbetering op die 2017-statistiek.

“Air Namibia loop die laaste tyd onder baie kritiek deur, maar ten spyte daarvan was dit in 2018 steeds die lugredery wat die meeste buitelandse toeriste na Namibië gevlieg het. Om dié rede moet ons alles in ons vermoë probeer doen om dit lewend te hou. Indien Air Namibia sou ondergaan, sal die toerismebedryf ’n groot knou kry, wat ook tot grootskaalse werksverliese sal lei.”

Die minister is ook versoek om die regering in dié geval aan te moedig om die plaaslike lugredery sterker te verdedig – veral ná die onlangse beriggewing dat slegs een Air Namibia-roete wel winsgewend is en ’n dringende tekort aan fondse het.

South African Airways (SAA) is tweede met 21,9% van lugpassasiers wat hulle invlieg, en Qatar Airways is derde met 8,6%.

[email protected]

Soortgelyk

 

Damme voller

10 ure gelede | Weer

Elvira Hattingh - Terwyl 99,671 Mm³ (miljoen kubieke meter) water altesaam 10 nasionale damme die afgelope week binnegevloei het, het die weerkantoor opnuut ’n waarskuwing...

Groot kommer oor sprinkaanplaag in Zambezi

10 ure gelede | Omgewing

Ronelle Rademeyer - ’n Plaag van bruin sprinkane uit vermoedelik Botswana teister kommunale boere by Muhundu en ander nedersettings in Katima Mulilo se landelike kiesafdeling...

Weerlig slaan meisie (11) dood

10 ure gelede | Misdaad

Weerlig het Saterdag die lewe van 'n elfjarige kind geëis. Volgens die Namibiese polisie se weeklikse misdaadverslag is Aini Shilongo Saterdag omstreeks 18:00 in 'n...

Weer vir 25 Februarie

10 ure gelede | Weer

WEERWAAK: Swaar storms word in die noordoostelike streke, Otjozondjupa-, Khomas- en suidelike streek verwag. Die nodige voorsorgmaatreëls moet getref word. BINNELAND: Gedeeltelik bewolk in die...

NamWater to fix Opuwo’s supply woes

10 ure gelede | Plaaslik

Uakutura Kambaekua – Since 2017, Opuwo town has been faced with diminished water supply, a predicament blamed on high water loss in distribution systems, which...

Havana, Otjomuise powered by June

10 ure gelede | Energie

The ministry of urban and rural development has committed a total of N$14 million for electrification for the 2019/20 financial year, an amount that is...

A significant contributor to Namibia's economic landscape

10 ure gelede | Byvoegsels

Hangana Seafood (Pty) Ltd is a 100% Namibian-owned company, passionate about “Creating a future, enhancing life” for its employees, country and the people of Namibia....

Corona: Afrika 66% gereed

10 ure gelede | Gesondheid

Henriette Lamprecht – Afrika se algehele gereedheidsvlak vir die coronavirussiekte (covid-19) staan op 66%. Volgens dr. Matshidiso Moeti, die Wêreldgesondheidsorganisasie (WHO) se streeksdirekteur vir Afrika,...

Grondonmin smeul op Tsumeb

10 ure gelede | Plaaslik

Denver Kisting – Die man wat hom midde-in ’n gronddebakel op Tsumeb in die Oshikotostreek bevind, mnr. Christo Groenewald, sê hy is moedeloos.As die regering...